ပဲခူးတိုင်းဒေသကြီး၊ ပဲခူးခရိုင်၊ ပဲခူးမြို့နယ်အတွင်းရှိ တောင်သူလယ်သမားများ အနေဖြင့် ဆောင်းသီနှံမျိုးစုံကို လယ်နားချိန်ကာလ၌ စိုက်ပျိုးလျက်ရှိရာ ပဲခူးမြို့နယ်၊ မုန်တိုင်း ကျေးရွာတွင် ခရမ်းသီးနှံစိုက် တောင်သူများအောင်မြင်ဖြစ်ထွန်းပြီး နေ့စဉ် ဆွတ်ခူး ရောင်းချနေရသဖြင့် အပိုဝင်ငွေ ရရှိကာမိသားစုစားဝတ်နေရေး အဆင်ပြေလျက် ရှိကြောင်း သိရသည်။
အဆိုပါ ခရမ်းသီးနှံကို တစ်ဧကလျှင် မျိုးစေ့(၃၀၀)ဂရမ်နှုန်းဖြင့်ပျိုးနိုင်ကြောင်း၊ တစ်ပင်နှင့် တစ်ပင် ငါးပေခြား စိုက်ပျိုး၍ ရေသွင်း ရေထုတ်လွယ်ကူစေရန် မြေဘောင် များ ပြုလုပ်ပေးရသည်။ အပင်ငယ်ချိန်တွင် မြေ ပေါင်းသင်ပေးကာ တစ်လတစ်ကြိမ် အပင် ခြေများတွင် မြေသြဇာအနည်းငယ်မျှ ထည့်ရပြီး လိုအပ်ပါက အပင်အားဖြည့်ဆေး နှင့်ပိုးသတ်ဆေး ဖြန်းပေးရကြောင်း၊ စတင်စိုက်ပျိုးသည့် အချိန်မှစ၍ စတင်ခူးဆွတ်နိုင် သည့်ကာလမှာအချိန် (၃)လခန့်ကြာမြင့်ပြီး ဆွတ်ခူး ရောင်းချသည့်အခါ ရက်ခြားခူး၍ ရောင်းရသကဲ့သို့ နေ့စဉ်ဆွတ်ခူး၍ လည်းရောင်းချရကြောင်း၊ ရင်းနှီးမြှုပ်နှံရသည့် (မျိုးစေ့၊ ပိုးသတ်ဆေး၊ အလုပ်သမား ငှားရမ်းခနှင့် ဓာတ်မြေသြဇာ)စသည့်ကုန်ကျစရိတ်များမှာ စုစုပေါင်း တစ်ဧကလျှင် ကျပ်နှစ်သိန်း ဝန်းကျင်ခန့်ရှိပြီး ရောင်းစျေးအနေဖြင့် ဖောက်သည် စျေး ၁ပိဿာ ကျပ်၈၀၀ မှ ၁၀၀၀ အထိ ရောင်းချရသည့်အတွက် နေ့စဉ်အပိုဝင်ငွေရရှိကာ မိသားစုစားဝတ်နေရေး အဆင်ပြေလျက်ရှိကြောင်း ခရမ်းသီးနှံစိုက်တောင်သူ တစ်ဦးထံမှ သိရှိရပါသည်။