မကွေးတိုင်းဒေသကြီး၊ မင်းဘူးခရိုင်၊ စလင်းမြို့နယ်ရှိ ဝက်သည်းကန်အတွင်း သဘာဝအလျှောက်ပေါက်ရောက်နေ့သည့် ပဒုမ္မာကြာတောကြီးမှာ ဧက(၃၅၀)ခန့် ကျယ်ဝန်းပြီး ကန်ပတ်လည်ကျေးရွာများဖြစ်သည့် ရှမ်းရွာကုန်ကျေးရွာ၊ အနောက်ကန်ဘောင်ကျေးရွာ၊ အောက်လှိုင်းကျေးရွာ၊ တမာချောင်းကျေးရွာ၊ ဆင်ကျုံးကျေးရွာနှင့် နယ်နမိတ်ထိစပ်လျက်ရှိသည့် ဒေသခံပြည်သူများ ကြာချည်အိမ်တွင်းထုတ်လုပ်သည့် လုပ်ငန်းဖြင့် ဝင်ငွေရရှိနေကြောင်း သိရှိရပါသည်။
ကြာရှည် ထုတ်လုပ်နိုင်ရန်အတွက် ကန်အတွင်းပေါက်ရောက်နေသည့် (၄)ပေအရှည် ပဒုမ္မာကြာရိုးများကို လှေပေါ်မှ တံစဉ်ဖြင့် ချိတ်ယူခူးပြီး (၃)လက်မခန့်အပိုင်းများပိုင်းကာ ကြာရိုးမှ ထွက်ရှိလာသော အစေးများကို သစ်သားခုံပေါ်တင်၍ လက်ဖြင့် လိမ်းကျစ်ပြီး ကြာချည်မျှင် ထုတ်လုပ်ရပါသည်။ စလင်းဝက်သည်းကန်မှ ထုတ်လုပ်သည့် ကြာချည်မှာ ကုန်ကြမ်းအဆင့်သာဖြစ်ပြီး ကြာရိုးမှ ထွက်ရှိလာသော ကြာချည်များကို ရှမ်းပြည်နယ် တောင်ပိုင်းအင်းလေးဒေသသို့ တင်ပို့ရောင်းချပြီး ဈေးနှုန်းအနေဖြင့် ယခင်နှစ်က တစ်ကျပ်သားကို ကျပ်(၆၀၀၀)သာ ရောင်းချခဲ့ရ သော်လည်း ယခုနှစ်တွင် တစ်ကျပ်သားကို (၇၀၀၀)ကျပ်ဈေးရရှိကြောင်း၊ တစ်ရက်လျှင် တစ်ဦး (၂.၃)ကျပ်သားထိ လုပ်ဆောင်သည့်အတွက် လုပ်သားတစ်ဦးအနေနဲ့ တစ်ရက်ပျမ်းမျှ ကျပ်(၁၄၀၀၀-၂၀၀၀၀)ဝန်းကျင် ဝင်ငွေရရှိကြောင်း၊ တစ်ချို့ အိမ်ထောင်စုများအနေဖြင့် (၄.၅)ကျပ်သားထိ လုပ်ကိုင်ဆောင်ရွက်နိုင်သည့်အတွက် တစ်ရက်လျှင်(၃၀၀၀၀)ကျပ်ထိ ပျမ်းမျှဝင်ငွေရရှိကြောင်း သိရှိရပါသည်။
DOCA(မကွေး)