ငရုတ်ပွကို ကျွန်ုပ်တို့မြန်မာနိုင်ငံတွင် ငရုတ်ချို၊ ငရုတ်ပွဟူ၍ ခေါ်ဆိုကြပါသည်။ ငရုတ်ပွ၏အရသာမှာ ချိုသောအရသာရှိပြီး ဈေးကောင်းလည်းရသော အသီးအနှံတစ်မျိုးဖြစ်သောကြောင့် စိုက်ပျိုးသူတောင်သူများ တစ်နိုင်တစ်ပိုင်စိုက်ပျိုးကြပါသည်။ ငရုတ်ပွပင်စိုက်ပျိုးရာတွင် ငရုတ်မျိုးစေ့များအား မျိုးစေ့ချအပင်ဖောက်ပြီး ပျိုးပင်များအား တစ်လခွဲ သက်တမ်းကြာမြင့်လာသည့်အချိန်မှသာ မြောင်းဖော်ခြင်း၊ စိုက်ပေါင်ဖော်ခြင်းတို့ဆောင်ရွက်ရပြီး စိုက်ပျိုးရာတွင် အပင်များအား ၂ပေစီခြား၍စိုက်ပျိုးရပါသည်။ စီးပွားဖြစ်စိုက်ပျိုးသူတောင်သူများမှာ ငရုတ်ပွကို လတ်လတ်ဆတ်ဆတ်စားသောက်ကြသည်။ သို့သော် ၎င်းမှာ ပုပ်သိုးပျက်စီးလွယ်သောသီးနှံဖြစ်၍ ဂရုတစိုက်အချိန်ပေးရသောကြောင့် ၎င်းကို သီးညှပ်စိုက်ခင်းများတွင်လည်း ညှပ်၍စိုက်ပျိုးကြပါသည်။ ငရုတ်ပွပင်များမှာ စတင်စိုက်ပျိုးပြီး ရက်(၂၀)ခန့်အကြာတွင် ပန်းပွင့်လေးများစတင်ပွင့်လာပါသည်။ ငရုတ်ပွပင်များအား ခူးဆွတ်ရာတွင် နေအေးသော ညနေခင်းတို့တွင် ခူးဆွတ်ရပါသည်။ ငရုတ်ပွပင်များအား အစိမ်းခူးဆွတ်လျှင် နှစ်ပတ်တစ်ကြိမ်ခူးဆွတ်ရပြီး အသီးမှည့်များအား ခူးဆွတ်ရာတွင် တစ်လအကြာမှသာခူးဆွတ်ရပါသည်။ ငရုတ်ပွ၏ အထွက်နှုန်းအနည်းအများမှာ အပူချိန်ပေါ်မူတည်ပါသည်။ လိုအပ်သောအပူချိန်ကို လုံလောက်စွာရရှိလျှင် အပွင့်မြန်ပြီး အသီးပိုမိုထွက်ရှိပါသည်။ ငရုတ်ပွ၏ ပုံသဏ္ဌာန်မှာ ပုတိုပြီး လုံးဝိုင်းကာ အရောင်မှာလည်း အစိမ်း၊ အဝါ၊ အနီ စသည့်အရောင်မျိုးစုံပါပါသည်။ ငရုတ်ပွဈေးနှုန်းအနေဖြင့် ဖေဖော်ဝါရီလ နောက်ဆုံးပတ်တွင် တစ်ပိဿာလျှင် ၂၅၀၀ကျပ်ဖြင့် ပြည်မြို့ရှိဈေးကွက်များတွင် ရောင်းချလျက်ရှိကြောင်းသိရှိရပါသည်။
DOCA(ပဲခူး)