ပဲတောင့်ရှည်တွင် အပင်ပုမျိုး(နွယ်မဲ့)မျိုးနှင့် အပင်ရှည်မျိုး (နွယ်တတ်မျိုး)ဟူ၍ နှစ်မျိုးရှိပါသည်။ အပင်ရှည်မျိုးကို တိုင်ထောင်၍ စိုက်ပျိုးကြရသည်။ အတောင့်အရောင်အားဖြင့် အစိမ်းနု၊ အစိမ်းရင့်၊ အနီရောင်ဟူ၍ အမျိုးမျိုးရှိပါသည်။ ရာသီဥတုသင့်တင့်သောဒေသတွင် တစ်နှစ်ပတ်လုံး စိုက်ပျိုးနိုင်ပါ သည်။ ပဲတောင့်ရှည်ပင်စိုက်ပျိုးရာတွင် ရေမဝပ်စေရန် မြေကိုပြုပြင်ပေးရသည်။ မျိုးစေ့စိုက်ပျိုးရာတွင် အစိုဓာတ်များလွန်းလျှင် အစေ့များပုပ်သွားတတ်သည်။ ပဲစေ့စိုက်ပြီး(၇)ရက်အကြာတွင် အပင်စတင် ထွက်ပေါ်လာပြီး တစ်ပင်နှင့်တစ်ပင် တစ်ပေခြား၍ စိုက်ပျိုးရပါသည်။ အပင်ပေါက်ပြီး (၂၀)ရက်အကြာ တွင် မြေသြဇာထည့်ပေးရပါသည်။ ပေါင်းမြက်များကို နှိမ်နှင်းပေးရသည်။ အပွင့်ပွင့်ချိန်တွင် ပိုးမကျစေ ရန် ဂရုစိုက်ရသည်။ ပဲတောင့်ရှည်သီးတွင် သီးလုံးဖောက်ပိုးများ ကျရောက်တတ်သည့်အတွက် ပိုးသတ်ဆေးများ ပက်ဖြန်းကာကွယ်ရပါသည်။ ပဲတောင့်ရှည်ကို တစ်ရက်ခြား တစ်ခါခူးပေးရပါသည်။ ၂၀၂၄ခုနှစ် စက်တင်ဘာလတတိယအပတ်တွင် ပဲတောင့်ရှည် လက်ကားဈေးမှာ တစ်တောင့်လျှင် (၁၂) ကျပ်ဖြစ်ပြီး လက်လီဈေးမှာ (၁၅)ကျပ်ဖြင့် ပေးပို့ရောင်းချကြောင်း သီးနှံစိုက်ပျိုးသည့်တောင်သူများထံမှ သိရှိရပါသည်။ ပဲတောင့်ရှည်ပင်သည် မိသားစုအတွက် အပိုဝင်ငွေရရှိသည့်အတွက် တောင်သူများအတွက် စိုက်ပျိုးသင့်သော သီးနှံတစ်မျိုးဖြစ်ပါသည်။
DOCA(ပဲခူး)