မြင်းခြံခရိုင်၊ မြင်းခြံမြို့အနေဖြင့် မြေပဲစိုက်ဧက (၂၀၀၄၂) ဧကရှိပါကြောင်း၊ ယခင်နှစ် စိုက်ဧက (၁၈၉၈၆) ဧကသာရှိသည့်အတွက် ယခုနှစ်တွင် စိုက်ဧက အနည်းငယ်ပိုမိုစိုက်ပျိုးထားကြောင်း သက်ဆိုင်ရာဌာန၏ ကိန်းဂဏန်းအချက်အလက်များမှသိရသည်။ မြို့ပေါ်ဈေးကွက်တွင် ယခင်မြေပဲဆန်(ဟောင်း)တစ်ပိဿာလျှင် ၁၀၀၀၀ကျပ်၊ ၁၀၂၀၀ကျပ်ရှိခဲ့ရာမှ ယခုမိုးဦးစိုက် မြေပဲဆန် (တစ်ပေါက်ကျ)များ ဈေးကွက်အတွင်း ဝင်ရောက်လာသည့်အတွက် ယခင်မြေပဲဆန်(ဟောင်း) ဈေးသည် ယခု ၉၁၀၀ကျပ်၊ ၉၂၀၀ကျပ်သာရှိခဲ့ပြီး ကုန်ချိန်ပိဿာ (၄၀၀၊ ၅၀၀) ခန့်သာအရောင်းအဝယ်ရှိခဲ့ကြောင်းသိရသည်။ ဈေးကွက်အတွင်း ဝင်ရောက်လာသော မြေပဲဆန်များသည် ကျောက်ပန်းတောင်းမြို့နယ်မှထွက်ရှိသော မိုးဦးစိုက်မြေပဲဆန်များသာဖြစ်ပြီး တစ်ရက်လျှင် ပိဿာ၄၀၀၀၊ ၅၀၀၀အကြားအဝင်ရှိပြီး မြေပဲဆန် (တစ်ပေါက်ကျ)တစ်ပိဿာလျှင် ၈၆၀၀ကျပ်၊ ၈၇၀၀ကျပ်ဈေးဖြင့် မြို့ပေါ်ဆီစက်လုပ်ငန်းရှင်များနှင့် အခြားလုပ်ငန်းသုံး လုပ်ငန်းရှင်များမှ ပုံမှန်ဝယ်ယူလျက်ရှိကြောင်းသိရသည်။ ၂၀၂၄ခုနှစ်၊ အောက်တိုဘာလ ပထမပတ်တွင် မြင်းခြံဒေသစိုက်မြေပဲများလည်း ထွက်ပေါ်လာမည်ဖြစ်သည့်အတွက် မြေပဲဆန်ဈေးထပ်မံကျဆင်းနိုင်ဖွယ်ရှိကြောင်း လုပ်ငန်းရှင်တစ်ဦး၏ ပြောကြားမှုအရသိရပါသည်။
DOCA(မန္တလေး)