မကွေးတိုင်းဒေသကြီး၊ ပခုက္ကူခရိုင်အတွင်းရှိ မြစ်ခြေ၊ ကမ္မမြို့နယ်များသည် ဆီးပင်များအများဆုံးပေါက်ရောက်ပြီး ဆီးသီးအစို/အခြောက်များထွက်ရှိသော မြို့နယ်များဖြစ်ပါသည်။ "မန်ကျည်းတစ်လှည့် ဆီးတစ်လှည့်" ဆိုသည့်စကားရှိရာ ယခုနှစ်၊ ယခုအချိန်သည် ဆီးသီးလှိုင်လှိုင်ပေါ် သော အချိန်အခါဖြစ်၍ ပခုက္ကူမြို့ ဈေးကွက်အတွင်းသို့ နေ့စဉ်ဝင်ရောက်လျက်ရှိသည်။
ယခု ၂၀၂၄ခုနှစ်၊ ဖေဖေါ်ဝါရီလ(ပထမပတ်)တွင် ဆီးသီးအစို(၁)တင်းလျှင် လက်ကားဈေး ကျပ်(၁၀၀၀၀)၊ လက်လီဈေး ကျပ်(၁၂၀၀၀)၊ ဆီးသီးအခြောက်(၁)တင်းလျှင် ကျပ်(၁၃၀၀၀)၊ ဆီးဆံတစ်ပိဿာလျှင် ကျပ်(၅၅၀၀၀)တို့ဖြင့် အရောင်းအဝယ်ဖြစ်လျက်ရှိပါသည်။ ယခင်လတွင် ဆီးသီးအစို (၁)တင်းလျှင် ကျပ်(၁၃၅၀၀-၁၄၀၀၀)၊ ဆီးသီးခြောက်(၁)တင်းလျှင် ကျပ်(၁၄၀၀၀)၊ ဆီးဆံ(၁) ပိဿာလျှင် ကျပ်(၅၆၀၀၀-၅၇၀၀၀)ဖြစ်ခဲ့ပါသည်။ ယခုဖေဖော်ဝါရီလဆန်းပိုင်းတွင် ဈေးနှုန်းအနည်းငယ်ကျဆင်းလာခြင်းမှာ ကုန်ပစ္စည်းဝင်ရောက်မှုများလာခြင်းကြောင့်ဖြစ်ကြောင်းသိရှိရပါသည်။
ဆီးသီးပေါ်ချိန်ဖြစ်၍ ဆီးခွဲစက်များမှာ လည်ပတ်လျက်ရှိပါသည်။ ဆီးခွဲစက်ပိုင်ရှင်၏ ပြောကြားချက်အရ နှစ်တစ်နှစ်စီတိုင်းတွင် နိုဝင်ဘာလမှ ဖေဖေါ်ဝါရီလအထိ ဆီးသီးများကြိတ်ခွဲပြီး ၎င်းလတို့မှာ ဆီးဆံများအရောင်းရဆုံးအချိန်ဖြစ်ကြောင်း၊ ဆီးခွဲစက်(၅)လုံးရှိပြီး တစ်ပတ်လျှင် (၃)ရက်ကြိတ်ရကြောင်း၊ တစ်နေ့လျှင် ဆီးသီးခြောက်ပိဿာ (၅၀၀မှ ၇၀၀)ကြားကြိတ်ရကြောင်း၊ ဆီးသီးခြောက်များကို (၁) တင်းလျှင် ကျပ်(၁၂၅၀၀-၁၃၅၀၀)ဖြင့်ဝယ်ရကြောင်း၊ ဆီးသီးခြောက်ပိဿာ(၁၀၀)ကြိတ်လျှင် ဆီးဆံ (၂၅)ပိဿာထွက်၍ ဆီးဆံ(၁)ပိဿာလျှင် ကျပ်(၅၅၀၀၀)ဈေးနှုန်းရှိသောကြောင့် အမြတ်အစွန်းများရရှိကြောင်း၊ ယခင်နှစ် ဇန်နဝါရီ၊ ဖေဖော်ဝါရီလများ၌ ဆီးသီးအစို(၁)တင်းလျှင် ကျပ်(၇၀၀၀)၊ ဆီးသီးခြောက်(၁)တင်းလျှင် ကျပ်(၁၁၀၀၀)၊ ဆီးဆံတစ်ပိဿာလျှင် ကျပ်(၂၆၀၀၀ - ၂၈၀၀၀)ဖြစ်၍ ယခင်နှစ်နှင့်နှိုင်းယှဉ်လျှင် ယခုနှစ်ပို၍ အမြတ်အစွန်းရရှိကြောင်း၊ ကြိတ်ခွဲရရှိလာသော ခွဲခြမ်းများမှာလည်း တစ်ပိဿာလျှင် ကျပ်(၅၀၀၀)ဈေးနှုန်းရှိသောကြောင့် တွက်ချေကိုက်၍ ပို၍လည်ပတ်နိုင်ကြောင်းနှင့် အခြားဆီးခွဲစက်များလည်း အလားတူလည်ပတ်လျက်ရှိကြောင်းသိရှိရပါသည်။
ဆီးပင်မှာ တစ်ပင်လုံးအသုံးဝင်သောကြောင့် ယခုအချိန်တွင် သဘာဝအလျောက်ပေါက်ရောက်သည့် အပင်များအပြင် လယ်မြေများ၌ တိုးချဲ့စိုက်ပျိုးလာကြသည်။ ဆီးဆံမှာ ဆေးဖက်ဝင်သောကြောင့် ပြည်ပသို့တင်ပို့နေရသည့်အတွက် ၎င်းကို ကုန်ချောအဖြစ်ထုတ်လုပ်နိုင်ပါက ပြည်တွင်းကဏ္ဍဖွံ့ဖြိုးမှုအတွက် ပိုမိုအထောက်အကူပြုနိုင်မည်ဖြစ်ပါသည်။
DOCA(မကွေး)