ရန်ကုန်တိုင်းဒေသကြီး၊ စားသုံးသူရေးရာဦးစီးဌာနဝန်ထမ်းများသည် သင်္ဃန်းကျွန်းမြို့နယ်နှင့် လသာမြို့နယ်များအတွင်း ပင်လယ်စာများ ဖြန့်ချီရောင်းချနေသောဆိုင်များသို့ FDA ၏ သတင်းအရပူးပေါင်းအဖွဲ့ဖြင့် ရှောင်တခင်ကွင်းဆင်း စစ်ဆေးခြင်းအား (၁၁.၅.၂၀၂၂)ရက်နေ့ (၁၀:၀၀) နာရီတွင် ဆောင်ရွက်ခဲ့ပါသည်။
အဆိုပါ ရှောင်တခင်ကွင်းဆင်းစစ်ဆေးမှုတွင် အစားအသောက်နှင့်ဆေးဝါးကွပ်ကဲရေးဦးစီးဌာန(FDA)မှ ဦးဆောင်၍ စားသုံးသူရေးရာဦးစီးဌာန၊ မြို့နယ်ပြည်သူ့ကျန်းမာရေး၊ အထွေထွေအုပ်ချုပ်ရေးဦးစီးဌာန၊ စည်ပင်၊ မြန်မာနိုင်ငံရဲတပ်ဖွဲ့တို့မှ ပူးပေါင်း၍ ပင်လယ်စာဖြန့်ချီရောင်းချသော ဆိုင်များတွင် ရောင်းချနေသောအေးခဲအစားအစာများအား စားသုံးသူများအတွက် ထုတ်ကုန်လုံခြုံစိတ်ချရမှုရှိ/မရှိ၊ သန့်ရှင်းလတ်ဆက်မှု ရှိ/မရှိ၊ စားသုံးသူများ ဘေးအန္တရာယ်ကင်းရှင်းမှုရှိ/မရှိစစ်ဆေးမှုများ ပြုလုပ်၍စားသုံးရန်မသင့်သော အေးခဲအစားအစာပင်လယ်စာမျိုးစုံကိုပူးပေါင်းအဖွဲ့မှသိမ်းဆည်းဖျက်ဆီးခဲ့ပြီး ဆိုင်ရှင်များအားဝန်ခံကတိလက်မှတ်ရေးထိုးစေခဲ့ပါသည်။ နောင်တွင် (FDA) မှ စားသုံးရန်မသင့်ထုတ်ပြန်ကြေငြာထားသော အစားအသောက်များအား ရောင်းချခြင်းမပြုရန်၊ ရောင်းချခြင်းတွေ့ရှိပါက အမျိုးသားအစားအသောက်ဥပဒေအရ အရေးယူခံရမည်ဖြစ် ကြောင်းနှင့် စားသုံးသူရေးရာဦးစီးဌာနမှလည်း ရောင်းချသည့် ကုန်ပစ္စည်းများတွင် စားသုံးသူကာကွယ်ရေး ဥပဒေအခန်း(၁၈)၊ ပုဒ်မ(၄၁)အရ ကုန်အညွှန်းအမှတ်အသား (Labelling) ဖော်ပြရာတွင် ပြည့်စုံစွာဖော်ပြရန်နှင့် အခန်း(၁၀)၊ ပုဒ်မ(၂၁)အရ စီးပွားရေးလုပ်ငန်းရှင်များ၏ တာဝန်များကို မဖြစ်မနေလိုက်နာဆောင်ရွက်သွားရမည်ဖြစ်ကြောင်း ဆိုင်ရှင်များနှင့် ဆိုင်အရောင်းဝန်ထမ်းများအား အသိပညာပေး ဆွေးနွေးပြောကြားခဲ့ကြောင်း သိရှိရပါသည်။
DOCA (ရန်ကုန်)