စိမ်းစားဥကို ပဲစိမ်းစား(သို့) ပဲစိမ်းစားဥဟူ၍ ခေါ်ပါသည်။ ပဲမြစ်များရရှိသော ပဲစောင်းလျား ပင်ကဲ့သို့ စိမ်းစားဥပင်သည် ဥအတွက် ဥအတွက်စိုက်ပျိုးသော ပဲပင်မျိုးဖြစ်ပြီး စိမ်းစားဥကို အစိမ်း လိုက်ဖြစ်စေ၊ ကြော်ချက်၍ဖြစ်စေ စားလေ့ရှိကြပါသည်။ စိမ်းစားဥပင်ကို ဆောင်းအခါ နုန်းမြေရှိသော အရပ်ဒေသတိုင်း၌ စိုက်ပျိုးနိုင်ပါသည်။ စိမ်းစားဥကို စားရသော်လည်း အပင်ကို လူနှင့်တိရိစ္ဆာန်များ စားလျှင် အဆိပ်အတောက်ဖြစ်၍ သေတတ်သည်ဟု သိရပါသည်။ စိမ်းစားဥသည် အရည်ရွှမ်း၍ စားလျှင် ရေငတ်ပြေပါသည်။ စိမ်းစားဥ တစ်ဧကလျှင် ပိဿာချိန်ပေါင်း ၂၀၀၀မှ ၈၀၀၀ အထိ ထွက်နိုင်သည်ဟု သိရပါသည်။ စိမ်းစားဥကို ဇန်နဝါရီလ ဒုတိယပတ်မှစ၍ ပြည်မြို့ စည်ပင်သာယာ ဈေးကြီးနှင့် အခြားဈေးများတွင်ရောင်းချနေပြီး ဈေးကောင်းရကြောင်း လည်းသိရပါသည်။ စိမ်းစားဥ ကို ပြည်မြို့အနီးတဝိုက်ရှိကျေးရွာများမှ စိုက်ပျိုးပြီး ထွက်ရှိလာသော စိမ်းစားဥကို ပြည်မြို့တွင်းနှင့် ရန်ကုန်မြို့သို့ တင်ပို့ရောင်းချကြောင်း သိရပါသည်။ စိမ်းစားဥ တစ်တွဲလျှင် အလုံးချော(၅)လုံးပါရှိပြီး တစ်တွဲလျှင် ၁၅၀၀ကျပ်၊ ဥ(အလတ်)တစ်တွဲလျှင် (၇)လုံး ပါပြီး ၁၀၀၀ကျပ်၊ အသေး တစ်တွဲလျှင် ၇၀၀ကျပ်ဖြင့်ရောင်းချကြောင်း သိရှိရပါသည်။
DOCA(ပဲခူး)