မန္တလေးတိုင်းဒေသကြီး ၊ ကျောက်ဆည်ခရိုင်တွင် သီးနှံမျိုးစုံ စိုက်ပျိုးဖြစ်ထွန်းလျက်ရှိရာ စားဖိုဆောင်သီးနှံများဖြစ်သော ကြက်သွန်၊ငရုတ်တို့အပြင် ဗူးသီး သီးနှံကိုလည်း စီးပွားဖြစ်စိုက်ပျိုးလာကြပါသည်။ဗူးသီးသီးနှံကို ကျောက်ဆည်မြို့နယ်၊ ပင်တလည်နှင့် ကျောက်ခုံကျေးရွာများတွင် ပန်းလောင်ဖြစ်နံဘေးတွင် စိုက်ပျိုးကြပါသည်။ ဗူးသီးစိုက်ပျိုးရာတွင် မြေဆွေး ၊ မြေသြဇာများကို သမအောင်ရောမွှေပြီး စိုက်ဘောင်ပြုလုပ်၍ စိုက်ပျိုးရပါသည်။ဗူးသီးအမျိုးအစား အများအပြားရှိကြောင်း၊ အများဆုံးစိုက်ပျိုးသောမျိုးမှာ ဗူးသပိတ်၊ဗူးလည်လှနှင့် ဘူးရှည်မျိုးကို စိုက်ပျိုးကြကြောင်း၊ ဟင်းသီးဟင်းရွက်ပင်များအနက် ဗူးပင်မှာ တစ်နှစ်ပတ်လုံး စိုက်ပျိုး၍ရကြောင်း ၊ ဗူးပင်စိုက်ပျိုးမှု (၁)ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ၊ တိုင်ထောင်ဝါးများအပါအဝင် စုစုပေါင်း (၈၀၀၀၀၀/-)ကျပ်ခန့်ကုန်ကျကြောင်း၊ ဗူးပင်စိုက်ပျိုးပြီး(၇၅-၉၀)ရက်အကြာတွင် အသီးများစတင် ခူးဆွတ်၍ ရပါသည်။ဗူးသီးကို မနုမရင့် အနေတော်အနေအထားတွင် ခူးဆွတ်ရပါသည်။(၁)ဧက အထွက်နှုန်းအနေဖြင့် အလုံးရေ(၇၀၀၀-၈၀၀၀)အထိ ထွက်ရှိကြောင်း ၊ ဗူးသီးစျေးနှုန်းအနေဖြင့် အလုံးအရွယ်အစားပေါ်မူတည်၍ ဖောက်သည်စျေး(၅၀၀-၈၀၀)ကျပ်အထိ ရောင်းချရကြောင်း ၊ လက်လီစျေးအနေဖြင့် ဗူးသီးတစ်လုံးလျှင် (၁၀၀၀-၁၅၀၀)ကျပ်အထိ စျေးများ ရရှိကြောင်း၊ဗူးသီးကို စိုက်ခင်းများအထိ လာရောက်ဝယ်ယူကြသောပွဲစားများရှိကြောင်း ၊ ပွဲစားများမှ ခရီးသည်တင်ယာဉ်များဖြင့် ရန်ကုန်၊မော်လမြိုင်နှင့် ညောင်တုန်းမြို့ရှိစျေးများသို့ ပို့ဆောင်ရောင်းချပေးကြောင်း၊ ဗူးသီး စိုက်ပျိုးခြင်းဖြင့် ဗူးညွန့်များပါ ရောင်းချရကြောင်း၊ ဗူးညွန့်တစ်ညွန့်လျှင် (၁၀၀)ကျပ်စျေးနှုန်းဖြင့် ရောင်းချရသောကြောင့် အပိုဝင်ငွေများရရှိကြောင်း ၊ ဗူးသီးစိုက်ပျိုးပြီး စျေးကောင်းရသောကြောင့် တောင်သူများအကျိုးအမြတ်များကြောင်း ၊ ဗူးသီးစိုက်ပျိုးသော ပင်တလည်ကျေးရွာမှ တောင်သူတစ်ဦး၏ ပြောကြားချက်အရ သိရှိရပါသည်။
DOCA(မန္တလေး)