မုံရွာမြို့တဖက်ကမ်းရှိ ဆားလင်းကြီးမြို့နယ်၊ ချင်းတွင်းမြစ်ရိုးတစ်လျှောက်မြေနုကျွန်းများနှင့် ရေဝင်အင်းများတွင် ဆောင်းသီးနှံ (မြေပဲ၊ ကုလားပဲ၊ ကြက်သွန်နီ၊ ပဲကြား) များရိတ်သိမ်းပြီးသည့် ရိုးပြတ်များတွင် မတ်လဆန်းမှစ၍ အစေထုတ်ပြောင်း (မိုးကြိုး)များ စတင်စိုက်ပျိုးလျက်ရှိကြောင်း သိရှိရပါသည်။
ဆားလင်းကြီးမြို့နယ်၊ ချင်းတွင်းမြစ်ရေဝင်ဒေသများဖြစ်သည့် လက်ပံတောင်၊ ကြီးဝဲကွဲ၊ နတ်ကျွန်း၊ ရွှေကုန်း၊ သဲတောကြီး၊ ထန်းတောကြီးကျေးရွာနှင့် ထန်းဇင်ကျေးရွာများသည် အစေ့ထုတ် ပြောင်း(မိုးကြိုး) ကို မြေအောက်ရေဖြင့် နှစ်စဉ်စိုက်ပျိုးလျှက်ရှိသည့် ဒေသများဖြစ်သည်။ ယခုနှစ်တွင် သွင်းအားစုဈေးနှုန်းများ မြင့်တက်မှုရှိသော်လည်း အစေ့ထုတ်ပြောင်း ဈေးကွက် ကောင်းရ ရှိနေသည့်အတွက် တောင်သူများစိုက်ပျိုးမှုများပြား လာကြောင်း သိရှိရပါသည်။ ဆောင်းသီးနှံများ ရိတ်သိမ်းပြီးသည့်ရိုးပြတ်များတွင် ထွန်စက်ဖြင့် ထွန်ယက်ပြီး ဘောင်ဆွဲကာ စိုက်ပျိုးခြင်းဖြစ်သည်။ ထွန်စက်ခအနေဖြင့် ယခင်နှစ်က တစ်နာရီကို (၁၈၀၀၀)ကျပ် ပေးရ သော်လည်း ယခုနှစ်တွင် တစ်နာရီကို (၂၅၀၀၀) ကျပ်ပေးချေနေရကြောင်း၊ တစ်ဧကလျှင် (၂) နာရီမျှ ထွန််ယက်ပြီး နွားထွန်ဖြင့် ဘောင်ဆွဲကာ ရေသွင်း၍ စိုက်ပျိုးရကြောင်း သိရှိရသည်။
ယခုလက်ရှိ စိုက်ပျိုးနေသည့်မျိုးများမှ ထိုင်းနိုင်ငံမှတင်သွင်းလာသည့် SP-888 မျိုးများဖြစ်ပြီး မျိုးစေ့ (၅)ကီလိုတစ်ထုပ်လျှင် (၄၅၀၀၀) ကျပ်ဖြင့် ဝယ်ယူရရပြီး တစ်ဧက( ၂)ထုပ်နှုန်းအသုံးပြုကာ စိုက်ပျိုးရကြောင်း သိရှိရသည်။ ယခုနှစ်တွင် တစ်ဧကစိုက်ပျိုးထုတ်လုပ်မှုအနေဖြင့် (၅)သိန်းကျော်ခန့် ကုန်ကျမည်ဖြစ်ပြီး တစ်ဧကအထွက်နှုန်းအနေဖြင့် တင်း( ၇၀-၈၀) ခန့်ထွက်ရှိနိုင်ကြောင်း လေ့လာ သိရှိရပါသည်။ ယခုစိုက်ပျိုးသည့် SP-888 မျိုးမှာ ရေငတ်ဒဏ်ခံနိုင်ခြင်း၊ အမြစ်နှစ် ထပ်ကုပ်ပြီး လေတိုက်သည့်ဒဏ်ကိုလည်းခံနိုင်ကြောင်း၊ အပင်ပေါ်တွင် အဖူးကြာ ရှည် အထားခံ ကြောင်း၊ အစေ့၏အတွင်းမှာ လိမ္မော်ရောင်တောက်ပြီး အလေးချိန်စီးကြောင်း တောင်သူများ၏ ပြောပြချက် အရ သိရှိရပါသည်။
ယခုမတ်လတွင် မုံရွာကုန်စည်ဒိုင်ဈေးကွက်၌ အစေ့ထုတ်ပြောင်း တစ်တင်းအနိမ့်ဈေး( ၁၆၅၀၀)ကျပ်နှင့် အမြင့်ဈေး(၁၈၃၀၀)ကျပ် ပေါက်ဈေးဖြင့် အရောင်းအဝယ်ဖြစ်လျှက်ရှိပြီး ဒေသတွင်းတိရိစ္ဆာန်အစာ စက်ရုံများနှင့် ရန်ကုန်၊ မန္တလေးရှိ တိရိစ္ဆာန်အစာစပ် စက်ရုံများမှ ဝယ်ယူမှု များရှိနေသလို ပြည်ပနိုင်ငံများမှလည်း ဝယ်လိုအားရှိနေကြောင်း မုံရွာဈေးကွက်ရှိ ပြောင်းကုန် သည်များထံမှ သိရှိရပါသည်။ ယခင်နှစ်မတ်လအတွင်း အစေ့ထုတ်ပြောင်း တစ်တင်း အနိမ့်ဈေး (၇၉၀၀) ကျပ်နှင့် အမြင့်ဈေး (၈၂၀၀)ကျပ်သာ ပေါက်ဈေးရှိခဲ့သည့်အတွက် ယခုနှစ်တွင် အစေ့ထုတ် ပြောင်းတစ်တင်းလျှင် (၈၀၀၀-၁၀၀၀၀)ကျပ်ခန့် ဈေးနှုန်းမြင့်တက် လျှက်ရှိကြောင်း သိရှိရပါသည်။
ယခုလက်ရှိမုံရွာဈေးကွက်တွင် အစေ့ထုတ်ပြောင်းဈေးကောင်းရနေသည့်အတွက် ဒေသတွင်း မှ ပြောင်းစိုက်တောင်သူများ အစေ့ထုတ်ပြောင်း (မိုးကြိုး) စိုက်ပျိုးရန်လည်း တောင်သူများ စီစဉ်ဆောင်ရွက်လျက်ရှိနေသည့်အတွက် ယခင်နှစ်ကထက် အစေ့ထုတ်ပြေင်း(မိုးကြို) စိုက်ပျိုးမှုများ ပိုမိုများပြားလာနိုင်ဖွယ်ရှိကြောင်း တင်ပြလိုက်ရပါသည်။