ရွှေပြည်သာ မြို့နယ်အထွေထွေအုပ်ချုပ်ရေးဦးစီးဌာနမှ မြို့နယ်အုပ်ချုပ်ရေးမှူး ဦးမြင့်ဦး ဦးဆောင်လျက် မြို့နယ်ရဲတပ်ဖွဲ့မှူးရုံးမှ မြို့နယ်ရဲတပ်ဖွဲ့မှူး ရဲမှူးဇော်နိုင်ဦး၊ မြို့နယ်စည်ပင်သာယာ ရေးအဖွဲ့မှ အုပ်ချုပ်ရေးမှူး ဦးညွန့်ဝင်း၊ အထူးစုံစမ်း စစ်ဆေးရေးဦးစီးဌာနမှ ဒုတိယစုံစမ်းစစ်ဆေးရေးမှူး ဦးဌေးလှိုင်ဖေ၊ စားသုံးသူရေးရာ ဦးစီးဌာနမှ ဦးသက်ပိုင်စိုး အကြီးတန်းစာရေးတို့ပါဝင်သော ပူးပေါင်းအဖွဲ့သည် (၂၆.၄.၂၀၂၅) ရက်နေ့ နံနက် (၁၀:၀၀)အချိန်တွင် ရွှေပြည်သာမြို့နယ်အတွင်းရှိ ဆောက်လုပ်ရေးပစ္စည်း အရောင်းဆိုင်များသို့ ကွင်းဆင်းစစ်ဆေးမှုများ ဆောင်ရွက်ခဲ့ပါသည်။
ထိုသို့ကွင်းဆင်းဆောင်ရွက်ရာတွင် ရွှေပြည်သာမြို့နယ်၊ အမှတ်(၄)လမ်းမကြီးပေါ်ရှိ ဆောက်လုပ်ရေးပစ္စည်းများရောင်းချနေသည့် ကိုကျော်ကျော်မိသားစု၊ ပြည်မြန်မာ၊ ဖိုးရာဇာ၊ အဲဗားဆိုင်များသို့ သွားရောက်ခဲ့ပြီး အုတ်၊ သဲကျောက်၊ ဘိလပ်မြေ၊ သံချောင်း၊ သွပ်ပြား၊ အိမ်ရိုက်သံ၊ Hollow သံချောင်း၊ H-Beam၊ I-Beam စသည့်ပစ္စည်းများ ရောင်းချနေမှုအခြေအနေ၊ ဝယ်ဈေး/ရောင်းဈေးနှင့်အမြတ် ရာခိုင်နှုန်းရရှိမှု အခြေအနေတို့ကို စစ်ဆေးခဲ့ပြီး ဈေးနှုန်းများ အဆမတန်မြှင့်တင်ရောင်းခြင်း မရှိစေရန်နှင့် ပစ္စည်းများအား တာရှည်စွာသိုလှောင်ထားပြီး လက်ဝါးကြီးအုပ်အမြတ်ထုတ်၍ ဈေးကစားခြင်းများ ပြုလုပ်ဆောင်ရွက်ကြခြင်းမရှိစေရန် အထူးကြပ်မတ်စိစစ်ခဲ့ကြောင်း သိရှိရပါသည်။
DOCA(ရန်ကုန်)