![](http://www.doca.gov.mm/sites/default/files/styles/consumer_inner_image__847x424_/public/31.9_0.jpg?itok=3qxAgc25)
မကွေးတိုင်းဒေသကြီး၊ မင်းဘူးခရိုင်၊ စလင်းမြို့နယ်၊ ရွှေဘုံသာကျေးရွာအုပ်စု၊ တောတွင် ကျေးရွာရှိ ကျေးလက်နေပြည်သူများ ထန်းပင်မြစ် တစ်ပိုင်တစ်နိုင်စိုက်ပျိုးရောင်းချခြင်းဖြင့် မိသားစုအပိုဝင်ငွေရရှိကြောင်း သိရှိရပါသည်။
တောတွင်ကျေးရွာရှိ ပြည်သူအများစုသည် တောင်သူအလုပ်ကို အများဆုံးလုပ်ကိုင်ကြပြီး စပါး၊ ပဲမျိုးစုံ၊ ပြောင်း၊ နှမ်းများ စိုက်ပျိုးကြပါသည်။ တောင်သူအနည်းအငယ်သာ မိမိတို့ ထန်းတောများနှင့် အနီးနားရှိ ထန်းသီးများကိုဝယ်ယူ၍ မိမိတို့လယ်ယာမြေနှင့် နေရာလွတ်များတို့တွင် စိုက်ပျိုးကြပါသည်။ ထန်းသီးများကို ထန်းသီးမှည့်ချိန်ဖြစ်သည့် ဝါဆိုလတွင် ထန်းသီးဆံအစေ့များအား မြေကျင်းများထဲသို့ ထည့်၍ စိုက်ပျိုးကြပါသည်။ စိုက်ပျိုးပြီး (၅)လခန့်တွင်တူးဖော်၍ ဈေးကွက်သို့ တင်ပို့ရောင်းချကြောင်း သိရပါသည်။
ထန်းပင်မြစ် အချောင်း(၂၀)ပါ (၁)စည်းလျှင် ကျပ်(၁၀၀၀)ခန့် ရောင်းချရပြီး ခေါင်စည်းများကို ကျပ်(၁၅၀၀)အထိ ရောင်းချရကြောင်း၊ စလင်းမြို့နယ်မှထွက်ရှိသည့် ထန်းပင်မြစ်သည် လယ်ယာမြေရွှံ့စေးမြေဖြစ်သည့်အတွက် စားလျှင်ကောင်း၍ ရောင်းလျှင်မြတ်ကြောင်း၊ စိုက်ပျိုးထွက်ရှိသည့် ထန်းပင်မြစ်များကို ဒေသတွင်းစားသုံးကြပြီး စလင်းမြို့ပေါ်နှင့်မင်းဘူး၊ ပွင့်ဖြူမြို့များသို့ တင်ပို့ရောင်းချရကြောင်း ဒေသခံတောင်သူ ဦးသန်းထွန်းထံမှ သိရှိရပါသည်။
DOCA(မကွေး)