ဧရာဝတီတိုင်းဒေသကြီး၊ မြန်အောင်ခရိုင်၊ မြန်အောင်မြို့နယ်၏ ဂုဏ်သတင်းကျော်ဇောမှုများအနက်မှ ကယေကယာမုန့်သည် တစ်ခုအပါအဝင်ဖြစ်ပါသည်။ မြန်အောင်မြို့နယ်၏ MSMEs ပြပွဲ၊ ဈေးရောင်းပွဲတော်များမှတစ်ဆင့် ခရိုင်၊ ခရိုင်မှတစ်ဆင့် တိုင်းဒေသကြီးအတွင်း၊ တိုင်းဒေသကြီးမှတစ်ဆင့် မြန်မာပြည်အနှံ့သို့ ဂုဏ်သတင်းကျော်ကြားခဲ့သည့် မြန်မာ့ရိုးရာ စားစရာ ကယေကယာပင် ဖြစ်ပါသည်။
ကယေကယာ၏ အဓိကပါဝင်ပစ္စည်းများမှာ ကောက်ညှင်းဆန်ကို အမှုန့်ပြုလုပ်ထားသည့် ကောက်ညှင်းမုန့်၊ အုန်းသီး၊ သကြား၊ နိူ့ဆီ၊ ထောပတ်၊ ဆား စသည့် ပစ္စည်းများပါဝင်ပါသည်။ ထိုပါဝင်ပစ္စည်းများကို မျှတစွာရောစပ်ပြီး အပူပေးကြိုချက်ရာတွင် မန်ကျည်းသားထင်းကိုအဓိကထား အသုံးပြုသည့်အတွက် ရရှိထွက်ပေါ်လာသော ကယေကယာ၏ အရောင်၊ အနံ့၊ အရသာမှာ တမူထူးကဲခြင်းတို့ကြောင့် ထင်ပေါ်ကျော်ကြားခဲ့ခြင်းဖြစ်ပါသည်။
ကယေကယာကို မြန်အောင်မြို့နယ်၏ အဓိကထွက်ရှိသောဒေသထွက်ကုန်များကိုဦးစားပေးထည့်သွင်း စီမံထုတ်လုပ်ခဲ့သည့်အတွက် ဒေသထွက်ကုန် MSMEs အဖြစ် အမည်တွင်ခဲ့သည်မှာ နှစ်ပေါင်းကြာခဲ့ပြီ ဖြစ်ပါသည်။ မြန်အောင်မြို့၏ ဒေသလက်ဆောင် MSMEs တွင် ကယေကယာကို ချန်လှပ်၍မရပါကြောင်း တင်ပြအပ်ပါသည်။
DOCA(ဧရာဝတီ)