ဧရာဝတီတိုင်းဒေသကြီး၊ မအူပင်ခရိုင်သည် စပါးကို အဓိကစိုက်ပျိုးပြီး ရေထွက်ကုန်၊ လယ်ယာထွက်ကုန်များ လုပ်ငန်းများ လုပ်ကိုင်ဆောင်ရွက်နိုင်ရန် မြေခံ၊ ရေကန် ကောင်းမွန်သော မြို့နယ်တစ်ခုဖြစ်သည်။
ဧရာဝတီတိုင်းဒေသကြီး၊ မအူပင်ခရိုင်အတွင်းရှိ မအူပင်၊ ပန်းတနော်၊ ညောင်တုန်း၊ ဓနုဖြူမြို့နယ် (၄)မြို့နယ်သာရှိပြီး ငါး၊ပုဇွန်ကန်များဖြင့် ငါးပုဇွန်မွေးမြူသူဦးရေမှာ ငါး ကန်ပိုင်ရှင်ဦးရေ (၂၄၁၅)၊ ပန်းတနော်မြို့နယ်တွင် ငါးကန်ပိုင်ရှင်ဦးရေ (၄၉၁)ဦး၊ ညောင်တုန်းမြိုနယ်တွင် ငါးကန်ပိုင်ရှင်(၁၅၃၄)ဦးနှင့် ဓနုဖြူမြို့နယ်တွင် ငါးကန်ပိုင်ရှင်(၂၈၉)ဦးတို့သည် ငါးမွေးမြူရေးလုပ်ငန်းကို နှစ်စဉ် တိုးတက်မွေးမြူ လျှက်ရှိကြောင်း ငါးလုပ်ငန်းဦးစီးဌာန၏ စာရင်းများအရသိရှိရပါသည်။
ရေချိုငါးများကို ငါးကန်များဖြင့် မွေးမြူခြင်းအပြင် သဘာဝအတိုင်း မြစ်ချောင်း၊ အင်းအိုင်များတွင် ငါးဖမ်းလုပ်ငန်းလုပ်ကိုင်ခြင်းများလည်းရှိပါသည်။ ငါးသားဖောက်ရောင်းချသူများလည်းရှိသည်။ ရေချိုငါးမွေးမြူရေး ကန်များမှ ငါးသားဖောက်များကို ၄လက်မခန့် အရွယ်ရှိပြီး ငါးသားဖောက်များကို စတင်မွေးမြူသည်အချိန်မှ (၁၃)လကြာချိန်တွင် ၈၀ကျပ်သားခန့်ရှိ ငါးမြစ်ချင်း ငါးများ ရရှိပြီး တစ်ပိဿာလျှင် ၁၀၀၀၀/-ကျပ်ဈေးဖြင့်၊ ငါးကြင်း ၁ပိဿာ ၁၃၀၀၀ကျပ်ဈေးဖြင့်၊ ငါးခူ ၁ပိဿာ ၁၅၀၀၀ကျပ်ဈေးဖြင့် ရန်ကုန်စံပြဈေး၊ ရွှေပိတောက်ငါးဈေးနှင့် ရန်ကုန်မြို့ရှိ ငါးဒိုင် ကြီးများသို့ ပြည်တွင်းစားသုံးရန်တင်ပို့ရောင်းချလျှက်ရှိပါသည်။ ငါးကန်များမှ ငါးကန်ဖော်ချိန်တွင် ရန်ကုန်ဈေးကွက်သို့ ကုန်ချိန်ပျမ်းမျှပိဿာ ခုနှစ်သောင်းခွဲခန့် ပေးပို့ လျှက်ရှိကြောင်း လေ့လာသိရှိရပါသည်။
မအူပင်ခရိုင်အနေဖြင့် ရေထွက်ပစ္စည်းများပေါများသဖြင့် ပြည်ပဝင်ငွေများစွာရရှိသည့် လုပ်ငန်းများ လုပ်ကိုင်နိုင်ပြီး စီးပွားဖြစ်ထွန်းသော မြို့တစ်ခုဖြစ်သည်။
DOCA(ဧရာဝတီ)