ပြည်တွင်းကုန်သွယ်မှုသတင်း

         မကွေးတိုင်းဒေသကြီး၊ သရက်ခရိုင်၊ သရက်မြို့နယ်၊ ပျဉ်‌ထောင်အုပ်စု၊ ကျောက်အိုင်ကျေးရွာတွင်နေထိုင်ကြသော တောင်သူအများစုမှာ ရာသီအလိုက်ထွက်ရှိသော သီးနှံများအနက်မှ စားဖိုဆောင်သီးနှံဖြစ်ပြီး ဈေးကွက်တွင်လည်း အရောင်းအဝယ်ကောင်းသည့် ပန်းဂေါ်ဖီကို မိသားစု တနိုင်တပိုင် စိုက်ပျိုးလျက် ရှိကြပါသည်။

          ပန်းဂေါ်ဖီကို ဩဂုတ်လတွင် ပျိုးထောင်ပြီး စက်တင်ဘာလတွင် စတင်စိုက်ပျိုးပါကြောင်း၊ စိုက်ပျိုးချိန် (၃)လအကြာ နိုဝင်ဘာလတွင် ခူးဆွတ်လေ့ရှိကြပါကြောင်း၊ စိုက်နည်းစနစ်မှာ (၁)ပင်နှင့် (၁)ပင်ကြား (၁)ပေစီခွာ၍ စိုက်ရပါကြောင်း၊ စိုက်ပျိုးဧက(၀.၂၅)ဧကရှိပြီး ကျင်းတူး၍ စိုက်ပျိုးရသဖြင့် စိုက်ပျိုးရသည့်ကျင်းအရေအတွက်မှာ ကျင်းပေါင်း(၁၂၀)ဖြစ်ပါကြောင်း၊ (၁)ကျင်းလျှင် (၁၅)ပင်စိုက်ပျိုးရပြီး၊ အထွက်နှုန်းအနေဖြင့် (၀.၂၅)ဧကလျှင် အပင်ပေါင်း (၁၇၀၀)ခန့်ထွက်ရှိပါကြောင်း၊ (၁၅)ရက်လျှင် (၁)ကြိမ်ခူးဆွတ်ရပြီး (၁)ကြိမ်ခူးလျှင် အပွင့်ရေ ပျမ်းမျှ(၁၀၀)ရရှိပါကြောင်း၊ ပျိုးခင်းပြုပြင်ခ၊ မျိုးဘိုး၊ ထွန်ယက်ခ၊ ပိုးသတ်ဆေး၊ ဓါတ်မြေဩဇာနှင့် ရေသွင်းခြင်းစသည့် စုစုပေါင်းကုန်ကျစရိတ်မှာ ကျပ်(၃)သိန်းခန့် ကုန်ကျပြီး ပန်းဂေါ်ဖီ (၁)ပွင့်လျှင် ကျပ်(၅၀၀)ဖြင့် ဖောက်သည်ပေးရ၍ ကျပ်(၈)သိန်းခွဲ ပြန်လည်ရရှိသဖြင့် အကျိုးအမြတ်အနေဖြင့် ကျပ်(၅)သိန်းခွဲရရှိပါကြောင်း၊ စိုက်ပျိုးပြီး ရရှိလာသောပန်းဂေါ်ဖီများအား သရက်မြို့၊ မြို့မဈေးနှင့် အခွန်လွတ်ဈေးများတွင် ရောင်းချကြကြောင်း ကျောက်အိုင်ကျေးရွာမှ ပန်းဂေါ်ဖီစိုက် တောင်သူ ဦးစိန်ဌေးထံမှ သိရှိရပါသည်။

DOCA(မကွေး)

