ဆိပ်ဖြူမြို့ အနောက်ပိုင်းရပ်ကွက်ရှိ ကြက်သွန်နီ အရောင်းအဝယ်ဖြစ်လျက်ရှိသော ကုန်စည်ဒိုင် သို့ မတ်လ(၁၅ ရက် မှ ၃၁ ရက်)ဒုတိယ(၂)ပတ်အတွင်း ကြက်သွန်နီ ဆောင်းစိုက်ပင်စိုက်အသစ်များ ဆိပ်ဖြူမြို့နယ် ဒေသတွင်းနေရာအနှံ့အပြားမှ နေ့စဉ်ဝင်ရောက်လျက်ရှိပြီး တစ်ရက်လျှင် ပျမ်းမျှ ကြက်သွန်နီကုန်ချိန်ပိဿာ(၄)သောင်းခန့်နှင့် (၂)ပတ်အတွင်း စုစုပေါင်းပိဿာ (၅)သိန်းခန့် ကုန်စည်ဒိုင် သို့ဝင်ရောက်ခဲ့ကြောင်း သိရှိရသည်။
မတ်လဒုတိယ(၂)ပတ်အတွင်း ကြက်သွန်နီအသစ် တစ်ပိဿာ ထိပ်စ(ရှယ်) အမြင့်ဆုံး ဈေးနှုန်းမှာ (၆၂၅)ကျပ် မှ (၅၇၅)ကျပ် အထိ ကုန်စည်ဒိုင်ဖြတ်ဈေး နှုန်းဖြစ်ခဲ့ပြီး အနိမ့်ဆုံးဈေးနှုန်းမှာ (၅၀၀)ကျပ် မှ (၂၅၀)ကျပ် အထိ ဈေးနှုန်းများဖြင့် အရောင်းအဝယ်ဖြစ်ခဲ့ကြောင်း၊ ကြက်သွန် အရည်အသွေးများမတူညီခြင်းကြောင့် ဈေးနှုန်းများ ကွာခြားကြောင်း၊ ယခင်နှစ်ပတ် ဈေးနှုန်းထက် ကြက်သွန်နီထိပ်စ(ရှယ်) ဈေးနှုန်းမှာ (၁၅၀)ကျပ်ခန့် ကျဆင်းခဲ့ကြောင်း၊ ပြည်ပဝယ်လက်နည်း၍ ဈေးအနည်းငယ်ကျဆင်းသွားခြင်းဖြစ်ကြောင်း၊ ထို့အပြင်မိုးများစွာရွာသွင်းခြင်းကြောင့် တောင်သူများ အနေဖြင့် ကြက်သွန်တူးဖော်ရန် အခက်အခဲဖြစ်၍ ကုန်စည်ဒိုင်သို့ ဒုတိယ(၂)ပတ်အတွင်း ကြက်သွန်နီ အသစ် ကုန်ချိန်အဝင်နည်းသွားကြောင်း သိရှိရပါသည်။
ဆိပ်ဖြူမြို့တွင် ကြက်သွန်နီ(အသစ်)တစ်ပိဿာလျှင် လက်လီဈေးနှုန်းအနေဖြင့် ထိပ်စ(ရှယ်) ကျပ်(၁၀၀၀/ ၉၀၀)၊ အလတ်စ(ကြီး) ကျပ်(၈၀၀/၇၀၀)၊ အလတ်စ(သေး) ကျပ်(၆၀၀/၅၀၀)ဈေးနှုန်းဖြင့် အရောင်းအဝယ်ဖြစ်လျက်ရှိကြောင်း၊ ကုန်စည်စီးဆင်းမှုအနေဖြင့် ဒုတိယ(၂)ပတ်အတွင်း ဆိပ်ဖြူမှ ရန်ကုန်(ဘုရင့်နောင်)သို့ ကားအစီးရေ (၅၂)စီး၊ ပြည်မြို့ (၁၁)စီး၊ စစ်တွေမြို့(၂)စီး၊ မြဝတီမြို့(၁၀)စီး၊ နေ့စဉ် (၆/၁၂)ဘီးမော်တော်ယာဉ်များဖြင့် စုစုပေါင်းကားစီးရေ(၇၅)စီးခန့် ထွက်ရှိပြီး တန်ချိန် (၃၀၀၀၀) ခန့် စီးဆင်း၍ ကြက်သွန်နီ တစ်ပိဿာလျှင် သယ်ယူစရိတ်အနေဖြင့် ဆိပ်ဖြူမှရန်ကုန် (ဘုရင့်နောင်) (၉၅)ကျပ်၊ ပြည်မြို့(၇၀)ကျပ်၊ စစ်တွေ (၁၆၀)ကျပ်၊ မြဝတီ(၁၂၀)ကျပ် ဈေးနှုန်းများဖြင့် ကုန်စည် စီးဆင်းခဲ့ကြောင်း သိရှိရပါသည်။
DOCA(မကွေး)