ဧရာဝတီတိုင်းဒေသကြီး၊ မအူပင်ခရိုင်၊ ပန်းတနော်မြို့နယ်၊ မြို့မဈေးအတွင်း ရောင်းချနေသော ပဲပြား၊ ပဲသွေး၊ ကုန်စိမ်း၊ အသားငါးများတွင် ခွင့်မပြုထားသော ဓာတုတာရှည်ခံဈေးများပါဝင်မှုရှိ/မရှိကို (၂၀-၆-၂၀၂၃) ရက်နေ့၊ နံနက် (၀၉း၀၀) နာရီအချိန်တွင် ကွင်းဆင်းစစ်ဆေးခဲ့ကြပါသည်။
အဆိုပါကွင်းဆင်းစစ်ဆေးမှုတွင် မြို့နယ်အစားအသောက်နှင့်ဆေးဝါးကွပ်ကဲရေးဦးစီးဌာနမှ တာဝန်ရှိသူများ၊ မြို့နယ်အစားအသောက်နှင့်ဆေးဝါးကြီးကြပ်ကွပ်ကဲရေးကော်မတီအဖွဲ့ဝင်များနှင့် မြို့နယ်စားသုံးသူရေးရာဦးစီးဌာနမှ မြို့နယ်ဦးစီးမှူး ဦးပိုးဖြူပိုင်မင်းတို့ပူးပေါင်း၍ ပန်းတနော်မြို့မဈေးအတွင်း ရောင်းချနေသောအခြေခံစားသောက်ကုန်စည်များ၊ ပဲပြား၊ ပဲသွေး၊ ကုန်စိမ်း၊ အသားငါးများ၊ မျှစ်၊ မုန့်ဖက်၊ ခေါက်ဆွဲဖက်နှင့် ပဲပင်ပေါက်တို့ကို နမူနာကောက်ယူ၍ ခွင့်မပြုထားသောဓာတုတာရှည်ခံများပါဝင်ခြင်းရှိ/မရှိကိုစစ်ဆေးခဲ့ရာ တာရှည်ခံဆေးအသုံးပြုထားခြင်းမရှိကြောင်း စစ်ဆေးတွေ့ရှိခဲ့ကြပါသည်။ စားသုံးသူရေးရာဦးစီးဌာနမှ တာဝန်ရှိသူက စားသုံးသူများလိုအပ်ချက်အရ ဝယ်ယူအသုံးပြုလိုက်သော ကုန်စည်များသည် စားသုံးသူကိုဘေးအန္တရာယ်ဖြစ်ခြင်း၊ စားသုံးသူအခွင့်အရေးထိခိုက်နစ်နာမှုဖြစ်ပေါ်ပါက စားသုံးသူအခွင့်အရေးအရ အရေးဆိုတိုင်ကြားနိုင်သည့်အတွက် ဘေးအန္တရာယ်ရှိသောကုန်စည်ကို ဈေးကွက်အတွင်းမှ ပြန်လည်သိမ်းဆည်းခြင်း သို့မဟုတ် ရောင်းချဖြန့်ဖြူးမှုများကို တားမြစ်ခြင်းနှင့်စပ်လျဉ်း၍ အရေးယူဆောင်ရွက်နိုင်ကြောင်း၊ အရေးယူဆောင်ရွက်မှုကို စားသုံးသူထံ မှန်ကန်သောသတင်းအချက်အလက်များဖြင့် သတ်မှတ်ထုတ်ပြန်ရမည်ဖြစ်ကြောင်းကို လုပ်ငန်းရှင်များသိရှိရန် ပညာပေးခဲ့ကြောင်းသိရှိရပါသည်။
DOCA(ဧရာဝတီ)