ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်အတွင်းရှိ စက်သုံးဆီအရောင်းဆိုင်များ၏ စက်သုံးဆီရောင်းချနေမှုအခြေအနေအား ၂၀၂၄ခုနှစ်၊ ဇန်နဝါရီ (၂၆)ရက်နေ့၊ နံနက်(၀၉:၃၀)နာရီအချိန်တွင် မြို့နယ်စီမံအုပ်ချုပ်ရေးအဖွဲ့ ခေတ္တဥက္ကဋ္ဌ ဗိုလ်မှူးထွန်းဇော်မင်း၊ ဒုတိယမြို့နယ်စီမံအုပ်ချုပ်ရေးမှူး ဦးစည်သူ၊ မြို့နယ်မီးသတ်ဦးစီးမှူး၊ မြန်မာနိုင်ငံရဲတပ်ဖွဲ့မှ ခေတ္တမြို့နယ်မှူးနှင့် တပ်ဖွဲ့ဝင်များ၊ မြို့နယ်လျှပ်စစ်ဦးစီးမှူး၊ မြို့နယ်စည်ပင်သာယာရေးဦးစီးဌာနမှ အမှုဆောင်အရာရှိနှင့် စားသုံးသူရေးရာဦးစီးဌာနမှ မြို့နယ်တာဝန်ခံတို့ပါဝင်သော ပူးပေါင်းအဖွဲ့သည် စက်သုံးဆီအရောင်းဆိုင်များသို့ သွားရောက်ကွင်းဆင်းစစ်ဆေးခဲ့ကြောင်းသိရပါသည်။
ထိုသို့ ကော့မှူးမြို့နယ်အတွင်းရှိ ဗိုလ်ချုပ်လမ်းမကြီး၊ မကျီးကန်ကျေးရွာ၌ စက်သုံးဆီရောင်းချပေးလျက်ရှိသော ရတနာဆိုင်၊ ဇလုတ်ကြီးကျေးရွာမှ MAX ဆီဆိုင်နှင့် အဖျောက် ကျေးရွာရှိ ရွှေသရဖူဆီဆိုင်တို့တွင် စက်သုံးဆီရောင်းချနေမှုအခြေအနေများအား ကွင်းဆင်းစစ်ဆေးခဲ့ရာ ဗိုလ်မှူးထွန်းဇော်မင်းက မိမိတို့ဆီဆိုင်များအနေဖြင့် ယာဉ်များတန်းစီစောင့်ဆိုင်းဝယ်ယူနေရခြင်းရှိ/မရှိ ခွဲတမ်းအချိုးကျစနစ်ဖြင့် ရောင်းချနေမှုရှိ/မရှိ၊ ဆောင်းသီးနှံစိုက်တောင်သူလယ်သမားများ လာရောက်ဝယ်ယူရာတွင် အပြည့်အဝဖြန့်ဖြူးရောင်းချပေးနိုင်ခြင်းရှိ/မရှိတို့ကိုမေးမြန်းခဲ့ရာ စက်သုံးဆီအရောင်းဆိုင်များမှ တာဝန်ရှိမန်နေဂျာတို့က မိမိတို့၏ဆီဆိုင်တွင်သတ်မှတ်ထားသည့် ခွဲတမ်းများကိုလည်း အချိန်မီထုတ်ယူရရှိနိုင်သောကြောင့် မည်သည့်စက်သုံးဆီအမျိုးစားကိုမဆို ဖြန့်ဖြူးရောင်းချပေးလျက်ရှိကြောင်း၊ ဆောင်းသီးနှံစိုက်ပျိုးမည့် တောင်သူလယ်သမားများအား လိုသလောက်ဖြန့်ဖြူးရောင်းချပေးလျက်ရှိကြောင်း ယာဉ်တန်းစီတိုး၍ ဝယ်ယူနေရသည့်အခြေအနေများမရှိကြောင်း ပြန်လည်ဖြေကြားခဲ့ပြီး ဆက်လက်၍ တာဝန်ရှိသူများက လက်ရှိဖြစ်ပေါ်နေသောအခြေအနေများအရ စက်သုံးဆီသိုလှောင်ကန်များတွင် စက်သုံးဆီရှိလျက်နှင့် ဆီဖြန့်ဖြူးရောင်းချပေးခြင်းမရှိသော စက်သုံးဆီအရောင်းဆိုင်များအား ဥပဒေနှင့်အညီ အရေးယူဆောင်ရွက်သွားရန်နှင့် ဆောင်ရွက်ထားရှိမှုအခြေအနေအား ဖွဲ့စည်းမိန့်နှင့်အတူ ပြန်လည်တင်ပြရန်အတွက် မြို့နယ်စက်သုံးဆီစိစစ်ရေးအဖွဲ့ကို ဖွဲ့စည်းဆောင်ရွက်လျက်ရှိကြောင်း အသိပညာပေးပြောကြားခဲ့ပြီးနောက် စက်သုံးဆီဆိုင်များရှိ ဆီလက်ကျန်အခြေအနေအား မြေပြင်ကွင်းဆင်းစစ်ဆေးခဲ့ကြောင်းသိရပါသည်။
DOCA(ရန်ကုန်)