ရှမ်းပြည်နယ်(အရှေ့ပိုင်း)၊ ကျိုင်းတုံမြို့သည် စိုက်ပျိုးရေးကိုအဓိကထားစိုက်ပျိုးလုပ်ကိုင်သည့် မြို့တစ်မြို့ဖြစ်ပါသည်။ ကျိုင်းတုံမြို့ရှိ ပြည်သူများသည် ရာသီအလိုက် သီးနှံမျိုးစုံစိုက်ပျိုးကြပြီး အသက်မွေးဝမ်းကျောင်းပြုလျက်ရှိပါသည်။ ထိုသို့ စိုက်ပျိုးကြသော သီးနှံများမှ လွယ်လုံအုပ်စု၊ လွယ်လုံရွာရှိ သခွားသီးစိုက်ပျိုးမှုနှင့်ပတ်သက်၍ သိရှိနိုင်ရန် (၂၉.၃.၂၀၂၂) ရက်နေ့ (၁၄:၀၀) နာရီ အချိန်တွင် စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ တာဝန်ရှိသူများသည် တောင်သူတစ်ဦးနှင့် တွေ့ဆုံ၍ မေးမြန်းခဲ့ပါသည်။
သခွားသီးကို ရာသီမရွေးစိုက်ပျိုးနိုင်ပြီး ဆောင်းရာသီ၌ စိုက်ပျိုးလျှင် အသီးပိုမိုရရှိကြောင်း၊ မျိုးစေ့အနေဖြင့် ယိုးဒယားမျိုးစေ့ကို ဝယ်ယူစိုက်ပျိုးခြင်းဖြစ်ပြီး (၁) ကွက်လျှင် (၁၀) ထုပ်ခန့် စိုက်ပျိုး လေ့ရှိကြောင်း၊ (၄) ကွက်လျှင် (၁) ဧကခန့်ရှိကြောင်း၊ စိုက်ပျိုးပြီး (၃) ရက်ခန့်တွင် အပင်ပေါက်လေ့ရှိကြောင်း၊ အပင်ပေါက်ပြီး ပိုးသတ်ဆေး၊ အသီးအားဆေးနှင့် အရွက်ဖျန်းဆေးအား (၁) ပတ်ခြား (၁) ကြိမ်ဖျန်းပေးရကြောင်း၊ အနည်းဆုံး (၁၀) ကြိမ် ဖျန်းရကြောင်း၊ (၁၀) ရက်ခန့်တွင် မြေသြဇာကျွေးရပြီး အနည်းဆုံး (၅) ကြိမ်ခန့်ကျွေးရကြောင်း၊ (၁၅) ရက်ခန့်တွင် ဝါးတိုင်ထောင်ပေးရပြီး တိုင် (၁၀၀၀) ခန့်ထောင်ပေးရကြောင်း သိရှိရပါသည်။
စိုက်ပျိုးပြီး (၄၅) ရက်တွင် သခွားသီးစတင်ခူးဆွတ်ရကြောင်း၊ (၁) ကြိမ်ခူးလျှင် အလုံးရေ (၁၀၀၀) ခန့်ရရှိကြောင်း၊ (၂) ရက်ခြား (၁) ကြိမ်ခူးရကြောင်း၊ (၁) ပင်လျှင် (၅) လုံးမှ (၆) လုံးထိ ရရှိကြောင်း၊ (၁) လုံးလျှင် (၃၀၀) ကျပ်မှ (၅၀၀) ကျပ်ထိရရှိကြောင်း သိရှိရပါသည်။ တစ်ဆင့်ပြန်လည်ရောင်းချသူများမှ လာရောက်ဝယ်ယူပြီး ရောင်းချလျက်ရှိကြောင်းနှင့် (၁) ကြိမ်စိုက်ပျိုးလျှင် (၅) ကြိမ်အထိ ခူးဆွတ်ရပြီး စိုက်းပျိုးချိန်မှ ခူးဆွတ်ပြီးချိန်ထိ သက်တမ်း (၂) လခန့်သာရှိကြောင်း သိရှိရပါသည်။ ကုန်ကျစရိတ်အဖြစ် (၁) ကွက်လျှင် မျိုးစေ့၊ ပိုးသတ်ဆေး၊ အရွက်ဖျန်းဆေး၊ အသီးအားဆေး၊ မြေသြဇာ၊ ဝါးတိုင်နှင့် လုပ်အားခတို့အတွက် စုစုပေါင်း ကျပ်(၄) သိန်းခန့် ကုန်ကျပြီး ပြန်လည်ရရှိငွေအဖြစ် ကျပ်(၁၅) သိန်းခန့်ရရှိကြောင်း သိရှိရ ပါသည်။
သခွားသီးသည် ကျန်းမာရေးနှင့်ညီညွတ်ခြင်း၊ ရာသီမရွေး အလွယ်တကူဝယ်ယူနိုင်ပြီး အသင့်စားသုံးနိုင်ခြင်းတို့ကြောင့် ဝယ်ယူသူများလျက်ရှိပါသည်။ သို့ဖြစ်ပါ၍ သခွားသီးဝယ်ယူစားသုံးသူ များပြားသောကြောင့် တပိုင်တနိုင်စိုက်ပျိုးခြင်းဖြင့် တောင်သူများအတွက် အကျိုးအမြတ်ရရှိနေသော သီးနှံတစ်မျိုးဖြစ်ကြောင်း ရေးသားလိုက်ရပါသည်။
DOCA(ရှမ်း)