မကွေးတိုင်းဒေသကြီး၊ အထက်မင်းလှမြို့နယ်၊ ကုန်းကြီးကျေးရွာအုပ်စုရှိ ဂျင်ရဲမြောင်(စံပြ) ကျေးရွာသည် ကုလားပဲ၊ ပြောင်း၊ ကြက်သွန်နီနှင့် အခြားမီးဖိုချောင်သုံးသီးနှံများကို ရာသီအလိုက် စိုက်ပျိုးလျက်ရှိပြီး ဝါသီးနှံ(၈၀)ဧကကို တောင်သူ(၇၀)ဦးမှ ၂၀၂၄ခုနှစ်၊ စက်တင်ဘာလ(ပထမပတ်) တွင် စတင်စိုက်ပျိုးခဲ့ကြောင်း သိရသည်။
ဂျင်ရဲမြောင်(စံပြ)ကျေးရွာနေ တောင်သူ ဦးသန်းဇော်ဌေးက ၎င်းအနေဖြင့် ဝါသီးနှံ(၆)ဧကခန့် စိုက်ပျိုးထားကြောင်း၊ မျိုးအနေဖြင့် ၆၆၆မျိုး၊ ရွှေတောင်-၈မျိုးကို အထက်မင်းလှမြို့ရှိ စိုက်ပျိုးရေး ဆေးဆိုင်များမှ (၁)ပိဿာလျှင် ကျပ်(၃၅၀၀-၄၀၀၀)ဖြင့် ဝယ်ယူကြောင်း၊ စိုက်ပျိုးရာတွင် ထွန်ကြောင်း ဆွဲပြီး မျိုးစေ့ကိုလက်ဖြင့်ဖြူးချစနစ်ဖြင့် စိုက်ပျိုးကာ (၁)ဧကလျှင် မျိုး(၇)ပိဿာခန့်ကုန်ကျကြောင်း၊ (၃)လအကြာတွင် ခူးဆွတ်ရကြောင်း၊ ကုန်ကျစရိတ်အနေဖြင့် ယခင်နှစ်နည်းတူ ယခုနှစ်တွင်လည်း (၁)ဧကလျှင် ကျပ်(၃၀၀၀၀၀)ခန့်ကုန်ကျကြောင်း၊ ယခင်နှစ်က မိုးများ၍ ဝါအထွက်နှုန်းလျော့ကျခဲ့ပြီး (၁)ဧကလျှင် ပိဿာချိန်(၅၀၀-၆၀၀)ကြားထွက်ရှိကာ (၁)ပိဿာလျှင် ကျပ်(၂၈၀၀-၃၀၀၀)ဈေးရရှိခဲ့ ကြောင်း သိရသည်။
၂၀၂၄ခုနှစ်၊ နိုဝင်ဘာလ(ပထမပတ်)တွင် ဝါ(၁)ပိဿာလျှင် ကျပ်(၃၂၀၀-၃၅၀၀)ဖြင့် အရောင်း အဝယ်ဖြစ်လျက်ရှိကြောင်း၊ ဈေးကွက်အနေဖြင့် မြို့ပေါ်ပွဲရုံများမှတဆင့် မန္တလေးတိုင်းဒေသကြီးသို့ တင်ပို့ရောင်းချကြောင်း၊ ယခုနှစ်တွင်မူ ရာသီဥတုကောင်းမွန်၍ ဝါသီးနှံစိုက်ခင်းများ အောင်မြင်ဖြစ်ထွန်း လျက်ရှိရာ ယခင်နှစ်ကထက် အထွက်နှုန်းပိုမိုကောင်းမွန်နိုင်မည်ဖြစ်ကြောင်း သိရှိရပါသည်။
DOCA(မကွေး)