ပုသိမ်ခရိုင်၊ တရားမဝင်ကုန်သွယ်မှုတိုက်ဖျက်ရေးအထူးအဖွဲ့က ပုသိမ်မြို့နယ်အတွင်း Shopping Mall , Mini Mart များနှင့် ဓာတ်မြေသြဇာ၊ ပိုးသတ်ဆေးအရောင်းဆိုင်၊ စက်သုံးဆီအရောင်းဆိုင်၊ ဆိုင်ကယ်အရောင်းဆိုင်၊ ယစ်မျိုး (အရက်ဆိုင်) များ၊ မိုဘိုင်းဖုန်းဆိုင်များ၊ လူသုံးကုန်ပစ္စည်းဆိုင်များ၊ စားသောက်ကုန်ဆိုင်များ၊ စက်ဆီ/ချောဆီဆိုင်များ၊ လျှပ်စစ်ပစ္စည်းအရောင်းဆိုင်များ၊ ဆေးဝါးနှင့်အလှကုန်အရောင်းဆိုင်များတွင် ရောင်းချနေသောလုပ်ငန်းရှင်များအား တရားမဝင်ဝင်ရောက်လာသည့်ကုန်စည်များအား ရောင်းချခြင်းမပြုလုပ်စေရေးအတွက် အသိပညာပေးဆွေးနွေးပွဲကို (၂၀-၆-၂၀၂၃) ရက်နေ့၊ မွန်းလွဲ (၁၄:၀၀) နာရီအချိန်တွင် ပုသိမ်မြို့နယ်၊ မြို့နယ်အထွေထွေအုပ်ချုပ်ရေးဦးစီးဌာန၏ အစည်းအဝေးခန်းမ၌ ကျင်းပပြုလုပ်ခဲ့ပါသည်။
ခရိုင်တရားမဝင်ကုန်သွယ်မှုတိုက်ဖျက်ရေးအဖွဲ့ဥက္ကဋ္ဌ၊ ဦးလင်းကိုကိုက တိုင်းနှင့်ပြည်နယ်များတွင် တရားမဝင်ကုန်သွယ်မှုများကျဆင်းပြီး ဒေသတွင်းလုပ်ငန်းများရေရှည်ရပ်တည်နိုင်ရေး၊ ယှဉ်ပြိုင်နိုင်စွမ်းရှိစေရေး၊ ကုန်သည်များ တရားဝင်ကုန်သွယ်မှုလမ်းကြောင်းပေါ်သို့ရောက်ရှိပြီး နယ်စပ်ကုန်သွယ်မှုပမာဏတိုးတက်လာရေး၊ နိုင်ငံတော်အတွက် ရသင့်ရထိုက်သည့်အခွန်အခများရရှိပြီး တရားမဝင်ကုန်စည်နှင့် ကုန်သွယ်မှုများကို ထိရောက်စွာတားဆီးနိုင်ရေးတို့အတွက် စီးပွားရေးလုပ်ငန်းရှင်များအား ယခုကဲ့သို့အသိပညာပေးဟောပြောပွဲကျင်းပရခြင်းဖြစ်ကြောင်း အဖွင့်အမှာစကားပြောကြားခဲ့ပါသည်။
ဆက်လက်၍ စားသုံးသူရေးရာဦးစီးဌာနမှ ခရိုင်ဦးစီးမှူး၊ ခရိုင်တရားမဝင်ကုန်သွယ်မှုတိုက်ဖျက်ရေးအထူးအဖွဲ့မှ အတွင်းရေးမှူး ဦးတင်စိုးလှိုင်က တရားမဝင်တင်သွင်းလာသော ကုန်စည်များနှင့်စပ်လျဉ်း၍ Power Point ဖြင့် အသိပညာပေးရှင်းလင်းခဲ့ပြီး အဆိုပါအခမ်းအနားသို့ ခရိုင်တရားမဝင်ကုန်သွယ်မှုတိုက်ဖျက်ရေးအထူးအဖွဲ့ဝင် ဌာနဆိုင်ရာ (၈) ဦးနှင့် မြို့ပေါ်ရှိ စီးပွားရေးလုပ်ငန်းရှင် (၅၅) ဦး၊ စုစုပေါင်း (၆၃) ဦးတက်ရောက်ခဲ့ကြောင်းသိရှိရပါသည်။
DOCA(ဧရာဝတီ)