၂၀၂၄ခုနှစ်၊ ဇန်နဝါရီလ (၃၀)ရက်နေ့၊ နံနက်(၁၀း၃၀)နာရီအချိန်တွင် နေပြည်တော်ဦးစီးမှူးရုံးကဦးဆောင်၍ ဇမ္ဗူသီရိမြို့နယ်၊ ရွှေကြာပင်ဈေး၊ ဈေးအုပ်ချုပ်ရေးမှူးရုံးတွင် ကုန်မျိုးစုံရောင်းချသည့်ဈေးသည်များနှင့် စားသုံးဆီရောင်းချသည့်ဈေးသည်များကို အသိပညာပေးဟောပြောမှုပြုလုပ်ခဲ့ပါသည်။ အဆိုပါဟောပြောပွဲတွင် ဦးမြင့်နိုင် (ဦးစီးအရာရှိ) က စားသုံးဆီရောင်းချသူများအနေဖြင့် ဖော်ပြရမည့်သတ်မှတ်ချက်များနှင့်အညီ ထုပ်ပိုးရောင်းချရန်၊ စားအုန်းဆီရောင်းချမှုနှင့်ပတ်သက်၍ သတ်မှတ်ဈေးနှုန်းများထက် ပိုမိုရောင်းချခြင်းမပြုရန်လိုအပ်ကြောင်း၊ အကယ်၍ လိုက်နာမှုမရှိပါက အရေးကြီးကုန်စည်နှင့်ဝန်ဆောင်မှုဥပဒေဖြင့် အရေးယူဆောင်ရွက်သွားမည်ဖြစ်ကြောင်း၊ ကုန်ပစ္စည်းများတွင် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ သိရှိလိုက်နာဆောင်ရွက်ရန်လိုအပ်ကြောင်း အသိပညာပေးပြောကြားခြင်းများပြုလုပ်ခဲ့ပြီး တက်ရောက်လာကြသော ဈေးသည်များအား သိရှိလိုသည်များကို မေးမြန်းနိုင်ပါကြောင်း ဖိတ်ခေါ်ခဲ့ပါသည်။ ၎င်းအသိပညာပေးဟောပြောပွဲသို့ တက်ရောက်လာသူ (၁၅)ဦးရှိပြီး ဟောပြောပွဲကို နံနက်(၁၁း၃၀)နာရီအချိန်တွင် ရုပ်သိမ်းခဲ့ကြောင်း သတင်းရရှိပါသည်။
DOCA(နေပြည်တော်)