စားသုံးသူရေးရာဦးစီးဌာန၊ မကွေးတိုင်းဒေသကြီး၊ သရက်ခရိုင်၊ သရက်မြို့နယ်တာဝန်ခံ ဦးအုန်းမြင့်(ဦးစီးမှူး)သည် မင်းတုန်းမြို့နယ်တာဝန်ခံ၊ ကံမမြို့နယ်တာဝန်ခံတို့နှင့်အတူ မိတ်ဖက် ဌာနများဖြစ်သည့် အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့၊ အစားအသောက်နှင့်ဆေးဝါးကွပ်ကဲရေးဦးစီးဌာနတို့နှင့်ပူးပေါင်း၍ လစဉ် စားသုံးသူဘေးအန္တရာယ်ကင်းရှင်းရေး၊ ကုန်စည်များလုံခြုံစိတ်ချရမှုရရှိစေရေး ပြုလုပ်ဆောင်ရွက်လျက်ရှိရာ (၃-၁-၂၀၂၄)ရက်နေ့၊ နံနက်(၀၈း၃၀)နာရီအချိန်တွင် သရက်မြို့၊ မြို့မစည်ပင်ဈေးအတွင်းရှိ ကုန်စုံဆိုင်များ၌ ကုန်အညွှန်းအမှတ်အသားပြည့်စုံသည့် ကုန်စည်များရောင်းချခြင်းရှိ/မရှိ၊ သက်တမ်းလွန်ကုန်စည်များရောင်းချမှုရှိ/မရှိ ဈေးကွက်စောင့်ကြည့်စစ်ဆေးခဲ့ရာ DOOWEE အမှတ်တံဆိပ်ပါ ချောကလက်ဒိုးနတ် အသင့်စားမုန့်အား ရှောင်တခင်စစ်ဆေးခဲ့ရာ တွင်ကုန်အညွှန်းအမှတ်အသားများပြည့်စုံကြောင်းတွေ့ရှိရပြီး အခြားကုန်စည်များကိုလည်း လိုက်လံစစ်ဆေးခဲ့ရာ သက်တမ်းလွန်ကုန်စည်များရောင်းချခြင်းမရှိကြောင်း တွေ့ရှိခဲ့ရပါသည်။
ထို့နောက် မင်းတုန်းတာဝန်ခံနှင့်အတူ မြခဲတောင်ဘုရားအနီးရှိ ရွှေကမ္ဘာပဲကြော်လုပ်ငန်း၊ အနောက်တောင်၊ အောင်သီရိရပ်ကွက်ရှိ ရွှေပန်ဒါပဲကြော်လုပ်ငန်းနှင့် ဇာမဏီပဲကြော်လုပ်ငန်းများသို့သွားရောက်၍ လုပ်ငန်းရှင်(၃)ဦးနှင့်တွေ့ဆုံကာ မိမိတို့၏ ကိုယ်ပိုင်အမှတ်တံဆိပ်ဖြင့် ထုတ်လုပ်ရောင်းချလျက်ရှိရာ ယခုအခါ၌ ကုန်စည်များတွင် ကုန်အညွှန်းအမှတ်အသားများပြည့်စုံစွာထည့်သွင်းဖော်ပြပေးစေလိုကြောင်း၊ စားသုံးသူကာကွယ်ရေးဥပဒေ (၂၀၁၉) အခန်း(၁၈)၊ ပုဒ်မ(၄၁)တွင်လည်း ကုန်အညွှန်းအမှတ်အသားဆိုင်ရာဖော်ပြချက်များ၏ ဥပဒေများပါရှိကြောင်းနှင့် ထို့ပြင် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များလိုက်နာရမည့် အချက်များကိုလည်း အသိပညာပေးပြောကြားခဲ့ကြောင်းသိရှိရပါသည်။
DOCA(မကွေး)