ပုသိမ်မြို့တွင်မိုးဦးကျခါစတွင်ပေါ်သော ပန်းတိမ်မနိုင်ပန်း(ခ) ပန်းတိမ်ငိုပန်း အလှ၌ ပန်းတိမ်ဆရာ လက်မှိုင်ချရသည်အထိ တင်စားခေါ်ဆိုသောပန်းတိမ်ငိုပန်းသည် သုံးရာသီရှိသော မြန်မာ့ ရေမြေ တွင် မိုးတွင်းကာလ၌ပွင့်တက်သည့် ပန်းတစ်မျိုးဖြစ်သည်။ ပန်းတိမ်ငိုမျိုးတွင် တစ်ထပ် ပန်းတိမ်ငို၊ နှစ်ထပ်ပန်းတိမ်ငို၊ သုံးထပ်ပန်းတိမ်ငို (ခေါ်) ဆင်စွယ် ဟူ၍ သုံးမျိုး ရှိသည်။ မျိုးကွဲပေါင်းများစွာရှိပြီး ပန်း၏အရောင်မှာ အပန်းရောင်၊ ခရမ်းရောင်နှင့် အဖြူရောင်တို့ရှိ ကြသည်။ ပန်းတိမ်ငိုပန်းကို အအေးပိုင်းဒေသများတွင် အများဆုံးစိုက်ပျိုးကြပါသည်။ ပန်းတိမ်ငိုပန်း ကို ရှမ်းပြည်နယ်၊ ရွာငံနှင့် ပင်းတယမြို့နယ်တို့တွင် အများဆုံးစိုက်ပျိုးကြသည်။ ယခုအခါ အပူပိုင်းဒေသများတွင်လည်း စတင်စိုက်ပျိုးကြပါသည်။ အပူရှိန်မြင့်မားသည့်ဒေသများတွင် ပန်းတိမ်ငိုပန်းကိုစိုက်ပျိုးနိုင်ရန် အမိုးအကာပြုလုပ်၍ စိုက်ပျိုးကြသည်။ ပန်းတိမ်ငိုပန်းပင်သည် ရေကြိုက်နှစ်သက်သော်လည်း ရေဝပ်သည့် ဒဏ်ကို မခံနိုင်ကြောင်း သိရပါသည်။ ပန်းတိမ်ငိုပန်းသည် ဘုရားပန်းအဖြစ်သာမက အခမ်းအနားားတွင်လည်း တန်ဖိုးထားသော အလှဆင်သည့် ပန်းတစ်မျိုးဖြစ်သဖြင့် ပန်းစိုက်သူတို့အတွက် တွက်ခြေကိုက် သော ပန်းတစ်မျိုးဖြစ်ပါသည်။ ဘုရားပန်း ထိုးရာတွင်လည်း တခြား ပန်းများထက် ရက်ပိုရှည်အထားခံသော ပန်းအမျိုးအစားတွင်လည်း ပါဝင်ပါသည်။ ယနေ့ဒေသ ပေါက်ဈေးအနေဖြင့် ပန်းတိမ်ငိုပန်း (အဖြူရောင်) (၁၀) ပင်ပါ (၁)စည်း လျှင် ၃၅၀၀ မှ ၅၀၀၀ကျပ် နှုန်းရှိပြီး ပန်းတိမ်ငိုပန်း (ခရမ်းရောင်) (၁၀) ပင်ပါ (၁) စည်းလျှင် ၄၀၀၀ကျပ်နှုန်းနှင့် ပန်းတိမ်ငိုပန်း (အပန်းရောင်) (၁၀) ပင်ပါ (၁)စည်းလျှင် ၃၅၀၀ကျပ် နှုန်းတို့ဖြင့် ရောင်းချလျက်ရှိပါကြောင်း ဈေးကွက်မှသိရှိရပါသည်။
DOCA(ဧရာဝတီ)