မကွေးတိုင်းဒေသကြီး၊ ချောက်ခရိုင်၊ ချောက်မြို့၊ လူထုအခြေပြုဗဟိုဌာန (Community Centre) ခန်းမ၌ ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပညာရေးဌာနတို့ပူးပေါင်း၍ ၂၀၂၄ခုနှစ်၊ ဇန်နဝါရီလ(၄)ရက်နေ့တွင် ကျရောက်မည့် (၇၆) နှစ်မြောက် လွတ်လပ်ရေးနေ့အကြို အထိမ်းအမှတ်ဟောပြောပွဲနှင့် ကျပန်းစကားပြောပြိုင်ပွဲကို (၃-၁-၂၀၂၄) ရက်နေ့၊ နံနက်(၀၉:၃၀)နာရီအချိန်တွင် ကျင်းပပြုလုပ်ခဲ့သည်။
ရှေးဦးစွာ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးအရာရှိ ဒေါ်သိမ့်ဝါက လွတ်လပ်ရေးနေ့ နှစ်စဉ်ကျင်းပရခြင်း၏ ရည်ရွယ်ချက်များ၊ လွတ်လပ်ရေးကြိုးပမ်းမှုသမိုင်းကြောင်းအားလည်းကောင်း၊ အမှတ်(၁)၊ အခြေခံပညာမူလတန်းကျောင်းမှ ကျောင်းအုပ်ဆရာကြီး ဦးအေးလွင်က လွတ်လပ်ရေးနေ့အကြောင်းသိကောင်းစရာများကိုလည်းကောင်း၊ မြို့နယ်စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်မြတ်မြတ်မိုးက စားသုံးရန်မသင့်သော အစားအစာများအကြောင်းကိုလည်းကောင်း အသီးသီးဟောပြောခဲ့ကြသည်။
ဆက်လက်၍ ကျပန်းစကားပြောပြိုင်ပွဲကိုကျင်းပခဲ့ရာ ရှေးဦးစွာ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်သိမ့်ဝါက မြန်မာနိုင်ငံ၏ နေ့ထူးနေ့မြတ်များကို ကျောင်းသား/ ကျောင်းသူလေးများအနေဖြင့် အစဉ်အမြဲအောက်မေ့နေစေရန် နေ့ထူးနေ့မြတ်များအကြောင်း ဗဟုသုတရရှိစေရန်ရည်ရွယ်ချက်များဖြင့် ပြိုင်ပွဲများကို ကျင်းပပြုလုပ်ပေးခြင်းဖြစ်ကြောင်း ရှင်းလင်းပြောကြားခဲ့ပြီးနောက် ကျပန်းစကားပြောပြိုင်ပွဲကို “လွတ်လပ်ရေးနေ့တို့မမေ့” ခေါင်းစဉ်ဖြင့်လည်းကောင်၊ ဇန်နဝါရီလ (၂)ရက်နေ့တွင် ကဗျာရွတ်ဆိုပြိုင်ပွဲကို “ဘိုးဘွားအမွေ” ခေါင်းစဉ်ဖြင့်လည်းကောင်း ကျင်းပပြုလုပ်ပေးခဲ့ရာ အမှတ်(၁)၊ အခြေခံပညာမူလတန်းကျောင်းမှ ကျောင်းသား/ ကျောင်းသူ (၁၅)ဦးပါဝင်ယှဉ်ပြိုင်ခဲ့ကြပြီး ပါဝင်ယှဉ်ပြိုင်ခဲ့သည့် ကျောင်းသား/ ကျောင်းသူများအား သက်ဆိုင်ရာတာဝန်ရှိသူအသီးသီးက အမှတ်တရလက်ဆောင်များပေးအပ်ခဲ့ကြောင်းသိရှိရပါသည်။
DOCA(မကွေး)