“မိတ္ထီလာမြို့ခရိုင်အတွင်းရှိ နွားနို့ခဲလုပ်ငန်းရှင်နှင့်တွေ့ဆုံခြင်း’’

             စားသုံးသူရေးရာဦးစီးဌာန ၊မန္တလေးတိုင်းဒေသကြီး၊ မိတ္ထီလာခရိုင်၊ ခရိုင်ဦးစီးမှူးရုံးမှ ခရိုင်ဦးစီးမှူး၏ ကြီးကြပ်မှုဖြင့် (၂၁.၃.၂၀၂၂) ရက်နေ့ (၉:၃၀)အချိန်တွင် မိတ္ထီလာခရိုင်ဦးစီးမှူးရုံးမှ ဦးစီးအရာရှိနှင့်အဖွဲ့ သည် မိတ္ထီလာမြို့နယ်ရှိမွေ‌ကျေးရွာမှ ဒေါ်သန်းသန်းဆင့် နွားနို့ခဲလုပ်ငန်းသို့ သွားရောက်လေ့လာဆွေးနွေးခဲ့ပါသည်။

            နွားနို့ခဲလုပ်ငန်းသည် မိရိုးဖလာလုပ်ငန်းဖြစ်ပြီး မိသားစုတစ်နိုင်တစ်ပိုင်စီးပွားရေးလုပ်ငန်းဖြစ်ကြောင်း၊ နွားနို့ခဲကျိုရာတွင်နွားနို့ကိုရေစစ်နှင့် စစ်ပြီးအိုးသန့်သန့်နှင့်ကျိုရကြောင်း၊နွားနို့်ထဲသို့ မရိုးစေးအားထည့်ရကြောင်းနှင့် ပထမဆုံးမီးပြင်းပြင်းနှင့် ကျိုပြီးနွားနို့ပွက်လျှင် မီးအေးအေးနှင့် ထားရကြောင်း၊ နွားနို့ခဲကို (၁) နာရီခွဲ (၂) နာရီခန့် ကျိုရကြောင်း၊ နွားနို့အဖတ်နှင့်အရည်ကွဲသွားပြီဆိုလျှင် ပိတ်ပါးလေးများနှင့် အထုတ်ကလေးများထုတ်ပြီး ရေစစ်ထားရကြောင်း၊ ရေစစ်သွားလျှင် မီးအေးအေးနှင့်ကင်ရကြောင်း သိရှိရပါသည်။

         နွားနို့ခဲပြုလုပ်ရာတွင် နွားနို့ကို နွားခြံများသို့ သွားရောက်ဝယ်ယူရကြောင်း၊ နွားနို့ (၁) ပိဿာလျှင် (၁၅၀၀) ကျပ်ဝယ်ယူရကြောင်း၊ တစ်နေ့နွားနို့အချိန် (၃၀) ခန့် ကျိုရကြောင်း၊ နွားနို့အချိန် (၁၀) ကျိုလျှင် နွားနို့ ခဲ (၂.၂၅) ပိဿာခန့်ထွက်ရှိကြောင်း၊ နွားနို့ခဲ (၁) ပိဿာလျှင် (၁၀၀၀၀) ကျပ် ရောင်းချရပြီး၊ နွားနို့ခဲရေခြောက်လျှင် (၃) ရက်ခန့်အထားခံသဖြင့် အညာဒေသလက်ဆောင်အဖြစ် ရန်ကုန်၊မန္တလေး၊ တောင်ကြီး၊ မော်လမြိုင်မြို့များသို့ တင်ပို့ကြောင်း သိရှိရပါသည်။

DOCA(မန္တလေး)