ပြည်တွင်းကုန်သွယ်မှုသတင်း

        အောင်လံကုန်စည်ဒိုင်တွင် နှမ်းဈေးကွက်အနေဖြင့် ယခင်အပတ်(၂၈.၇.၂၀၂၂)ရက်နေ့နှင့် ယခုအပတ်(၃.၈.၂၀၂၂)ရက်နေ့အတွင်း နှမ်းဖြူနှင့်နှမ်းနီမှာ (၄၅)ပိဿာ(၁)အိတ်လျှင် ယခင်အပတ် (၁၈၀၀၀ဝိ/-) ယခုအပတ် (၁၈၀၀၀ဝိ/-)ဖြစ်၍ ဈေးနှုန်းပြောင်းလဲမှုမရှိကြောင်း သိရှိရပါသည်။

    ပဲမျိုးစုံဈေးကွက်တွင် ကုလားပဲ(H.L)နှင့် ကုလားပဲ(မြကြေး) (၂၀)ပိဿာ(၁)တင်းလျှင်(၅၂၀၀ဝိ/-) ယခုအပတ် (၅၂၀၀ဝိ/-)ဖြစ်၍ ဈေးနှုန်းပြောင်းလဲမှုမရှိသော်လည်း မတ်ပဲမှာ ယခင်အပတ် (၅၀၀၀ဝိ/-) ယခုအပတ် (၅၃၀၀ဝိ/-)ဖြစ်၍ (၃၀၀ဝိ/-)ဈေးမြင့်၊ ဘိုကိတ်ပြာ ယခင်အပတ်(၃၃၀၀ဝိ/-) ယခုအပတ် (၃၄၀၀ဝိ/-)ဖြစ်၍ (၁၀၀ဝိ/-)ဈေးမြင့်၊ ပဲတီစိမ်း ယခင်အပတ် (၄၆၀၀ဝိ/-) ယခုအပတ် (၄၃၀၀ဝိ/-)ဖြစ်၍ (၃၀၀ဝိ/-)ဈေးလျော့၊ ပဲစဉ်းငုံနီ ယခင်အပတ် (၄၆၆၀ဝိ/-) ယခုအပတ် (၄၉၁၀ဝိ/-)ဖြစ်၍(၂၅၀ဝိ/-)ဈေးမြင့်၊ ပဲကြီး ယခင်အပတ် (၇၀၀၀ဝိ/-) ယခုအပတ် (၇၁၀၀ဝိ/-)ဖြစ်၍ (၁၀၀ဝိ/-)ဈေးမြင့်ကာ မြေပဲလုံးဆံ(နီ)နှင့် မြေပဲလုံး(ဖြူ)မှာ (၁)ပိဿာလျှင် ယခင်အပတ် (၅၁၀ဝိ/-) ယခုအပတ် (၅၉၀ဝိ/-)ဖြစ်၍ (၈၀ဝိ/-)ဈေးမြင့်ပြီး အရောင်းအဝယ်ပမာဏအနေဖြင့် နှမ်းဖြူ(၉၅)အိတ်၊ နှမ်းနီ(၉၀)အိတ်၊ ပဲတီစိမ်း(၂၇၀၀)အိတ်၊ ပဲစဉ်းငုံနီ(၉၅၀)အိတ်၊ မတ်ပဲ(၁၃၅)အိတ်၊ ကုလားပဲ(HL)(၉၀၀)အိတ်၊ ကုလားပဲ(မြကြေး) (၁၁၀၀)အိတ်၊ ဘိုကိတ်ပြာ(၂၈၀)အိတ်၊ ပဲကြီး(၄၇၀)အိတ်၊ မြေပဲလုံးဆံ(နီ) (၂၀၀)အိတ်၊ မြေပဲလုံးဆံဖြူ (၁၈၀)အိတ်တို့ အရောင်းအဝယ်ဖြစ်ခဲ့ကြောင်း သိရှိရပါသည်။

DOCA(မကွေး)

         သရက်မြို့နယ် ပတ်ဝန်းကျင်ကျေးရွာများမှ ထွက်ရှိသည့် ပဲမျိုးစုံသီးနှံများအနက် ပဲတီစိမ်းသီးနှံသည် နေ့စဉ်ဈေးကွက်အတွင်းသို့ ဝင်ရောက်လျက်ရှိပါသည်။ ဇွန်လ စတုတ္ထပတ်တွင် ပဲတီစိမ်းသီးနှံ တစ်တင်းလျှင် (၄၆၀၀ဝိ/) ရှိခဲ့ရာမှ၊ ယခုဇူလိုင်လ ပထမပတ်တွင် ပဲတီစိမ်း(၁)တင်းလျှင် (၄၀၀၀ဝိ/)နှုန်းဖြင့် အရောင်းအဝယ်အေးလျက်ရှိကြောင်း သိရှိရပါသည်။