     ကရင်ပြည်နယ်တွင်၂၀၂၂ ခုနှစ်အတွင်း စိုက်ပျိုးသည့်မြေပဲများစတင်ထွက်ရှိကာ ဘားအံမြို့နယ် အတွင်းရှိမြေပဲရောင်းဝယ်ရေး လုပ်ငန်းရှင်ပွဲရုံများသို့ နေ့စဉ်လှိုင်လှိုင်ဝင်ရောက်လျက်ရှိပြီး မြေပဲ အစိုတစ်တင်းလျင် ပျမ်းမျှ ၂၂၀၀၀ ကျပ်ဈေးနှုန်းဖြင့် ဝယ်ယူရောင်းဝယ်လျက်ရှိကြောင်း ယခုနှစ် ဆောင်းမြေပဲမှာ တစ်ဧက ပျမ်းမျှအထွက် ၃၅ တင်း ထွက်ရှိပြီး တစ်ဧက စိုက်ပျိုးထုတ်လုပ်မှု ကုန်ကျစရိတ်မှာ ၄၀၀၀၀၀ ကျပ်ခန့်ရှိသဖြင့် တစ်ဧကအကျိုးအမြတ်မှာ ၃၀၀၀၀၀ ကျပ်ခန့်ရရှိသောကြောင့် ယခုနှစ်တွင်တောင်သူများ အကျိုးအမြတ်ပိုမိုရရှိကြောင်းနှင့်အဆိုပါ မြေပဲများအား ဘားအံမှတဆင့်မြဝတီ၊ ထိုင်းသို့လည်းကောင်း၊ ဘားအံမှ မော်လမြိုင်သို့လည်းကောင်း တင်ပို့လျက် ရှိကြောင်း ကုန်သည်များထံမှ စုံစမ်းသိရှိရပါသည်။

DOCA (ကရင်)

    ရှမ်းပြည်နယ်(မြောက်ပိုင်း)အတွင်းတွင် ကြံစိုက်ဧက (၁၃၈၅၂၃)ရှိပြီး ကြံများ စတင် ရိတ်သိမ်းနေပြီ ဖြစ်ကြောင်း သိရှိရပါသည်။ ကြံစိုက်တောင်သူများအား ငွေရည်ပုလဲကုမ္ပဏီမှ မျိုးနှင့် သွင်းအားစုများအား ကြိုတင်ထုတ်ပေးပြီး ကြံပေါ်ချိန်ရောက်မှသာ ပြန်လည်ပေးသွင်းရကြောင်း သိရှိရပါသည်။ ယခင်နှစ် ကြံရာသီတွင် တစ်တန်လျှင် (၆၅၀၀၀/-)နှုန်းရရှိပြီး ယခုနှစ် ကြံတစ်တန် စက်ရုံအရောက်ဈေးမှာ ကျပ်(၉၀၀၀၀/-) ဖြစ်ပါသည်။ ယခုနှစ် ပေါက်ဈေးဖြင့် တွက်ချက်လျှင် ကြံတစ်ဧကလျှင် ပထမနှစ်တွင် အထွက်နှုန်း တန်(၄၀ မှ ၅၀)ကြား ထွက်ရှိပြီး စိုက်ပျိုးစရိတ် ကျပ်(၂၂၅၀၀၀၀/-)ခန့်ကုန်ကျကာ အမြတ်ကျပ် (၁၃၅၀၀၀၀/-)ခန့်ရရှိကြောင်း၊ ဒုတိယနှစ်တွင် မျိုး၊ ပလပ်စတစ်နှင့် ထွန်ယက်ခမှာ မလိုအပ်တော့သဖြင့် စိုက်ပျိုးစရိတ်မှာ (၁၂၇၆၀၀၀/-)ခန့်သာ ကုန်ကျပြီး တစ်ဧက အထွက်နှုန်း တန်(၄၀ မှ ၅၀ ကြား)ထွက်ရှိသဖြင့် တစ်ဧကအမြတ် ကျပ်(၂၃၂၀၀၀၀/-)ခန့် ရရှိကြောင်း၊ တတိယနှစ်တွင် ဒုတိယနှစ်နှင့်စိုက်ပျိုး ကုန်ကျစရိတ် တူသော်လည်း အထွက်နှုန်းမှာ တစ်ဧကလျှင် တန်(၂၅ မှ ၃၀ ကြား)သာထွက်ရှိတော့သဖြင့် တစ်ဧကအမြတ်မှာ (၁၄၂၀၀၀၀/-)ခန့်သာ ရရှိကြောင်းသိရှိရပါသည်။ လားရှိုးမြို့နယ်အတွင်းရှိ ထွက်ရှိသော ကြံများအား ငွေရည်ပုလဲကုမ္ပဏီရှိ မိုင်းရယ်သကြားစက်သို့လည်းကောင်း၊ ကျောက်မဲ မြို့နယ်၊ သီပေါမြို့နယ်နှင့်နောင်ချိုမြို့နယ်ရှိ ထွက်ရှိသောကြံများအား ငွေရည်ပုလဲကုမ္ပဏီရှိ ဆမ္မဆယ်သကြားစက်နှင့် အင်းဝိုင်းသကြားစက်များသို့လည်းကောင်း ရောင်းချကြောင်း သိရှိရပါသည်။

