ရှမ်းပြည်နယ်၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ တာဝန်ရှိသူများသည် (၁၄.၃.၂၀၂၂)ရက်နေ့ (၁၃:၀၀)နာရီအချိန်တွင် ကျိုင်းတုံ၊ လွယ်လုံအုပ်စု၊ တုံဆီရွာရှိတောင်သူတစ်ဦးအား ဖူးစားပြောင်းစိုက်ပျိုးမှုနှင့်ပတ်သက်၍ ကွင်းဆင်းလေ့လာမေးမြန်းခဲ့ပါသည်။
ဖူးစားပြောင်းအား ရာသီမရွေးစိုက်ပျိုးလေ့ရှိသော်လည်း ကျိုင်းတုံမြို့မှ တောင်သူများသည် ဖေဖော်ဝါရီလတွင် ပိုမိုစိုက်ပျိုးလေ့ရှိကြောင်း၊ မျိုးစေ့မှာ တရုတ်မျိုးစေ့ဖြစ်ပြီး (၁) ဧကလျှင် မျိုးစေ့အထုတ်(၅၀)ခန့်ကုန်ကျကြောင်း၊ မျိုးစေ့တစ်ထုတ်လျှင် နို့ဆီဗူးတစ်ဗူးခန့်ရှိပြီး စိုက်ပြီး(၃) ရက်ခန့်တွင် အပင်ပေါက်ရာ ပိုးကျမြန်၍ချက်ချင်း ပိုးသတ်ဆေးဖြန်းပေးရကြောင်း၊ ပိုးသတ်ဆေးအား (၁၅)ရက် တစ်ကြိမ်ခန့်ဖြန်းပေးရပြီး အနည်းဆုံး(၅)ကြိမ်ဖြန်း ပေးရကြောင်း၊ စိုက်ပျိုးပြီးချိန်မှ (၁၀)ရက်ခန့်အကြာတွင် မြေသြဇာနှင့်ရေထည့်ပေးရပြီး (၃)ကြိမ်ခန့် ထည့်သွင်းပေးရကြောင်း၊ အပင်ပေါက်ပြီး(၂)လခန့်အကြာတွင် အဖူးထွက်၍ ရက်(၈၀)ကျော်တွင် ခူးပေးရပြီး ရက်(၉၀)ကျော် ပါက အဆိုပါဖူးစားပြောင်းမှာ စားသုံး၍မရတော့ပါကြောင်း၊ စိုက်ပျိုးမှု တစ်ဧကလျှင် (၄၅၀၀)ကီလို ခန့်ထွက်ရှိကြောင်း သိရှိရပါသည်။
ဖူးစားပြောင်းစိုက်ပျိုးရာတွင် (၁)ဧကလျှင် ပိုးသတ်ဆေး၊ မြေသြဇာ၊ မျိုးစေ့နှင့် လုပ်အားခတို့တွက် စုစုပေါင်းကုန်ကျစရိတ်မှာ (၆)သိန်းကျပ်ခန့်ကုန်ကျပြီး ပြန်လည်ရရှိငွေအဖြစ် (၁၃)သိန်း ကျပ်ခန့် ရရှိကြောင်း၊ သို့သော် ယခုနှစ်တွင် ပိုးသတ်ဆေး၊ မြေသြဇာနှင့် မျိုးစေ့စျေးနှုန်းများမှာ များပြားသောကြောင့် ယခင်နှစ်ထက် အမြတ်နည်းကြောင်း သိရှိရပါသည်။
သို့ဖြစ်ပါ၍ တောင်သူများတပိုင်တနိုင်စိုက်ပျိုးကြပြီး ရာသီမရွေးစိုက်ပျိုး၍ရသောကြောင့် ဒေသနေပြည်သူများအတွက် စားသုံးရန်ဖူလုံမှုရှိ၍ အရသာရှိပြီးစားကောင်းသော ဖူးစားပြောင်းအကြောင်း တစ်စေ့တစ်စောင်း ရေးသားလိုက်ရပါသည်။
DOCA(ရှမ်း)