တောင်ငူမြို့ ရွှေဆံတော်ဘုရားဈေးတွင် ပေါ်ဦးပေါ်ဖျားထန်းမြစ်များရောင်းချနေပါသည်။ ထန်းမြစ်ကို တချို့မသိသောသူများက ထန်းပင်မှ အမြစ်ဟုထင်ကြပါသည်။ စား၍ရသော ထန်းမြစ်ဆိုသည်မှာ ရင့်မှည့်ပြီးကြွေကျသော ထန်းသီးအမှည့်များအား မြေကြီးအနက်တစ်တောင်ခန့်တူးထားသော ကျင်းထဲတွင်ထည့်ပြီး မြေပြန်ဖိ၍ ၃လခန့်ကြာသောအခါ ပြန်ဖော်ရာမှရရှိသော အပင်ပေါက်လေးများကို ထန်းမြစ်ဟုခေါ်ကြခြင်းဖြစ်ပါသည်။ ဆောင်းရာသီတွင် လှိုင်လှိုင်ပေါ်သော ထန်းမြစ်များမှာ ရာသီနှင့်လိုက်ဖက်လွန်းသော ရာသီစာအစားအစာတစ်မျိုးဖြစ်ပါသည်။
၂၀၂၄ခုနှစ်၊ စက်တင်ဘာလ၊ တတိယအပတ်တွင် တောင်ငူမြို့ ရွှေဆံတော်ဘုရားဈေးတွင် ထန်းမြစ် (၁၀) ချောင်းပါ တစ်စည်းလျှင် (၁၀၀၀) ကျပ်ဖြင့်ရောင်းချပေးနေပါသည်။ တောင်ငူမြို့အနီး အနောက်၊ မြောက်အရပ်ရှိ ဒေသများတွင် ထန်းပင် ထန်းတောများပေါများလှပါသည်။ ရွှေဆံတော်ဘုရားဈေးတွင် ရောင်းချနေသာထန်းမြစ်မှာ တောင်ငူမြို့နယ်၊ ကျောင်းကုန်းရွာ၌ ကိုယ်ပိုင်ပြုလုပ်၍ ရောင်းချသောထန်းမြစ်ဖြစ်ကြောင်း ထန်းမြစ်ရောင်းချသူတစ်ဦး၏ ပြောကြားချက်အရသိရှိခဲ့ပါသည်။
DOCA(ပဲခူး)