ပဲခူးတိုင်းဒေသကြီး၊ ပြည်ပဲဈေးကွက်အတွင်း ပြည်ပဝယ်လက်ရှိသော ပဲသီးနှံများအနက် ယခုနှစ်အတွင်း ပဲတီစိမ်းသီးနှံဈေးအနေဖြင့် ဈေးအေးနေခဲ့သည်ကိုတွေ့ရပါသည်။ ယခုနှစ်၌ အခြားပဲအားလုံးလိုလို ဈေးကောင်းရရှိခဲ့သော်လည်း ပဲတီစိမ်းသီးနှံမှာ ပိဿာ(၂၀)ဝင် တစ်တင်းလျှင် ကျပ်၆၈၀၀၀၀ခန့်ဖြင့်သာ အရောင်းအဝယ်ဖြစ်ခဲ့ပါသည်။ ပဲတီစိမ်းသီးနှံမှာ ဈေးကွက်အတွင်းသို့ ပဲသစ်ဝင်ရောက်ခြင်းမရှိကြောင်း၊ ပဲဝင်ရောက်မှုလည်း နေ့စဉ်မရှိဘဲ လက်ကျန်ပဲတချို့ဖြင့် တစ်ခါတစ်ရံ၌ အိတ် (၂၀၀/၃၀၀) ကျော်အရောင်းအဝယ်ဖြစ်ခဲ့ပါသည်။ ပဲတီစိမ်းသီးနှံအား မန္တလေးလိုင်းသမားများက အဓိကဝယ်ယူမှုရှိသည်ဟုသိရပါသည်။ မိုးပဲတီစိမ်းသစ်များမှာ ဇွန်လ၊ ဇူလိုင်လများတွင် ပြည်အနီးတစ်ဝိုက်ဒေသများဖြစ်သော ပေါင်းတလည်၊ ပေါက်ခေါင်းမြို့နယ်များမှ ဝင်ရောက်လာနိုင်ပြီး အခြားမတ်ပဲ၊ ကုလားပဲသီးနှံများကဲ့သို့ တစ်နှစ်တာကာလပတ်လုံး ရောင်းဝယ်နေခြင်းမဟုတ်ဘဲ ပဲထွက်ပေါ်ချိန်ကာလတွင်သာ ရောင်းဝယ်မှုအဖြစ်များသောသီးနှံဖြစ်ပါသည်။ ပဲတီစိမ်းသီးနှံမှာ ပြည်ခရိုင်၌ မိုးနှင့်ဆောင်း ၂ရာသီထွက်ပေါ် ကြောင်းသိရှိရပါသည်။
DOCA(ပဲခူး)