![](http://www.doca.gov.mm/sites/default/files/styles/consumer_inner_image__847x424_/public/5.10_2.jpg?itok=Zc8mPt1E)
စစ်ကိုင်းတိုင်းဒေသကြီး ၊ ကန့်ဘလူခရိုင် ၊ ကန့်ဘလူမြို့၏ အထင်ကရနေရာတစ်ခုဖြစ်သည့် မဟာရွှေစည်ကြီးဘုရာအနီးရှိ ဘုရားကြီးညဈေးတန်းတွင် စားသောက်ဆိုင်များ၊ သစ်သီးဆိုင်များနှင့် ရာသီပေါ်အသီးအနှံများရောင်းချရာ ဈေးဝယ်သူများနှင့် စည်ကားလျက်ရှိကြောင်း သိရသည်။
ယခုလို မိုးဦးကာလ မေ၊ဇွန်လများတွင် အင်ဥများပေါများစွာ တွေ့ရတတ်ပြီး ယေဘူယျအားဖြင့် တစ်နှစ်လျှင်(၁)ကြိမ်သာ တွေ့ရလေ့ရှိကြောင်း သိရသည်။ အင်ဥမှာ မှိုမျိုးနွယ်ဝင် မြေအောင်းမှိုတစ်မျိုးဖြစ်သောကြောင့် မှိုများကဲ့သို့ပင် ကျန်းမာရေးအတွက် အထောက်အကူဖြစ်စေ သည့် အာဟာရဓာတ်များလည်း ပါဝင်ပါသည်။ ထို့ပြင် မှိုနှင့်ဓာတ်မတည့်သူများအနေဖြင့် အင်ဥကို သတိပြုစားသုံးသင့်ပြီး သွေးတိုးရောဂါ၊ ဂေါက်ရောဂါ၊ လေးဘက်နာရောဂါရှိသူနှင့် အဆစ်အမြစ်နာ ကျင်ကိုက်ခဲတတ်သူများအနေနှင့် ချင့်ချိန်စားသုံးသင့်ကြောင်း၊ စားသုံးသူများအနေဖြင့် အင်ဥကို အင်ဥကြော်၊ အင်ဥကင်၊ အင်ဥသုတ်၊ အခြားသောအသီးအရွက်များနှင့်ရော၍ အရသာရှိသော စားသောက်ဖွယ်ရာဖြစ်အောင် အမျိုးမျိုးချက်ပြုတ်စားသုံးကြကြောင်း၊ ယခုအခါ ဘုရားကြီးညဈေး တန်းတွင် အင်ဥကို နို့ဆီဘူးနှင့်တစ်ဘူးလျှင် (၂၅၀၀)ကျပ်မှ (၃၀၀၀)ကျပ်၊ တစ်ပြည်လျှင်(၂၀၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း ရာသီပေါ်သဘာဝအစားအစာဖြစ်သည့် အင်ဥကို ကြိုက်နှစ်သက်သူများပြားသဖြင့် အရောင်းသွက်၍ အဆင်ပြေလျက်ရှိကြောင်း အင်ဥ(မှိုစေ့)ရောင်းချသူထံမှ သိရသည်။
DOCA(စစ်ကိုင်း)