DOCA(ရှမ်း)

     စားသုံးသူရေးရာဦးစီးဌာန မကွေးတိုင်းဒေသကြီး၊ မင်းဘူးခရိုင်ဦးစီးမှူးရုံး၊ စလင်းမြို့နယ် တာဝန်ခံ ဦးဆန်းလင်းမောင် (ဦးစီးမှူး)နှင့်အဖွဲ့သည် (၂၂.၁.၂၀၂၃)ရက်နေ့ နံနက်(၁၀:၀၀)နာရီတွင် ဖောင်လင်းကျေးရွာရှိ ဆောင်းငရုတ်သီး စိုက်ပျိုးသော တောင်သူဦးကျော်နိုင်နှင့်တွေ့ဆုံ၍ စိုက်ပျိုး ထုတ်လုပ်မှု၊ ရောင်းဝယ်မှုအခြေအနေများအား ကွင်းဆင်းလေ့လာခဲ့ပါသည်။

    တောင်သူအနေဖြင့် ယခုနှစ်တွင် ဆောင်းငရုတ်(၃) ဧက စိုက်ပျိုးထားပါကြောင်း၊ ယခင်နှစ်က (၂)ဧကစိုက်ပျိုးခဲ့ပြီး အထွက်နှုန်း‌ကောင်း၍ ငရုတ်သီး(စို) တစ်ပိဿာလျှင် ကျပ်(၁၄၀ဝ) ရရှိခဲ့ ပါကြောင်း၊ ဆောင်းငရုတ်ကို နှစ်စဉ် စက်တင်ဘာလတွင် ပျိုးထောင်ကြပါကြောင်း၊ ပျိုးထောင်ပြီး (၃၅) ရက်သားတွင် စတင်စိုက်ပျိုး၍ စိုက်ပျိုးရာတွင် ပင်ကြား(၂)ပေ၊ တန်ကြား (၃)ပေအကွာ စိုက်ပျိုးကြပြီး တောင်သူများအနေဖြင့် ကျောက်စိမ်း(စပ်မျိုး)692  ငရုတ်မျိုးများကို အများဆုံး စိုက်ပျိုးကြပါကြောင်း၊ နောက်(၃)လခန့်အကြာတွင် စတင်ခူးဆွတ်ရပြီး (၁)ဧကလျှင် (၈)ကြိမ်ခန့် ခူးဆွတ်ရပါကြောင်း၊ (၁)ကြိမ်လျှင် (၂၅၀)ပိဿာခန့်ခူးဆွတ်ရပြီး စုစုပေါင်း(၁၈၀၀)ပိဿာခန့် ခူးဆွတ် ရရှိပါကြောင်း၊ ယခုနှစ်တွင် မိုးရာသွန်းမှုနည်းပါးခြင်း၊ ပိုးမွှားများကျရောက်မှုများပြားခြင်းတို့ကြောင့် ငရုတ်သီးအထွက်နှုန်း ယခင်နှစ် အောက်လျော့နည်းခဲ့ကြောင်း၊ မြေပြင်မျိုးစိုက်ပျိုးခြင်း၊ သွင်းအားစု၊ လုပ်အားခအပါအဝင် (၁)ဧက ကုန်ကျစရိတ် ကျပ်သိန်း (၃၀) ခန့်ကုန်ကျပြီး ငရုတ်သီး(စို) (၁)ပိဿာ လျှင်ဇန်နဝါရီလဆန်း သီးနှံပေါ်ချိန်တွင် ကျပ်(၂၅၀ဝ)ဖြင့် ရောင်းချရသဖြင့် ဝင်ငွေ ကျပ်(၄၅၀၀၀၀၀) ထိ ရရှိကာ အကျိုးအမြတ်အနေဖြင့် (၁)ဧကလျှင် ကျပ်(၁၅၀၀၀၀ဝ)ခန့် ရရှိကြောင်း၊ ထွက်ရှိလာ သော ငရုတ်သီးမှည့်အစိုများကို တောင်သူများအနေဖြင့် မြို့ပေါ်ရှိ ပွဲရုံများသို့ သွားရောက် ရောင်းချကြသလို ပွဲစားများကလည်း ကျေးရွာအရောက် လာရောက်ဝယ်ယူလျက်ရှိရာ ဆောင်း ငရုတ်သီးစိုက်တောင်သူများ အဆင်ပြေလျက်ရှိပြီး ဝင်ငွေတိုးပွားလျက်ရှိကြောင်း ‌ဆောင်းငရုတ် စိုက်ပျိုးသည့် တောင်သူဦးကျော်နိုင်ထံမှ သိရှိရပါသည်။