          နှမ်းသီးနှံမှာလည်း စတင်ပေါ်ထွက်လျက်ရှိရာ နှမ်းနက်တစ်တင်းလျှင်(၆၅၀၀ဝိ/)၊ နှမ်းနီတစ်တင်းလျှင်(၆၀၀၀ဝိ/)ဖြင့်လည်းကောင်း အောင်လံဝယ်လက်သမားများမှစတင်၍ ဝယ်ယူလျက်ရှိပြီး နေ့စဉ်တစ်နေ့လျှင် အိတ်ရေ (၄၀-၄၅)ခန့် အ‌ရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(မကွေး)

            စားသုံးသူရေးရာဦးစီးဌာန၊ မကွေးခရိုင်ဦးစီးမှူး ဒေါ်တင်တင်လှ (လက်ထောက်ညွှန်ကြားရေးမှူး)နှင့်ဝန်ထမ်းများသည် (၁.၈.၂၀၂၂) နေ့တွင် ပြည်တွင်းကုန်သွယ်မှုကဏ္ဍ ဖွံ့ဖြိုးတိုးတက်ရေးအတွက် မကွေးမြို့၊ ဘုရားပြိုကျေးရွာရှိ မိုးနှမ်း (၅) ဧက စိုက်ပျိုးသော တောင်သူဦးထွန်းမြင့်နှင့်တွေ့ဆုံပြီး မိုးနှမ်းများစတင်ရိတ်သိမ်းမှု၊ ထွက်ရှိမှုနှင့် စျေးနှုန်းစျေးကွက်အခြေအနေများအား ကွင်းဆင်းလေ့လာမေးမြန်းခဲ့ပါသည်။

            မကွေးတိုင်းဒေသကြီး၊ မကွေးမြို့နယ်တွင် မေလဆန်းမှစတင်ကာ မိုးများရွာသွန်းခဲ့၍ တောင်သူများအနေဖြင့် မိုးနှမ်းများစတင်စိုက်ပျိုးခဲ့ရာ ယခုအချိန်တွင် မိုးနှမ်းများ စတင်ရိတ်သိမ်းလျက်ရှိကြောင်း သိရှိရပါသည်။ယခင်နှစ်တွင် မိုးရွာသွန်းမှုအနေဖြင့် ဇွန်လမှသာ မိုးစတင်ရွာသွန်းခဲ့သောလည်း ယခုနှစ်တွင် မေလဆန်းမှစတင်ကာ မိုးများစတင်ရွာသွန်းခဲ့သည့်အတွက် တောင်သူများအနေဖြင့် ယခုနှစ်တွင် မေလကုန်အတွင်း နှမ်းများကြဲပတ်စိုက်ပျိုးနိုင်ခဲ့ကြောင်း၊ နှမ်းများပေါင်းထိုးပြီး ပွင့်ဖူးဝင်ချိန် ဇွန်၊ ဇူလိုင်လများတွင်  မိုးရွာသွန်းမှုနည်းပါးခဲ့သည့်အတွက်အထွက်နှုန်းလျော့နည်းနိုင်ကြောင်း၊ သို့ရာတွင် ယခုနှစ်နှမ်းဈေးမှာ ယခင်နှစ်ကထက် နှစ်ဆနီးပါးဖြစ်၍ တောင်သူများ အထိုက်အလျောက်အမြတ်အစွန်းရနိုင်မည်ဖြစ်ကြောင်း တောင်သူဦးထွန်းမြင့်၏ပြောပြချက်အရ သိရှိရပါသည်။

