စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ပြည်နယ်ဦးစီးမှူးနှင့် ဝန်ထမ်းများသည် ၁၂.၁၂.၂၀၂၁ ရက်နေ့၊ နံနက် (၁၀:၀၀)နာရီအချိန်တွင် ပြည်တွင်းကုန်သွယ်မှုဖွံ့ဖြိုးတိုးတက်ရေးအတွက် ဘားအံမြို့၊ အမှတ်(၁)ရပ်ကွက်၊ ထုံးအိုင်စံပြကျေးရွာတွင် ဒေသခံတောင်သူများနှင့် တောင်သူနှင့်စီးပွားရေးလုပ်ငန်းရှင်တို့ အကျိုးတူပူးပေါင်းဆောင်ရွက်သည့် Contract Farming စနစ်ကျင့်သုံးနိုင်ရေး ဆွေးနွေးပွဲအခမ်အနားကို ကျင်းပပြုလုပ်ခဲ့ပါသည်။
ဆွေးနွေးပွဲတွင် ကရင်ပြည်နယ် ဆန်စက်လုပ်ငန်းရှင်များအသင်း ဥက္ကဌ ဦးအောင်ဇော်ထက်က မိတ်ဆက်စကားပြောကြားခဲ့ပြီး ကရင်ပြည်နယ် စားသုံးသူရေးရာဦးစီးဌာန ပြည်နယ်ဦးစီးမှူးက စားသုံးသူရေးရာဦးစီးဌာန၏ သမိုင်းကြောင်း၊ စားသုံးသူအခွင့်အရေးများ၊ စီးပွားရေးလုပ်ငန်းရှင်များ၏ လိုက်နာရမည့် စည်းကမ်းချက်များ၊ စားသုံးသူများ ထိခိုက်နစ်နာမှုရှိက ထိခိုက်နစ်နာမှုများကို စားသုံးသူနှင့် စီးပွားရေးလုပ်ငန်းရှင်ကြား စေ့စပ်ညှိနှိုင်းဖြေရှင်းမှုများအား စီမံခန့်ခွဲရေးနည်းလမ်းဖြင့် အရေးယူဆောင်ရွက်ပေးမှုများ၊ ကုန်စည်နှင့်ဝန်ဆောင်မှုများပေါ်တွင် စားသုံးသူများ လုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးမှုများကို စဉ်ဆက်မပြတ် ဆောင်ရွက်လျက်ရှိကြောင်း၊ စားသုံးသူကာကွယ်ပေးရေးအသိပညာပေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးတိုးတက်လာစေရန်အတွက် အသင်းအဖွဲ့များ ဖွဲ့စည်းဆောင်ရွက်လျက်ရှိကြောင်း၊ သီးနှံအမယ်သစ်များဖော်ထုတ်ခြင်း၊ တွက်ချေကိုက်မှု/ အကျိုးဖြစ်ထွန်းမှုအခြေအနေများ ကွင်းဆင်းလေ့လာဆောင်ရွက်လျက်ရှိကြောင်း၊ ဒေသထွက်ကုန်များ ဈေးကောင်းရရှိရန်လိုအပ်ကြောင်း၊ အထွက်နှုန်းများများထွက်ပြီး ဈေးကောင်းရရှိဖို့ လိုအပ်ကြောင်း၊ သမရိုးကျနည်းများဖြင့် စိုက်ပျိုးလျှင် အထွက်နှုန်းနည်းသဖြင့် မျိုးကောင်း၊ မျိုးသန့်များ စိုက်နည်းစနစ်များ ပြောင်းလဲစိုက်ပျိုးစေလိုကြောင်း၊ ရန်ကုန်၊ ဧရာဝတီ၊ ပဲခူး၊ စစ်ကိုင်းတိုင်းများတွင် မျိုးကောင်း၊ မျိုးသန့်များ ပြောင်းလဲစိုက်ပျိုး၍ အထွက်နှုန်း ပိုမိုတိုးတက်လာကြောင်း ဆွေးနွေးခဲ့ပါသည်။
ဆက်လက်၍ ပြည်တွင်းကုန်သွယ်မှုနှင့်ပတ်သက်ပြီး အမျိုးသားပို့ကုန်မဟာဗျူဟာ NES တွင်ပါဝင်သော ဒေသထွက်ပြည်ပပို့ကုန်များနှင့် အမယ်သစ်သီးနှံများအကြောင်း ရှင်းလင်း ဆွေးနွေးခဲ့ပါသည်။ ထို့နောက် ပြည်နယ်ဦးစီးမှူးမှ Contract Farming စနစ် ဆောင်ရွက် ရာတွင် လိုက်နာရန် လုပ်ထုံးလုပ်နည်းများအကြောင်းရှင်းပြပြီး Contract Farming စနစ် ဆောင်ရွက်ခြင်းဖြင့် ရရှိလာမည့် အကျိုးကျေးဇူးများအကြောင်း၊ Contract Farming စနစ် ဆောင်ရွက်ကြစေလိုကြောင်း တိုက်တွန်းပြောကြားခဲ့ပါသည်။ ထို့နောက် ဆွေးနွေးပွဲသို့ တက်ရောက်လာကြသည့် ဒေသခံတောင်သူများမှ Contract Farming စနစ် နှင့် ပတ်သက်၍ သိလိုသည့်အခြေအနေများကို ဆွေးနွေးခဲ့ကြပြီး ဆွေးနွေးပွဲကို နေ့လည် (၁၂:၃၀)နာရီတွင် ရုတ်သိမ်းခဲ့ကြောင်း သတင်းရရှိပါသည်။
စားသုံးသူရေးရာဦးစီးဌာန(ကရင်ပြည်နယ်)