ပြည်ခရိုင်၊ ရွှေတောင်မြို့နယ်၊ ကသစ်ကိုင်းအုပ်စု၊ ကသစ်ကိုင်းကျေးရွာတွင် နှင်းဆီပန်းများ စီးပွားဖြစ်စိုက်ပျိုးထားရှိကြောင်း သိရသဖြင့် ကွင်းဆင်းလေ့လာ ဆောင်ရွက်ခဲ့ပါသည်။ နှင်းဆီပန်းများကို အပင်ပေါက်ဝယ်ယူ၍ စိုက်ပျိုးကြပြီးပုံမှန်အားဖြင့် နိုဝင်ဘာလတွင် စိုက်ပျိုးကြကာ စိုက်ပျိုးသည့် မျိုးမှာကျောက်စိမ်းမျိုးဖြစ်ပါသည်။ နှင်းဆီပန်းကို စိုက်ပျိုးပြီး (၂)လသားအရွယ်တွင် ပန်းများစတင်ခူးဆွတ်ရောင်းချကြပါသည်။ နှင်းဆီပန်းအပင် (၁၀၀၀) ကျော်စိုက်ပျိုးထားလျှင် တစ်ရက်ခြားတစ်ခါ ပန်းပွင့်ရေ (၈၀၀ မှ ၁၀၀၀)အထိ ခူးယူရရှိကြောင်း သိရှိရပါသည်။ နှင်းဆီပန်းများ ပေါ်ချိန်တွင် အခင်းထဲအထိ ဒိုင်များလာရောက်ဝယ်ယူကြပြီး တစ်ပွင့်လျှင် (၁၀၀)ကျပ်ဖြင့် ရောင်းချကြောင်း သိရှိရပါသည်။ ထိုမှတစ်ဆင့် ရွှေတောင်မြို့ပေါ်ရှိ ဈေးကွက်များနှင့် ပြည်မြို့ပေါ်ရှိ ဈေးကွက်များသို့ တင်ပို့ရောင်းချသဖြင့် လက်လီဈေးမှာ တစ်ပွင့်လျှင်(၁၅၀)ကျပ်ဖြင့် ရောင်းချကြပါသည်။ နှင်းဆီပန်းတစ်ခါပေါ်လျှင် (၄)လ မှ (၅)လ အထိ ခူးဆွတ်၍ရောင်းချရပါသည်။ နှင်းဆီပင်များကို တစ်ခါစိုက်ပျိုးထားပါက (၅)နှစ်အထိ ခူးဆွတ်ရောင်းချရပြီး တစ်နှစ်ပျမ်းမျှ အကျိုးအမြတ်မှာ ဈေးနှုန်းပေါ်မူတည်၍ ဈေးကောင်း လျှင်(၁၇)သိန်းခန့်အထိ အမြတ်ရရှိကြောင်း သိရှိရပါသည်။
DOCA(ပဲခူး)