စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်း/ခရိုင်ဦးစီးမှူး၏လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ရုံးအုပ် ဦးဇော်နေလင်းသည် (၁၅.၃.၂၀၂၂) ရက်နေ့၊ နံနက်(၀၉:၀၀)နာရီအချိန်တွင် ပြည်တွင်းကုန်သွယ်မှုဖွံ့ဖြိုးတိုးတက်စေရေးအတွက် ဆိပ်ဖြူမြို့ပေါ်ရှိ ကုန်စည်ဒိုင်အသင်းဝင်ကုန်သည်ပွဲစားလုပ်ငန်းရှင်နှင့်တွေ့ဆုံပြီး မတ်လ (၁)ရက်မှ (၁၄)ရက်အထိ ကုန်စည်ဒိုင်တွင် ကြက်သွန်နီ(အဟောင်း) မိုးစိုက်၊ ဥစိုက်နှင့် ဆောင်းစိုက်၊ ပင်စိုက်(အသစ်)များ၏ စီးဝင်စီးထွက်နှင့် ဈေးနှုန်းဈေးကွက်အခြေအနေအား ကွင်းဆင်းလေ့လာခဲ့ပါသည်။
ကုန်စည်ဒိုင်အသင်းဝင်၏ ပြောကြားချက်အရ ကုန်စည်ဒိုင်သို့ နေ့စဉ်ကြက်သွန်နီဉစိုက် (အဟောင်း)မှာ သက်တမ်းကုန်ချိန်ဖြစ်၍ အဝင်နည်းပြီး ပင်စိုက်(အသစ်)များမှာ သီးနှံပေါ်စဖြစ်၍ ကုန်ချိန် အသင့်အတင့်ဝင်ရောက်ကြောင်း၊ ကြက်သွန်နီ(အဟောင်း)မှာ တစ်ရက်လျှင် ကုန်ချိန် ပိဿာ(၅၀၀၀)ခန့်၊ (၂)ပတ်အတွင်း စုစုပေါင်းပိဿာ (၇၀၀၀၀)ခန့် ဝင်ရောက်ပြီး၊ ဆောင်းစိုက် ပင်စိုက်(အသစ်)မှာ တစ်ရက်လျှင် ပျမ်းမျှပိဿာ(၄၀၀၀၀)ခန့်၊ (၂)ပတ်အတွင်း စုစုပေါင်းပိဿာ (၆၀၀၀၀၀)ခန့်ဝင်ရောက်ပြီး အများဆုံး စိုက်ပျိုးထွက်ရှိသော ဆိပ်ဖြူမြို့နယ်အတွင်းရှိ ရေပုတ်၊ ထန်းချောင်း၊ ကံတွင်း၊ လိပ်ခြံကျေးရွာများမှ ဝင်ရောက်လျက်ရှိကြောင်း၊ ချစ်ချောင်း/ယောချောင်း နံဘေးစိုက်ကြက်သွန်နီများမဟုတ်ဘဲ ကိုယ်ပိုင်လယ်ကွက်(မြေသား)များတွင် သီးသန့်စိုက်ပျိုးထားသဖြင့် သီးနှံစောစောထွက်၍ ကုန်ချိန်အဝင်နည်းသေးကြောင်း ကုန်စည်ဒိုင်အသင်းဝင်ကုန်သည်ထံမှတစ်ဆင့် သိရှိရပါသည်။
မတ်လဒုတိယပတ်အတွင်း အရောင်းအဝယ်ဖြစ်လျက်ရှိသော ကြက်သွန်နီ(အဟောင်း/အသစ်) ဈေးနှုန်းဈေးကွက်မှာ သီးနှံအရည်အသွေးကိုလိုက်၍ ဈေးနှုန်းများမတူညီကြောင်း၊ ကြက်သွန်နီ (အဟောင်း) (၁)ပိဿာအမြင့်ဆုံး ကုန်စည်ဒိုင်ဖြတ်ဈေးနှုန်းမှာ (၅၅၀)ကျပ်မှ (၄၅၀)ကျပ်အထိ ထိပ်စအမြင့်ဆုံးဈေးဖြင့်အရောင်းအဝယ်ဖြစ်ခဲ့ပြီး ကြက်သွန်နီအသစ်(၁)ပိဿာ အမြင့်ဆုံးဈေးနှုန်း မှာ ကျပ်(၇၇၅/၆၅၀/ ၆၃၅/၆၀၀) ဈေးနှုန်းအသီးအသီးဖြင့် အရောင်းအဝယ်ဖြစ်ခဲ့ကြောင်း သိရှိရပါသည်။ ယခင်နှစ် မတ်လဒုတိယပတ်အတွင်း ကုန်စည်ဒိုင်တွင် အရောင်းအဝယ်ဖြစ်ခဲ့သော ဈေးနှုန်းမှာ ကြက်သွန်နီ(အဟောင်း)ထိပ်စ (၁)ပိဿာဈေးနှုန်းမှာ ကျပ်(၂၀၀/၁၇၅/၁၅၀)ဈေးနှုန်းများဖြင့်လည်းကောင်း၊ ပင်စိုက်(အသစ်) (၁)ပိဿာလျှင် ထိပ်စအမြင့်ဆုံးဈေးနှုန်းမှာ ကျပ်(၇၀၀/၅၀၀/၄၀၀)ဈေးနှုန်းအသီးသီးဖြင့် အရောင်းအဝယ်ဖြစ်ခဲ့၍ ယခင်နှစ်ကာလတူထက်ဈေးပိုကြောင်း သိရှိရပါသည်။
ကုန်စည်ဒိုင်သို့ စီးဝင်လာသော ကြက်သွန်နီ(အဟောင်း/အသစ်)များကို ပြန်လည်တင်ပို့ ဖြန့်ဖြူးရာတွင် ရန်ကုန်ဘုရင့်နောင်ပွဲရုံ၊ ပြည်၊ မြဝတီ၊ စစ်တွေမြို့များသို့ တင်ပို့လျက်ရှိကြောင်း၊ ကုန်စည်ဒိုင်ဖြတ်ဈေးနှုန်းအနေဖြင့် မတ်လဒုတိယပတ်အတွင်း အရာင်းအဝယ်ဖြစ်ရာတွင် ဈေးနှုန်း အတက်အကျကွာဟမှုသိပ်မရှိဘဲ ကြက်သွန်နီပင်စိုက်(အသစ်)(၁)ပိဿာလျှင် (၆၀၀)ကျပ် ပျမ်းမျှ ဈေးနှုန်းဖြင့် ဈေးကွက်တွင်ရပ်တည်လျက်ရှိကြောင်း၊ ပြည်တွင်းသုံးစွဲမှုသာရှိပြီး ပြည်ပဝယ်လက်နည်း၍ ဈေးအနည်းငယ်ကျဆင်းသွားကြောင်း ကုန်စည်ဒိုင်အသင်းဝင်ကုန်သည်မှတစ်ဆင့်သိရှိရ ပါသည်။
DOCA(မကွေး)