ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်ရှိ ကျေးရွာများဖြစ်သော ရှမ်းစုကျေးရွာ၊ ဇီးဖြူကုန်းကျေးရွာတို့တွင် ချဉ်ပေါင်ရွက်ကို အများဆုံးစိုက်ပျိုးပြီးရောင်းချခြင်းဖြင့် နှစ်စဉ် ဝင်ငွေများရရှိလျက်ရှိကြောင်းသိရှိရပါသည်။
ရှမ်းစုကျေးရွာတွင် ချဉ်ပေါင်အစေ့ထုပ်များကို ဝယ်ယူ၍စိုက်ပျိုးကြောင်း တောင်သူ ဦးဇော်လင်းထံမှ မေးမြန်းသိရှိရပါသည်။ ချဉ်ပေါင်ပင်၏ အရွက်နှင့်အဖူးများကို လူတိုင်းကြိုက်နှစ်သက်စွာစားသုံးကြပါသည်။ စားလိုက်တိုင်း ချဉ်ပြုံးပြုံးအရသာဖြင့် ထမင်းမြိန်စေပြီး စားကောင်းသည့်အပြင် ကျန်းမာရေးအတွက်လည်း အထူးကောင်းမွန်ပါသည်။ ချဉ်ပေါင်ရွက်မှာ အရွက်မှစ၍ အပွင့်၊ အဖူးနှင့် တစ်ပင်လုံးနီးပါးဆေးဖက်ဝင်ပြီး (၁၂)လရာသီလုံးတွေ့ရသည့် အပင်တစ်မျိုးဖြစ်ကာ မျက်နှာပွင့်သော အရွက်ဟုဆိုလျှင်လည်း မမှားနိုင်ပါ။ ချဉ်ပေါင်ရွက်ကို ချဉ်ပေါင်ဟင်း၊ ချဉ်ပေါင်ကြော်၊ ချဉ်ပေါင်ဟင်းချို၊ ချဉ်ပေါင်ပေါင်းတို့အပြင် အသားနှင့်လည်းတွဲ၍ အမျိုးမျိုးချက်ပြုတ်စားသောက်ကြပါသည်။
ဈေးကွက်အနေဖြင့် ပြည်မြို့နယ်အတွင်းရှိ ဈေးများအပြင် ရန်ကုန်သို့လည်းတင်ပို့ရောင်းချပါသည်။ ဈေးနှုန်းအနေဖြင့် (၃)ပင်စည်းတစ်စည်းလျှင် (၁၀၀)ကျပ်၊ (၁၀)စည်းပါတစ်ဖိုင်လျှင် (၆၀၀)ကျပ်ဖြင့်ရောင်းချကြောင်းသိရပါသည်။ ချဉ်ပေါင်ရွက်ကို စိုက်ပျိုးရောင်းချခြင်းဖြင့် မိသားစုဝင်ငွေရရှိကာ စီးပွားရေးရှုထောင့်အရ တွက်ချေကိုက်လျက်ရှိကြောင်း လေ့လာသိရှိရပါသည်။
DOCA(ပဲခူး)