![](http://www.doca.gov.mm/sites/default/files/styles/consumer_inner_image__847x424_/public/16.2_6.jpg?itok=Ae3n9PCa)
ရန်ကုန်တိုင်းဒေသကြီးနေ တိုင်ကြားသူတစ်ဦးမှ ဘုရင့်နောင်ကားဝန်းရှိ ကုန်စည်ပို့ဆောင်ရေးကားဂိတ်မှတစ်ဆင့် ဆိုလာပြား(၂၂)ချပ်အား ကျောက်ပန်းတောင်းမြို့သို့ တင်ပို့ရာတွင် ဆိုလာပြား (၇)ချပ်မှာ သုံးစွဲ၍ မရ နိုင်သည်အထိ ပျက်စီးသွားသဖြင့် လူကိုယ်တိုင်သော်လည်းကောင်း၊ ဖုန်းဖြင့်သော်လည်းကောင်း အကြိမ်ကြိမ်ဆက်သွယ်ခဲ့သော်လည်း တာဝန်ယူဖြေရှင်းပေးမှု မရှိသောကြောင့် စားသုံးသူရေးရာဦးစီးဌာနသို့ လူကိုယ်တိုင် လာရောက် တိုင်ကြားလာပါသည်။
ဖြေရှင်းဆောင်ရွက်မှုအခြေအနေ။ တိုင်ကြားမှုနှင့်ပတ်သက်၍ အနောက်ပိုင်းခရိုင်ဦးစီးမှူးရုံးမှ တာဝန်ရှိသူက ၁၁-၆-၂၀၂၄ ရက်နေ့တွင် တိုင်ကြားသူနှင့် တိုင်ကြားခံရသည့် ကုန်စည်ပို့ဆောင်ရေးကားဂိတ်မှ တာဝန်ရှိသူတို့အား ခရိုင်ဦးစီးမှူးရုံးသို့ ခေါ်ယူတွေ့ဆုံဆွေးနွေးခဲ့ရာ ဂိတ်မှူးက မိမိတို့ ဂိတ်သို့ ဆိုလာပြားများ လာရောက်အပ်နှံရာတွင် ဆိုလာတစ်ချပ်လျှင် တန်ဆာခငွေကျပ် ၇,၅၀၀/-ဖြင့် မိမိ ကိုယ်တိုင် စစ်ဆေးပြီးယူခဲ့ကြောင်း၊ အပျက်အစီးမရှိပါကြောင်း၊ ကားပေါ်တင်ချိန်တွင် မိမိဂိတ်မှ အလုပ်သမားပေါ့ဆမှုကြောင့် (၁)ချပ်ကွဲသွားပါကြောင်း၊ ၁၂-၄-၂၀၂၄ရက်နေ့တွင် ကျောက်ပန်းတောင်း ဂိတ်သို့ ရောက်ချိန်တွင် (၁)ချပ်ထပ်မံ၍ကွဲသွားပါကြောင်း၊ နောက်(၅)ရက်အကြာတွင် ထပ်မံ၍ ဆိုလာပြား (၅)ချပ်ကွဲကြောင်းပြောကြားသဖြင့် ကားပေါ်မှချစဉ်တွင် မိမိတို့အနေဖြင့် စစ်ဆေးယူထားသောကြောင့် ပေါက်ဈေးအတိုင်း အလျော်ပေးနိုင်မည်ဖြစ်ကြောင်း ပြောကြားရာ တိုင်ကြားသူမှ ဆိုလာပြားတစ်ချပ်၏ ပေါက်ဈေးမှာ ငွေကျပ် ၄၅၀,၀၀၀/-ရှိကြောင်း၊ (၂)ချပ်အတွက် လျော်ပေးမည် ဆိုပါကလည်း လက်ခံကြောင်း ပြောကြားခဲ့ပါသည်။ ၁၉-၆-၂၀၂၄ ရက်နေ့တွင် တိုင်ကြားခံရသည့် ကုန်စည်ပို့ဆောင်ရေးကားဂိတ်မှ တာဝန်ရှိသူက တိုင်ကြားသူ၏ Kpay account ထံသို့ ငွေကျပ် ၉၀၀,၀၀၀/-ကို လွှဲပြောင်းပေးခဲ့ရာ တိုင်ကြားသူက လက်ခံရရှိကြောင်းနှင့် ကျေနပ်မှုရှိကြောင်း ဌာနသို့ အကြောင်းကြားလာသောကြောင့် တိုင်ကြားမှုကို ပိတ်သိမ်းဆောင်ရွက်ခဲ့ပါသည်။