မကွေးတိုင်းဒေသကြီး၊ စလင်းမြို့နယ် ငလင်ပန်းကျေးရွာတွင် စားဖိုဆောင်သီးနှံဖြစ်သည့် ခရမ်းကျွတ်သီးကို မြေအောက်ရေတင်စနစ်ဖြင့် စိုက်ဧက(၁၀) ဧကခန့် စိုက်ပျိုးထားကြောင်း သိရသည်။
မျိုးအနေဖြင့် နှင်းဆီတံဆိပ် ခရမ်းကျွတ်မျိုးစေ့ တစ်ထုပ်လျှင် ကျပ်(၂၅၀၀၀)ဖြင့် စိုက်ပျိုးရေးဆေးဆိုင်များမှ ဝယ်ယူစိုက်ပျိုးကြကြောင်း၊ တစ်ဧကလျှင် မျိုးစေ့ (၂)ထုပ်ခန့် ကုန်ကျပြီး စိုက်ပျိုးရာတွင် မျိုးစေ့ကို ပထမဦးစွာ ပျိုးထောင်ရပြီး ရက်(၃၀)သားအရွယ်တွင် ဘောင်တန်းစီ၍ အတန်းလိုက်စနစ်ဖြင့် စိုက်ပျိုးကြောင်း၊ ၂၀၂၄ခုနှစ်၊ ဇူလိုင်လတွင် စတင်စိုက်ပျိုးပြီး စက်တင်ဘာလဆန်းတွင် လှိုင်လှိုင်ထွက်ပေါ်လျက်ရှိကြောင်း၊ စိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် တစ်ဧကလျှင် ကျပ်(၂၀၀၀၀၀၀)ကုန်ကျကြောင်း၊ (၁)ဧကအထွက်နှုန်းအနေဖြင့် ပိဿာ(၂၀၀၀)ခန့် ထွက်ရှိပြီး အကျိုးအမြတ်အနေဖြင့် သိန်း(၃၀)ခန့်ရရှိကြောင်း၊ စက်တင်ဘာလ(ဒုတိယပတ်)တွင် လက်ကားဈေး(၁)ပိဿာလျှင် ကျပ်(၂၅၀၀)ဖြင့် စလင်းမြို့ပေါ်ရှိ ကုန်စိမ်းပွဲရုံများမှ စိုက်ခင်းအရောက် လာဝယ်ယူကြကြောင်း၊ ယခင်နှစ်ကထက် ယခုနှစ်တွင်ဈေးပိုမိုရရှိသောကြောင့် တောင်သူများ ထိုက်သင့်သည့် အကျိုးအမြတ်များရရှိကြောင်း သိရှိရသည်။
DOCA(မကွေး)