ပဲစဉ်းငုံသီးနှံမှာ စိုက်ပျိုးရာသီအနေဖြင့် (၇)လကျော်ကြာမြင့်သော်လည်း ယခုနှစ်တွင် ဈေးကောင်းရရှိကြောင်းသိရသည်။ မိတ္ထီလာခရိုင်အတွင်းရှိ မလှိုင်မြို့နယ်သည် မန္တလေးတိုင်းဒေသကြီး၊ ကျောက်ပန်းတောင်းမြို့နယ်ပြီးလျှင် ပဲစဉ်းငုံကို ဒုတိယအများဆုံးစိုက်ပျိုးသော ဒေသဖြစ်ပါသည်။ ၎င်းမှာ ဒေသရာသီဥတုနှင့်ကိုက်ညီပြီး စိုက်ပျိုးစရိတ်သက်သာကာ ဈေးကွက်အတွင်း ဝယ်လိုအားရှိသောသီးနှံဖြစ်၍ တောင်သူများအတွက် အကျိုးအမြတ်များသောသီးနှံဖြစ်ပါသည်။ ယခုနှစ်တွင် စိုက်ပျိုးဧက (၆၆၃၆၇) ဧကရှိပြီး အထွက်တင်းပေါင်း (၃၆၉၁၁၄) တင်းရှိကြောင်း၊ တောင်သူများအနေဖြင့် ဝါသီးနှံတွင် အကျိုးအမြတ်နည်းခဲ့သော်လည်း ပဲစဉ်းငုံမှာ သီးနှံပေါ်စကပင် တစ်တင်းလျှင် (၁၀၀၀၀၀) ကျပ်ထိဈေးကောင်းခဲ့ရာမှ ယခုအခါ (၁၂၃၀၀၀) ကျပ်ထိဈေးကောင်းရကြောင်းသိရပါသည်။ ဒေသတွင်းတောင်သူများအနေဖြင့် အကျိုးအမြတ်ပေါ်မူတည်ခြင်းမရှိဘဲ မိရိုးဖလာနည်းအတိုင်းစိုက်ပျိုးရာ ယခုနှစ်ဈေးကောင်းရမှုအပေါ် လာမည့်နှစ်များတွင်လည်း စိုက်ပျိုးဧကလျော့နည်းနိုင်ရာမရှိကြောင်း သိရပါသည်။
DOCA(မန္တလေး)