မကွေးတိုင်းဒေသကြီး၊ မကွေးမြို့နယ်၊ ဝါးတောချောင်ကျေးရွာတွင် နှမ်းနှင့် ပဲမျိုးစုံတို့ကို အဓိကစိုက်ပျိုးကြပြီး ဟင်းသီးဟင်းရွက်သီးနှံများကိုလည်း တစ်နိုင်တစ်ပိုင်စိုက်ပျိုးကြကြောင်း၊ ဘူးပင်စိုက်ဧက ၃ဧကခန့်စိုက်ပျိုးထားကြောင်းသိရသည်။
မျိုးအနေဖြင့် ဘူးလည်လှ၊ ဘူးရှည်မျိုးများကိုစိုက်ပျိုးပြီး တစ်ဧကလျှင် မျိုးစေ့(၁၀၀)ဂရမ်ထုပ် (၁၈)ထုပ်ခန့်ကုန်ကျကြောင်း၊ ဇွန်လလယ်တွင် စတင်စိုက်ပျိုးပြီး စက်တင်ဘာလ ပထမပတ်တွင် ခူးဆွတ်ရကြောင်း၊ စိုက်ပျိုးရာတွင် မြေဩဇာ၊ မြေဆွေးများကိုရောမွှေကာ စိုက်ပေါင်ပြုလုပ်ကာ ကျင်းတစ်ကျင်းနှင့်တစ်ကျင်းအကြား တစ်ပေခွဲအကွာခြား၍ ကျင်းတွင် အစေ့ထည့်စိုက်ပျိုးကြောင်း၊ စိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် တစ်ဧကလျှင် ငွေကျပ်၁၃၀၀၀၀၀ခန့်ကုန်ကျကြောင်း၊ အထွက်နှုန်းအနေဖြင့် ဘူးသီးလုံး (၅၀၀၀-၆၀၀၀) ထွက်ရှိပြီး ငွေကျပ်၁၂၀၀၀၀၀ခန့်အကျိုးအမြတ်ရရှိကြောင်းသိရသည်။
ဈေးနှုန်းအနေဖြင့် စက်တင်ဘာလ ဒုတိယပတ်တွင် လက်ကားဈေး ဘူးသီးတစ်လုံးလျှင် (၅၀၀-၁၀၀၀) ကျပ်ဖြင့် မကွေးမြို့ပေါ်ရှိ ကုန်စိမ်းရောင်းချသည့်ဈေးသည်များမှာ စိုက်ခင်းထိလာရောက်ဝယ်ယူကြကြောင်း၊ ဘူးပင်စိုက်ပျိုးခြင်းဖြင့် ဘူးသီးများသာမက ဘူးညွန့်များလည်းရောင်းချရသောကြောင့် အကျိုးအမြတ်များရရှိကာ တောင်သူများအဆင်ပြေလျက်ရှိကြောင်း သိရှိရပါသည်။
DOCA(မကွေး)