ကင်ပွန်းချဥ်ပင်သည် မြန်မာနိုင်ငံနေရာအနှံ့အပြားတွင် ပေါက်ရောက်လေ့ရှိသော အပင်တစ်မျိုးဖြစ်ပါသည်။ကင်ပွန်းချဥ်ပင်သည် ဆူးပုတ်ပင်ကဲ့သို့ ပုံသဏ္ဍာန်ရှိပြီး ချဥ်သောအရသာရှိပါသည်။ကင်ပွန်းချဥ်ပင်သည် အရွက်ရောအသီးပါ အသုံးဝင်သော အပင်တစ်မျိုးဖြစ်ပါသည်။ကင်ပွန်းသီးသည် အတောင့်ရှည်တစ်မျိုးဖြစ်၍ အစေ့များကြားတွင် အဆစ်လေးများ ရှိပါသည်။မြန်မာတို့၏ ရှေးရိုးရာ တလျော်ကင်ပွန်းခေါင်းလျှော် ရည်ထဲတွင်ပါဝင်သော ကင်ပွန်းသီးမှာ ကင်ပွန်းချဥ်ပင်မှရသော အသီးဖြစ်ပါသည်။ကင်ပွန်းသီးကိုပြုတ်၍ တလျော်နှင့်လျှော်လျှင် ဆံပင်ကိုသန်စွမ်းစေပြီး ဦးရေပြားကို အေးမြစေပါသည်။အစာအိမ်ရောဂါ၊ သွေးနှင့် ပတ်သတ်သောရောဂါများအတွက် ဆေးဖော်စပ်ရာတွင်လည်းအသုံးပြုပြီး မြွေဆိပ်ကုရာ၌လည်း အသုံးပြုပါသည်။
အရွက်များကိုမူ ချက်ပြုတ်စားသောက်ခြင်းအပြင် ဆေးအနေနှင့်လည်းအသုံးပြု၍ရပါသည်။ အရွက်များကို ကြိတ်၍ အသည်းရောင်အသားဝါရောဂါသည်များကို တိုက်လျှင် သက်သာစေပြီး အသည်းရောင်နေရာ လိမ်းပေးခြင်းဖြင့် အရောင်ကျစေပါသည်။ကျောက်ကပ်ကို အားပေးသည့်အတွက် ဆီးရွှင်စေပါသည်။ လေနှင့် ပတ်သက်သောရောဂါများလည်း သက်သာစေပြီး ဝမ်းပျော့စေပါသည်။ အစာအိမ်လမ်းကြောင်း မကောင်းသူများ သောက်ပေးသင့်သည့် ဆေးဖက်ဝင်အပင်တစ်မျိုးဖြစ် ပါသည်။ကင်ပွန်းချဥ်ပင်သည် ဘေးထွက်ဆိုးကျိုး မရှိသည့်အပြင် နေရာတိုင်းအလွယ်တကူရရှိနိုင်သော အပင်တစ်မျိုးဖြစ်ပါသည်။ ထားဝယ်ဒေသတွင် ကင်ပွန်းချဥ်တစ်စီးလျှင် (၇၀၀)ကျပ်ဖြင့် ရောင်းချနေကြောင်း သိရှိရပါသည်။
DOCA(တနင်္သာရီ)