မန္တလေးမြို့နန်းရှေ့ဈေးရှိ သစ်သီးမျိုးစုံရောင်းချလျက်ရှိသော ဆိုင်များတွင် ပန်းသီး၊ လိမ္မော်သီး၊ စတော်ဘယ်ရီသီး၊ ငှက်ပျောသီး၊ သင်္ဘောသီးများနှင့်အတူ သခွာမွှေးသီး၊ ဖရဲသီးများ ရောင်းချ လျက်ရှိကြောင်းသိရှိရသည်။ ခေတ်မှီတိုးတက်သည်နှင့်အမျှ သစ်သီးများကြာရှည်ခံပြီး တစ်နှစ်ပတ်လုံးရောင်းချနိုင်ရန်အတွက် သစ်သီးအအေးခန်းများတွင် သိုလှောင်မှုများလည်း ရှိလာကြ ပြီဖြစ်ပါသည်။ဈေးကွက်အတွင်း၌ ဖေဖော်ဝါရီလဆန်းပိုင်းမှစ၍ အနယ်နယ်အရပ်ရပ်မှ ဖရဲသီးများ ဝင်ရောက်လာပြီဖြစ်ပါသည်။ ဖရဲသီးထွက်ပေါ်ချိန်၌ ဖရဲသီးဈေးနှုန်း အသင့်အတင့်ဖြင့် ပေါပေါများ များ ဝယ်ယူနိုင်မည်ဖြစ်ပါသည်။ ဖရဲသီးများကို သစ်သီးမျိုးစုံရောင်းချသောဆိုင်များ အပြင် လမ်းဘေးဝဲယာ သစ်ပင်ကြီးများအောက်တွင်လည်း သုံးဘေးကား၊ လိုက်ထရပ်ကားများ ဖြင့် လှည့်လည်ရောင်ချသူများ လည်းရှိပါသည်။ ယခုဖေဖော်ဝါရီလ တတိယအပတ်တွင် ဖြစ်ပေါ် နေသော ဖရဲသီးဈေးနှုန်းများမှာ ဒေသဖရဲမျိုးအစိမ်းကြားသီး လုံးကြီးမျိုးတစ်လုံးလျှင် (၄၀၀၀-၅၀၀၀)ကျပ်၊ အခွန်စိမ်းပြီးအတွင်းသားဝါတစ်လုံးလျှင် (၂၅၀၀-၃၀၀၀)ကျပ်၊ အခွန်စိမ်းပြီး အတွင်းသားနီ တစ်လုံးလျှင် (၂၀၀၀-၃၀၀၀)ကျပ် ဈေးနှုန်းများဖြင့် ရောင်းချလျက်ရှိကြောင်း သိရှိရသည်။ ဖရဲသီးအစိပ်ကလေးများ စိပ်၍လည်း တစ်စိပ်လျှင် (၅၀၀)ကျပ် ဖြစ်လည်း ရောင်းချ ကြသည်။ ဖရဲသီးတွင် ရေဓာတ်အများဆုံးပါဝင်သောကြောင့် နွေရာသီအတွက်အကောင်းဆုံး စားစရာသစ်သီးတစ်မျိုးလဲဖြစ်ပါသည်။ ရာသီပေါ်ချိန်ဖြစ်၍ ပေါပေါများများ ဝယ်ယူစားသောက် ကြကြောင်းလဲ သိရှိရပါသည်။
DOCA(မန္တလေး)