ဘူးသီးသည် မြန်မာ့ခြံထွက် သစ်သီးဝလံတစ်မျိုးဖြစ်ပါသည်။ တောင်ငူမြို့အနီးရှိကျေးရွာများတွင် ဘူးပင်များကို တစ်နိုင်တစ်ပိုင်စိုက်ပျိုးကြသူများ အပိုဝင်ငွေရရှိကြပါသည်။ ယခုအခါတွင် ဘူးသီးများလှိုင်လှိုင်ပေါ်နေပြီဖြစ်ရာ တောင်ငူမြို့ပေါ်ရှိ ဈေးများတွင် ရောင်းချလျက်ရှိနေပါသည်။
ဘူးသီးကို အသားဟင်းနှင့်ရော၍ ချက်စားကြပါသည်။ မြန်မာ့ရိုးရာ ဘူးသီးကြော်သည်လည်း လူအများကြိုက်သည့် အကြော်တစ်မျိုးဖြစ်ပါသည်။ တောင်ငူမြို့၊ ရပ်ကွက်တိုင်းလိုလိုပင် အကြော်ဆိုင်များရှိရာ ဘူးသီးသည် ရောင်းအားကောင်းလျက်ရှိပါသည်။
ဘူးသီးအပြင် ဘူးညွန့်ကိုလည်း ကြော်၍ဖြစ်စေ၊ အရည်သောက်ဟင်းချက်၍ဖြစ်စေ စားသုံးကြပါသည်။ ၂၀၂၄ခုနှစ်၊ ဩဂုတ်လ၊ တတိယအပတ်တွင် တောင်ငူမြို့ ညောင်ပင်ဈေးတွင် ဘူးသီးတစ်လုံးလျှင် ၁၅၀၀ကျပ်နှင့် ဘူးညွန့်တစ်စည်းလျှင် ၃၀၀ကျပ်၊ လေးစည်းယူလျှင် ၁၀၀၀ကျပ်ဖြင့်ရောင်းချလျက်ရှိ ကြောင်း ဟင်းသီးဟင်းရွက်ဆိုင်များမှသိရပါသည်။
DOCA(ပဲခူး)