“တစ်နိုင်တစ်ပိုင်မှသည်စီးပွားဖြစ်စိုက်ပျိုးလာသည့်ရွှေပန်းငွေပန်းများ”

  ကျောက်ဆည်မြို့နယ်အတွင်း ပန်းစိုက်ပျိုးသည့် ကျေးရွာများရှိသည့် ပင်တလည်ကျေးရွာ တွင် ပန်းများအများဆုံးစိုက်ပျိုးလျက်ရှိပါသည်။ ဇွန်ပန်း၊ စံပယ်ပန်း၊ မေမြို့ပန်း နှင့် ရာသီပေါ်ပန်း များစိုက်ပျိုးလျက်ရှိရာ ယခုအခါတွင် ရွှေပန်း၊ငွေပန်းများအား စီးပွားဖြစ် စိုက်ပျိုးလျက်ရှိပါသည်။ ရွှေပန်း၊ ငွေပန်းစိုက်ပျိုးရာတွင် ပန်းမျိုးဥများအား ပြင်ဦးလွင် နှင့် ရွာငံဒေသမှ တစ်ပိဿာလျှင် (၂၇၀၀/-)ကျပ်ဖြင့် ဝယ်ယူစိုက်ပျိုးကြကြောင်း၊ ပန်းမျိုးဥများအား ဒီဇင်ဘာလတွင် ဘောင်စနစ်ဖြင့် စတင်စိုက်ပျိုးပြီး ပန်းမျိုးဥဈေးအပါအဝင် တစ်ဧက ကုန်ကျစရိတ်မှာ သိန်း(၅၀)ခန့်ကုန်ကျကြောင်း၊ ဇူလိုင်လမှ စတင်၍ နေ့စဉ် (၇) လခန့်တိတိ ခူးဆွတ်ရကြောင်း၊ ရွှေပန်း၊ငွေပန်းများအား တစ်ရက်လျှင် (၃၀၀၀)စည်းခန့်ခူးဆွတ်ရကြောင်း၊ (၁၀)ပွင့်စည်း တစ်စည်းလျှင်(၃၀၀)ကျပ်ဖြင့် ပန်းလက်ကားပေး သောပန်းဒိုင်များသို့ သွင်းဈေးဖြင့် ရောင်းချရကြောင်း၊ လက်လီပန်းသီ၍ ပြန်လည်ရောင်းချသူများမှာ ငါးပွင့်ပါ ငါးကုံးလျှင် (၁၅၀၀/-)ကျပ်ဖြင့် ရောင်းချကြကြောင်း ၊ ရွှေပန်း ၊ ငွေပန်း စိုက်ပျိုးခြင်းဖြင့် တစ်လလျှင်(၉၀၀၀၀၀/-)ကျပ်ခန့်ဝင်ငွေရရှိကြောင်း၊ အပင်ကျချိန်တွင် ပန်းမျိုးဥများအား ပြန်လည် မွေးမြူ၍ နောက်တစ်ရာသီအတွက် စိုက်ပျိုး၍ရသဖြင့် ပထမစိုက်သည့်အချိန်တွင်သာ ကုန်ကျစရိတ် များပြီး နောက်နှစ်များတွင် ပန်းမျိုးဥစရိတ်သက်သာသည့်အတွက် ရွှေပန်း၊ငွေပန်းများအား စီးပွားဖြစ် စိုက်ပျိုးသင့်ကြောင်း ပန်းစိုက်တောင်သူတစ်ဦးထံမှ သိရှိရပါသည်။

DOCA(မန္တလေး)