စားသုံးသူရေးရာဦးစီးဌာန၊ မကွေးတိုင်းဒေသကြီး၊ မကွေးခရိုင်၊ မကွေးမြို့နယ်ဦးစီးမှူး ဦးမျိုးဝင်း(စစ်ဆေးအရာရှိ) နှင့်မကွေးခရိုင်ရုံးမှ ဝန်ထမ်းများသည် (၆.၄.၂၀၂၂)ရက်နေ့ နံနက်(၀၉:၀၀)နာရီမှ (၁၁:၀၀)နာရီထိ မကွေးမြို့ပေါ်ရှိ မော်တော်ဆိုင်ကယ်နှင့် စပ်ဆက်ပစ္စည်းအရောင်းဆိုင်များ၊ လက်လီ/လက်ကား ဖြန့်ဖြူးရောင်းချသော စက်ဆီ/ချောဆီ အရောင်းဆိုင်များသို့ အရည်အသွေးနိမ့် စက်ဆီ/ချောဆီများ ရောင်းချဖြန့်ဖြူးမှုမရှိစေရေး အသိပေးရှင်းလင်းဆွေးနွေးခြင်းများ ဆောင်ရွက်ခဲ့ပါသည်။
ထိုသို့ဆောင်ရွက်ရာတွင် မော်တော်ဆိုင်ကယ်နှင့် စပ်ဆက်ပစ္စည်းအရောင်းဆိုင်များ၊ စက်ဆီ/ ချောဆီဖြန့်ဖြူးရောင်းချသော လုပ်ငန်းရှင်များအနေဖြင့် နာမည်ရှိ အမှတ်တံဆိပ်ဖြစ်သည့် (Falcon) အမှတ်တံဆိပ်၊ (Trane)အမှတ်တံဆိပ်၊ (Crocodile)အမှတ်တံဆိပ်များကို ဆင်တူယိုးမှား အတုအပ ပြုလုပ်၍ တရားမဝင် တင်သွင်းဖြန့်ဖြူးရောင်းချလျှက်ရှိရာ အရောင်းဆိုင်များအနေဖြင့် ကုန်ပစ္စည်း အတုအပများအား မှားယွင်းဝယ်ယူ ရောင်းချခြင်းမရှိစေရေး၊ ကုန်ပစ္စည်းအတုနှင့် အစစ်ခွဲခြား သိရှိနိုင်သည့် သတင်းအချက်အလက်များအား ဖြန့်ဝေအသိပေး ရှင်းလင်းခဲ့ပြီး တရားဝင်တင်သွင်း ခွင့် လိုင်စင်ရယူဆောင်ရွက်သည့် ကုမ္ပဏီများမှ တင်သွင်းထုတ်လုပ်သည့် ပစ္စည်းများကိုသာ မှာယူ ရောင်းချသွားရန်နှင့် တရားမဝင်လုပ်ငန်းလိုင်စင်မရှိဘဲ စျေးကွက်အတွင်း အရည်အသွေးနိမ့် စက်ဆီ/ ချောဆီများ ရောင်းချခြင်းဖြင့် နိုင်ငံတော်အတွက် အခွန်အခများနစ်နာခြင်း၊ စားသုံးသူများ၏ စက်ပစ္စည်းများ အချိန်မတိုင်မီပျက်စီးမှု ဖြစ်ပေါ်စေခြင်း၊ ထို့ကြောင့်တရားမဝင် စက်ဆီ/ချောဆီများ ဆိုင်တင်ရောင်းချခြင်း မပြုလုပ်ကြရန် ဖြန့်ဖြူးရောင်းချခြင်းအား စစ်ဆေးတွေ့ရှိပါက ဥပဒေအရ အရေးယူဆောင်ရွက်ခံရမည်ဖြစ်ကြောင်း အသိပညာပေးဆွေးနွေးခဲ့ပါသည်။
DOCA(မကွေး)