ပဲခူးတိုင်းဒေသကြီး၊ ပြည်ခရိုင် ၊ စားသုံးသူရေးရာဦးစီးဌာန၊ ပန်းတောင်းမြို့နယ်တာဝန်ခံနှင့်အဖွဲ့သည် နတ်မောက်အုပ်စု၊ ညောင်ကုန်းကျေးရွာသို့သွားရောက်၍ နွေစပါးစိုက်ပျိုးနေမှု၊ တစ်ဧကကုန်ကျစရိတ်များအား သိရှိနိုင်ရန် ကွင်းဆင်းလေ့လာခဲ့ပါသည်။
စားသုံးသူရေးရာဦးစီးဌာန၊ ပန်းတောင်းမြို့နယ်တာဝန်ခံနှင့်အဖွဲ့သည် (၁၉.၃.၂၀၂၂) ရက်နေ့ နံနက်(၁၁:၀၀)နာရီ အချိန်တွင် နတ်မောက်အုပ်စု၊ ညောင်ကုန်းကျေးရွာရှိ ကွင်းအမှတ် (၉၇)တွင် နွေစပါးများ စိုက်ပျိုးသူ တောင်သူဦးခင်ဌေးနှင့်တွေ့ဆုံပြီး ပြည်တွင်းကုန်သွယ်မှု ဖွံ့ဖြိုးတိုးတက်အောင် စိုက်ပျိုးထုတ်လုပ်နိုင်ရေးနှင့် နွေစပါး တစ်ဧကစိုက်ပျိုးထုတ်လုပ်ကုန်ကျစရိတ်များအား မေးမြန်းခဲ့ပါသည်။
ပြည်ခရိုင်အနေဖြင့် နွေစပါးစိုက်ဧကမှာ ၄၅၉၄၈ ဧက ရှိပြီး ပန်းတောင်းမြို့နယ်အနေဖြင့် လျာထားစိုက်ဧကမှာ ၁၈၄ ဧကရှိပြီး ၅၂ ဧကစိုက်ပျိုးပြီးဖြစ်ပါသည်။ နွေစပါးကို ဒီဇင်ဘာ လကုန်ပိုင်းနှင့် ဇန်နဝါရီလဆန်းပိုင်းတွင် စတင်စိုက်ပျိုးပြီး စိုက်ပျိုးသည့် စပါးမျိုးများမှာ ရတနာတိုး၊ ထိုင်းနှံကောက်မျိုးနှင့် ရက်(၁၂) သက်တမ်းမျိုးတို့ဖြစ်ပါသည်။ နွေစပါးစိုက်ပျိုးသူ ဦးခင်ဌေးအနေဖြင့် စိုက်ဧက (၄.၅၀)ဧကတွင် ထိုင်းနှံကောက်မျိုးကိုသာစိုက်ပျိုးပါသည်။ တစ်ဧကစိုက်ပျိုးထုတ်လုပ် ကုန်ကျစရိတ်မှာ ၄၅၀၀၀၀ ကျပ်ခန့် ကုန်ကျသည်ဟုသိရပါသည်။ နွေစပါးများ အထွက်နှုန်းကောင်းမွန်စေရေး၊ မြေဩဇာစနစ်တကျသုံးစွဲတတ်ရန်နှင့် ပိုးမွှားကျရောက်မှုကို စနစ်တကျ ကာကွယ်နှိမ်နင်းစေရန်အတွက် မြို့နယ်စိုက်ပျိုးရေးဦးစီးဌာနမှ နည်းပညာပေး ဆောင်ရွက်လျှက်ရှိသဖြင့် ယခုနှစ်တွင် နွေစပါးအထွက်နှုန်းကောင်းမည်ဟု မျှော်လင့်လျှက်ရှိပါသည်။ နွေစပါးများ ထွက်ပေါ်ချိန်တွင် ဈေးနှုန်းအနေဖြင့်လည်း စပါးတင်း(၁၀၀)လျှင် ကျပ် (၅)သိန်း ကျော်ရရှိပါက နွေစပါးစိုက်တောင်သူများအနေဖြင့် အထွက်နှုန်းလည်းကောင်း၊ ဈေးကောင်းလည်းရရှိမည်ဆိုလျှင် ပိုမို၍တွက်ချေကိုက်မည်ဖြစ်ကြောင်း သိရှိရပါသည်။
DOCA(ပဲခူး)