            ဘုရားပြိုကျေးရွာရှိ တောင်သူအများစုမှာ စမုံနက်၊ နှမ်းဖြူများဖြစ်သည့် ခြုံကျော်၊ ရင်မနိုင်၊ ဇုန်တက်မျိုးများနှင့် နှမ်းအနီမျိုးများဖြစ်သော ခွေးလေးနီ၊ ရက် (၆၀) နှမ်းမျိုးများကို စိုက်ပျိုးကြပါကြောင်း၊ ယခုစတင်ရိတ်သိမ်းသောနှမ်းမှာ ရက် (၆၀) မျိုးဖြစ်ပါကြောင်း၊ ထွက်နှုန်းအနေဖြင့် မိုးဦးမိုးမှာ မေလကုန်အထိသာရွာသွန်းပြီး ဇွန်လနှင့်ဇူလိုင်လမှာ မိုးရွာသွန်းမှုနည်းပါးတဲ့အတွက် မိုးနှမ်းအထွက်နှုန်းမှာ (၄.၅) တင်းခန့်သာရရှိကြောင်း၊ ယခင်နှစ်က မိုးနှမ်းအထွက်နှုန်းမှာ (၆.၅) တင်းနှုန်းရရှိကြောင်း၊ ယခုနှစ်နှမ်း (၁) တင်းစျေးနှုန်းမှာ စမုံနက် (၁) တင်းကို (၇၄၀၀ဝိ/-)၊ နှမ်းနီ (၁) တင်း း(၆၀၀၀ဝိ/-)၊ နှမ်းပြာ (၁) တင်း း(၆၀၀၀ဝိ/-) နှင့် နှမ်းဖြူ (၁ )တင်း (၇၀၀၀ဝိ/-)စျေး ရသည့်အတွက် အထွက်နှုန်းနည်းပေမယ့် စျေးကောင်းရရှိသဖြင့် အကျိုးအမြတ်ရှိကြောင်း တောင်သူ ဦးထွန်းမြင့်ထံမှ သိရှိရပါသည်။

DOCA(မကွေး)

           စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် စားသုံးဆီတင်သွင်း၊ သိုလှောင် ၊ ဖြန့်ဖြူးခြင်း လုပ်ငန်းကြီးကြပ်ရေးကော်မတီကို ဖွဲ့စည်းပြီး ပြည်ပမှ တင်သွင်းလာသည့် စားသုံးဆီများ သတ်မှတ် အရည်အသွေး ၊ စံချိန်စံညွှန်းများနှင့် ပြည့်မှီစေရေး၊ စားသုံးသူပြည်သူများ ကျန်းမာရေးနှင့် ညီညွှတ်သော စားသုံးဆီများကို သုံးစွဲနိုင်ရေး၊ စျေးနှုန်းတည်ငြိမ်စွာဖြင့် ဝယ်ယူစားသုံးနိုင်ရေး ၊ စားအုန်းဆီ ကမ္ဘာ့စျေးနှုန်း ဖြစ်ပေါ်ပြောင်းလဲမှုနှင့်အညီ ပြည်တွင်း၌ဖြစ်သင့်ဖြစ်ထိုက်သည့် စျေးနှုန်းများဖြစ်ပေါ်စေရေး ထိန်းကျောင်းဆောင်ရွက်လျှက်ရှိရာ မကွေးတိုင်းဒေသကြီး၊ စားသုံးသူရေးရာဦးစီးဌာန၊  တိုင်းဒေသကြီး ဦးစီးမှူး၏လမ်းညွှန်မှုဖြင့်  (၃.၈.၂၀၂၂)ရက်နေ့နံနက် (၀၉:၀၀)နာရီတွင် မကွေးမြို့ကန်သာစျေး၌ ကုမ္ပဏီများမှ ဖြန့်ဖြူးရောင်းချပေးသောဆီများကို မကွေးမြို့ ဆီကုန်သည်များနှင့် လုပ်ငန်းရှင်များအသင်းမှ  စျေးကားဖြင့် စားအုန်းဆီ(၁)ပိဿာ (၄၀၀ဝိ/-)ကျပ်ဖြင့် လူတစ်ဦးလျှင် (၁)ပိဿာနှုန်း ရောင်းချနေမှုအား မကွေးခရိုင်ဦးစီးမှူး ဒေါ်တင်တင်လှ (လက်ထောက်ညွှန်ကြားရေးမှူး)၊ ဦးဆောင်သောအဖွဲ့မှ သွားရောက် စစ်ဆေးကြပ်မတ်ဆောင်ရွက်ခဲ့ကြောင်း သိရှိရပါသည်။

