ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြို့နယ်တွင် ပြည်ပပို့ကုန် ဆောင်းသီးနှံ ဖြစ်သော မတ်ပဲ၊ ပဲတီစိမ်း စသည်တို့ကို နူန်းတင်မြေနုများတွင် အဓိကစိုက်ပျိုးထားကြောင်း သိရှိ ရပါသည်။ လေးမျက်နှာမြို့နယ်၏ ၂၀၂၄-၂၀၂၅ ဘဏ္ဍာနှစ် မတ်ပဲစိုက်ဧကမှာ ၄၄၄၇၆ ဧကစိုက်ပျိုးပြီး ၃၀၀၆၃ ဧက ရိတ်သိမ်းလျက်ရှိပါသည်။ မတ်ပဲစိုက်ပျိုးရာတွင် ပဲမျိုး၊ ပိုးသတ်ဆေး၊ သွင်းအားစု၊ လုပ်သားခအပါအဝင် တစ်ဧကလျှင် ၉ သိန်းဝန်းကျင် ကုန်ကျပြီး ပျှမ်းမျှအထွက်နှုန်းမှာ ၂၅ တင်း ဝန်းကျင်ထွက်ရှိကြောင်း ဒေသခံတောင်သူများထံမှ သိရသည်။ ယခုအခါ လေးမျက်နှာမြို့နယ်တွင် မတ်ပဲများထွက်ရှိပြီဖြစ်ရာ မတ်ပဲတစ်တင်းလျှင် ကွင်းအရောက်ပေါက်ဈေးမှာ ၈၅၀၀၀ ကျပ်ဖြစ်ပြီး၊ ပဲပွဲရုံများသို့ သွားရောက်ရောင်းချပါက ၉၀၀၀၀ ကျပ် ရရှိကြောင်း၊ အရည်အသွေးကောင်းမွန်ပြီး သန့်သော မတ်ပဲများကို ဈေးပိုမိုပေးကြောင်း တောင်သူများထံမှ သိရှိရပါသည်။ ဒေသတွင်း တောင်သူ များသည် ဆောင်းသီးနှံ မတ်ပဲကိုသာ အဓိကထားစိုက်ပျိုးကြပြီး ယခုနှစ်တွင်လည်း မတ်ပဲဈေးနှုန်းမှာ ကျဆင်းခြင်းမရှိသောကြောင့် တောင်သူများအနေဖြင့် အကျိုးအမြတ်ဖြစ်ထွန်းလျက်ရှိပါသည်။ ဒေသ တွင်း ပဲကုန်သည်များမှတစ်ဆင့် ဟင်္သာတဈေးကွက်သို့ တင်ပို့ရောင်းချလျက်ရှိကြောင်း သိရှိရပါသည်။
DOCA(ဧရာဝတီ)