ကမ္ဘာလုံးဆိုင်ရာပထဝီနိုင်ငံရေးမသေချာမရေရာမှုများရှိနေသော်လည်း နိုင်ငံ၏အဝတ် အထည်ဈေးကွက်ကိုကာကွယ်ရန် အင်ဒိုနီးရှား-ဥရောပသမဂ္ဂ ဘက်ပေါင်းစုံစီးပွားရေးမိတ်ဖက် သဘောတူညီချက်(IEU-CEPA) ကိုချက်ချင်းအကောင်အထည်ဖော်ရန်လိုအပ်ကြောင်း အင်ဒိုနီးရှားအစိုးရက အသားပေးပြောကြားခဲ့ပါသည်။ စီးပွားရေးရာညှိနှိုင်းဆွေးနွေးရေးဝန်ကြီး Airlangga Hartarto က ဥရောပသမဂ္ဂသည် အင်ဒိုနီးရှားအဝတ်အထည်ထုတ်ကုန်များအတွက် အကြီးမားဆုံးဈေးကွက်ဖြစ်ပြီး ကမ္ဘာလုံးဆိုင်ရာဝယ်လိုအား၏ ၃၀ ရာခိုင်နှုန်းရှိကာ ၎င်းတို့နောက် တွင် အမေရိကန်က ၁၅ ရာခိုင်နှုန်းဖြင့် ရပ်တည်နေကြောင်း ပြောကြားခဲ့ပါသည်။ ဗီယက်နမ် သည် တူညီသောသဘောတူညီချက်ကို ဥရောပသမဂ္ဂနှင့်ချုပ်ဆိုပြီးနောက် ၎င်းတို့၏ အဝတ် အထည်တင်ပို့မှုကို ၅၀ ရာခိုင်နှုန်းထိ မြှင့်တင်နိုင်ခဲ့ကြောင်း သိရပါသည်။ ထို့ကြောင့် ဝန်ကြီးက အင်ဒိုနီးရှားအစိုးရသည် ပြည်တွင် အဝတ်အထည်လုပ်ငန်းကာကွယ်ရန်နှင့် တိုးမြှင့်ရန် IEU-CEPA ဆွေးနွေးမှုများပြီးမြောက်ရန် ဆောင်ရွက်လျှက်ရှိကြောင်း ပြောကြားခဲ့ပါသည်။ ပို့ကုန်ဈေးကွက် တိုးချဲ့မှုအပြင် အစိုးရသည် အဝတ်အထည်လုပ်ငန်း အထူးသဖြင့် SME လုပ်ငန်းများ၏ ယှဉ်ပြိုင် နိုင်စွမ်း မြှင့်တင်ရန် ပြည်တွင်းမူဝါဒများကို မိတ်ဆက်ခဲ့ကြောင်း ဝန်ကြီးက ပြောကြားခဲ့ပါသည်။ ထိုအောင်မြင်မှုရရှိရန်အတွက် စည်းမျဉ်းများမကြာမီထုတ်ပြန်မည့် စက်ပစ္စည်းများဆန်းသစ်မှု ပရို ဂရမ် ပါဝင်သော မဟာဗျူဟာမြောက်ခြေလှမ်းများ ဆောင်ရွက်မည်ဖြစ်ကြောင်း သိရပါသည်။ အစိုးရသည် ထုတ်လုပ်မှုပစ္စည်းကိရိယာများခေတ်မီစေရေးအတွက် အမေရိကန်ဒေါ်လာ ၁.၂ ဘီလီယံ ရင်းနှီးမြှုပ်နှံမှုထောက်ပံ့ငွေများ ပံ့ပိုးပေးရန် စီစဉ်ထားကြောင်း သိရပါသည်။ ထိုစီမံချက် များဖြင့် အစိုးရသည် IEU-CEPA အကောင်အထည်ပေါ်ပါက အဝတ်အထည်ကဏ္ဍ ပြန်လည် အားကောင်းရန်နှင့် အလုပ်အကိုင်အခွင့်အလမ်းများ ပံ့ပိုးပေးရန် ရည်ရွယ်ထားကြောင်း သိရပါသည်။ အင်ဒိုနီးရှားသည် IEU-CEPA ဆွေးနွေးမှုများကို ယခုနှစ်ဝက်တွင် အကောင်အထည် ဖော်ရန် ရည်ရွယ်ထားကြောင်း သိရှိရပါသည်။
Antara News
DOCA(ရန်ကုန်)