          ထိုသို့ ကွင်းဆင်းစစ်ဆေးကြီးကြပ်ရာ၌ စားသုံးသူပြည်သူများ အဆင်ပြေချောမွေ့စွာ ဝယ်ယူနိုင်ရေး စားအုန်းဆီစျေးနှုန်းနှင့် အရည်အသွေးမှန်ကန်မှုရှိစေရေး အလေးချိန်ပြည့်ဝ မှန်ကန်မှုရှိစေရေး၊ စားအုန်းဆီ ဝယ်ယူရာတွင် စနစ်တကျရှိစေရေး ကြပ်မတ်ဆောင်ရွက်ခဲ့ပါသည်။ မကွေးမြို့၊ ဆီကုန်သည်များနှင့် လုပ်ငန်းရှင်များအသင်းမှ ပြည်သူများသက်သာသောဈေးနှုန်းဖြင့် ဝယ်ယူနိုင်ရေး (၁၈.၇.၂၀၂၂)ရက်နေ့မှ (၂၃.၇.၂၀၂၂)ရက်နေ့အထိ ဈေးကားများဖြင့် ချမ်းမြေ့သာယာ၊ အေးမြသာယာ၊ ဘူတာရပ်ကွက်၊ ရန်ပယ်ဈေး၊ ရန်ကင်းဈေး၊ ဝါးတောချောင်း၊ မြင်းကင်း၊ ချောင်းဖြူ၊ သန်းတောကုန်း ကျေးရွာများတွင် ရောင်းချပေးခဲ့ကြောင်း သိရှိရပါသည်။ ပြင်ပတွင်စားအုန်းဆီဈေးနှုန်းကြီးမြင့်နေချိန် နိုင်ငံတော်အစိုးရနှင့် ဆီလုပ်ငန်းရှင်တို့၏ ပူးပေါင်းစီစဉ်မှုဖြင့် စားအုန်းဆီများကို သက်သာသောဈေးနှုန်း ဖြင့် ရောင်းချပေးခဲ့မှုအပေါ် မကွေးမြို့ပြည်သူများမှ အထူးကျေးဇူးတင် ဝမ်းမြှောက်လျှက်ရှိကြကြောင်း သိရှိရပါသည်။

DOCA(မကွေး)

          စစ်ကိုင်းတိုင်းဒေသကြီး၊ တမူးခရိုင်၊ တမူးမြို့၊ နယ်စပ်ကုန်သွယ်ရေးစခန်းမှ ( ၇/၂၀၂၂ ) လ အတွင်း ပို့ကုန် အမေရိကန်ဒေါ်လာသန်း ( ၀.၇၇၅ )၊ သွင်းကုန် အမေရိကန်ဒေါ်လာသန်း ( ၀.၈၁၂ ) စုစုပေါင်း အမေရိကန် ဒေါ်လာသန်း ( ၁.၅၈၇ ) အမေရိကန်ဒေါ်လာ ရှိခဲ့ပြီး၊ ပို့ကုန်ပစ္စည်းများ အနေဖြင့် စီးကရက်၊ နန်းဖာလုံကုန်စုံများ၊ ကွမ်းသီးနှင့် မက်မွန်သီးများဖြစ်ကြပြီး သွင်းကုန် အနေဖြင့် ဓါတ်မြေသြဇာ၊ ဂျုံမှုန့်၊ ဆံပင်များ ဖြစ်ပါသည်။ ဇူလိုင်လအတွင်း နယ်စပ်ကုန်သွယ်ရေး စခန်းမှ ပို့ကုန်လျာထားချက်အနေဖြင့် အမေရိကန်ဒေါ်လာ ၄.၃၀၀ သန်း ဖြစ်ပြီး အမှန်တကယ် ပို့ကုန်အနေဖြင့် အမေရိကန်ဒေါ်လာ ၀.၇၇၅ သန်း တင်ပို့နိုင်ခဲ့သည့်အတွက် လျာထားချက်ထက် အမှန်တင်ပို့နိုင်မှုမှာ ရာခိုင်နှုန်းအနေဖြင့် ၁၈.၀၂ % သာ ရှိခဲ့ပါသည်။ သွင်းကုန်လျာထားချက်အနေဖြင့် အမေရိကန်ဒေါ်လာ ၀.၂၀၀ သန်း ဖြစ်ပြီး အမှန်တကယ် တင်သွင်းနိုင်မှုအနေဖြင့် အမေရိကန်ဒေါ်လာ ၀.၈၁၂ သန်း အမှန်တင်သွင်း နိုင်ခဲ့ပြီး ရာခိုင်နှုန်းအနေဖြင့် ၄၀၆.၀၀%  ရှိခဲ့ပါသည်။ ဇူလိုင်လအတွင်း ပို့ကုန်ပမာဏထက် သွင်းကုန်ပမာဏပိုမိုခဲ့ကြောင်း သတင်းရရှိပါသည်။

DOCA(စစ်ကိုင်း)