စစ်ကိုင်းတိုင်းဒေသကြီး၊ မုံရွာမြို့နယ်၊ မအူကျေးရွာတွင် မြေပဲဆားလှော်လုပ်ငန်းရှင်(၁၆)ဦးခန့် ရှိရာ မြေပဲဆားလှော်ထုတ်လုပ်ဖြန့်ဖြူးရောင်းချမှု အရောင်းအဝယ်သွက်လျက်ရှိကြောင်းသိရသည်။
မြေပဲကို အဓိကအားဖြင့် စားသုံးဆီကြိတ်ခွဲထုတ်လုပ်မှုအနေဖြင့် စားသုံးကြသည်။ ထို့အပြင် မြေပဲဆားလှော်၊ မြေပဲစိမ့်ကြော်၊ မြေပဲယိုနှင့် အခြားအဆာပြေမုန့်များအဖြစ်လည်း စားသုံးမှုပြုကြသည်။ မြေပဲဆားလှော်ထုတ်လုပ်ပုံအဆင့်ဆင့်ကို လေ့လာရာတွင် ကုန်ကြမ်းများမှာ မြေပဲ၊ ဆားနှင့် လျှပ်စစ်(သို့မဟုတ်)ထင်းမီးသွေးလောင်စာများဖြစ်ကြောင်း၊ မြေပဲဆံကုန်ကြမ်းကို မုံရွာကုန်စည်ဒိုင်မှ မြေပဲလုံးဆံ တစ်တင်းလျှင် (၅၂၅၀၀)ကျပ်နှုန်းဖြင့် ဝယ်ယူရကြောင်း၊ မြေပဲလုံးဆံများကို အရွယ်ညီအောင်ဇကာချရွေး၍ ဖုန်သဲခဲများ ဖယ်ထုတ်သန့်စင်ရကြောင်း၊ ရွေးပြီးမြေပဲဆံများကို ရေနွေး ပွက်ပွက်ဆူတွင်ထည့်ပြုတ်ကာ အခွံရှုံ့တွလာပါက ဆယ်ယူနေလှန်း ခြောက်အောင်ပြုလုပ်ရကြောင်း၊ မြေပဲ(၂)ပြည်လျှင် ဆား ၇၅ ကျပ်သားနှုန်းဖြင့် ဒယ်အိုးထဲတွင် ဆားနှင့်မြေပဲကိုထည့်၍ လှော်ရကြောင်း၊ အဆက်မပြတ်မွှေပေးရရာ ယခင်က လူအင်အားဖြင့် ယောက်မအကြီးများဖြင့် မွှေကြပြီး ယခုအခါ မွှေသည့်စက်ဒလက်ဖြင့် မွှေကြကြောင်း၊ မြေပဲဆားလှော်လုပ်ငန်းအသေးအကြီးအလိုက် လုပ်သားအင်အားကွာခြားနိုင်ပြီး မြေပဲလုံးဆံတင်း(၈၀)ခန့်လှော်ရန် တစ်နေ့လျှင် လုပ်သား(၃၀)ခန့် အသုံးပြုရပြီး လုပ်သားခငွေကျပ်(၅၀၀၀)ပေးချေရကြောင်း၊ ဈေးကွက်ဈေးနှုန်းအနေဖြင့် မြေပဲဆားလှော် တစ်ပြည်လျှင် လက်ကား(၃၆၀၀)ကျပ်နှင့် လက်လီဈေး (၄၀၀၀)ကျပ်နှုန်းဖြင့် ရန်ကုန်၊ မန္တလေး၊ မြစ်ကြီးနား၊ တောင်ကြီး၊ တာချီလိတ်၊ နမ့်ခမ်း၊ ပဲခူးဒေသများနှင့် တိုင်းတွင်းဖြစ်သော စစ်ကိုင်း၊ ရေဦး၊ ဖောင်းပြင်၊ ဟုမ္မလင်း၊ တမူး၊ ကလေးမြို့များသို့ တင်ပို့ရောင်းချပြီး မုံရွာ-မန္တလေးကားလမ်းဘေး မအူကျေးရွာ၏ ရွာထိပ်တွင်လည်း ဆိုင်ခန်းများဖွင့်လှစ်ရောင်းချကြောင်း သိရသည်။
ပြည်တွင်းပြည်ပခရီးသွားများသည် မတူကွဲပြားသည့်အရပ်ဒေသတစ်ခု၏ ရိုးရာအစားအသောက်တစ်ခုအနေဖြင့် မုံရွာမြေပဲဆားလှော်ကို စားသုံးရန်အပြင် လက်ဆောင်အဖြစ်ပေးကမ်းရန် အနေဖြင့်လည်း ဝယ်ယူမှုများကြောင်းသိရသည်။
DOCA(စစ်ကိုင်း)