ရှမ်းပြည်နယ်(အရှေ့ပိုင်း)၊ ကျိုင်းတုံဒေသတွင် ချင်းကိုနှစ်စဉ်မတ်လအတွင်း အများဆုံးစိုက်ပျိုးလေ့ရှိကြပါသည်။ယခုနှစ်တွင် ချင်းဈေးကောင်း၍ စိုက်ပျိုးပြီး (၃)လအကြာ စိုက်ပျိုးထားသည့်ဂျင်းကို ပြန်လည်တူးဖော်၍ အပင်ပေါက်လာသည့်အတက်များကိုချိုး(ခုတ်)၍ အသစ်စိုက်ပျိုးပြီး တူးဖော်ထားသည့်ဂျင်းအဟောင်းများကို ပြန်လည်ရောင်းချကြပါသည်။ ချင်းအသစ်ကို စိုက်ပျိုးပြီး(၁၀)လအကြာတွင် တူးဖော်ရောင်းချကြောင်း သိရှိရပါသည်။
ချင်းဧကတစ်ဝက်ခန့် စိုက်ပျိုးမည်ဆိုပါက အပင်အကွာအဝေးပေါ်မူတည်ပြီး ချင်းမျိုး(၄၀) ခြင်းခန့်စိုက်ပျိုးရကြောင်း၊ တစ်ခြင်းလျှင် (၁၀)ပိဿာခန့်ရှိပြီး ဧကတစ်ဝက်ခန့်စိုက်လျှင် မျိုးပိဿာ (၄၀၀)ခန့် စိုက်ပျိုးရကြောင်းသိရှိရပါသည်။သွင်းအားစုများအနေဖြင့် နွားချေး၊ ကျွဲချေး အိတ်(၃၀)ခန့် ထည့်ရကြောင်း၊ နွားချေး တစ်အိတ်လျှင် (၅၀၀၀)ကျပ် ခန့်ပေးရကြောင်း၊ မြေပြုပြင်ခ၊ စိုက်ပျိုးခ၊ ပေါင်းရှင်းခ၊ တူးဖော်ခများအဖြစ် စုစုပေါင်းကျပ် (၂၀)သိန်းခန့် ကုန်ကျကြောင်း၊ ချင်းမျိုးခမှာပုံမှန်မရှိပဲ ယခုနှစ်တွင် တစ်ပိဿာကျပ် (၃၀၀၀/-)ကျော်ရှိသည့်အတွက် ချင်းမျိုးဖိုးကုန်ကျမှုများပြားကြောင်း သိရှိရပါသည်။
အခြားသီးနှံများနှင့်နှိုင်းယှဉ်လျှင် ချင်းသည် ပိုးသတ်ဆေး၊ မြေဩဇာများ ကြွေးရလေ့မရှိကြောင်းလည်း သိရှိရပါသည်။ ချင်းများရင့်၍ ပြန်လည်တူးဖော်သည့်အခါ မျိုးတစ်ခြင်းလျှင် ချင်းအသစ် (၈)ခြင်းခန့်တူးဖော်ရရှိသည့်အတွက် ဧကတစ်ဝက်ကို ဂျင်းမျိုး(၄၀၀)ပိဿာခန့်စိုက်လျှင် ချင်းသစ်(၃၂၀၀)ပိဿာခန့်ထွက်ရှိပြီး ထွက်ရှိသည့်ချင်းများကို ကျိုင်းတုံဈေးကွက်သို့ ရောင်းချကြောင်း၊ ယခုချိန်တွင်ချင်းဈေးကောင်း၍ တစ်ပိဿာကျပ်(၅၀၀၀/-)ခန့်ရှိသည့်အတွက် ချင်းစိုက်တောင်သူများ ဝင်ငွေကောင်းမွန်ရန် မျှော်လင့်လျက်ရှိကြောင်း သိရှိရပါသည်။
DOCA(ရှမ်း)