DOCA(မကွေး)

           မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့နယ်ရှိ မြို့မစည်ပင်ဈေးနှင့် ပန်းခြံဈေးတို့တွင် ဒေသတွင်းမြစ်ခြေ၊ ကမ္မမြို့နယ်များမှထွက်ကုန်များအပြင် ပခုက္ကူမြို့နယ်အတွင်းရှိ ကျွန်းများ၊ ရှမ်းပြည်(သီပေါ/အင်းလေး)ထွက်ကုန်များ၊ ကျောက်ပန်းတောင်းနှင့် ပုပ္ပါးနယ်များမှ ထွက်ကုန်များဖြင့် ရောင်းဝယ်ဖောက်ကားလျက်ရှိသော ဈေးဖြစ်ပါသည်။

     အဆိုပါဈေးတွင် ဇန်နဝါရီလ(၁၇)ရက်မှ(၂၃)ရက်နေ့ထိ အရောင်းအဝယ်ဖြစ်နေသည့် ဈေးနှုန်းများမှာ စားဖိုဆောင်သီးနှံများဖြစ်သော ငရုတ်သီးခြောက်(ရှည်) (၁)ပိဿာလျှင် ကျပ်(၁၇၀၀၀/ ၁၈၀၀၀)၊ ငရုတ်သီးခြောက်(ပု) (၁)ပိဿာလျှင် ကျပ်(၂၀၀၀၀)၊ ကြက်သွန်နီ(၁)ပိဿာလျှင် ကျပ် (၂၂၀၀ မှ ၂၅၀၀)၊ ကြက်သွန်ဖြူ ရှမ်းစ(၁)ပိဿာလျှင် ကျပ်(၆၀၀၀ မှ ၇၀၀၀)၊ ကြက်သွန်ဖြူ (ကြူကုတ်) (၁)ပိဿာလျှင် ကျပ်(၄၅၀၀ မှ ၅၀၀၀)၊ ဂျင်းတက် (၁)ပိဿာလျှင် ကျပ်(၁၇၀၀ မှ ၁၈၀၀)၊ ဆား (၁)ပိဿာလျှင် ကျပ်(၅၀၀ မှ ၅၅၀)၊ မန်းကျည်းမှည့်အစေ့လွှတ် (၁)ပိဿာလျှင် ကျပ် (၄၀၀၀ မှ ၄၅၀၀)၊ မြေပဲဆံ(အသစ်) (၁)ပြည်လျှင် ကျပ်(၆၀၀၀ မှ ၆၅၀၀)၊ ကုလားပဲခြမ်း (၁)ပြည် လျှင် ကျပ်(၅၅၀၀ မှ ၅၆၀၀)၊ အာလူး (၁)ပိဿာလျှင် ကျပ်(၂၄၀၀ မှ ၂၅၀၀)၊ ဂေါ်ဖီထုပ်(၁)ထုပ် လျှင် ကျပ်(၈၀၀ မှ  ၁၀၀၀)၊ ပန်းမုန်လာ (၁)ပွင့်လျှင် ကျပ်(၅၀၀ မှ ၁၀၀၀)၊ ခရမ်းချဉ်သီး(၁)ပိဿာလျှင် ကျပ်(၂၀၀၀ မှ ၂၂၀၀)၊ ပဲတောင့်ရှည် (၁)ပိဿာလျှင် ကျပ်(၁၈၀၀ မှ ၂၀၀၀)၊ ပဲရာဇာ/ပဲနီလေး (၁)ပြည်လျှင် ကျပ်(၈၅၀၀ မှ ၉၀၀၀) ဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(မကွေး)