တောင်ငူခရိုင်၊တောင်ငူမြို့နယ်၊ ဆင်ဆိပ်ကျေးရွာအုပ်စု၊ ညောင်ကိုင်းကျေးရွာအနီးတွင် တောင်ငူ တက္ကသိုလ်၊ ပညာရေးကောလိပ်၊ အစိုးရစက်မှုလက်မှုသိပ္ပံစသည့် တက္ကသိုလ်/ ကောလိပ်များတည်ရှိရာ ဖြစ်သဖြင့် အဆိုပါကျေးရွာရှိ ကျေးလက်နေပြည်သူများသည် မိမိတို့အိမ်ခြံဝန်းများတွင် အပိုဝင်ငွေ ရရှိအောင် လူငယ်များကြိုက်နှစ်သက်သည့် သီးနှံအမျိုးမျိုးဖြစ်သော သင်္ဘောသီး၊ မာလကာသီး၊ သရက် သီး၊ သံပုရာသီး၊ဂွေးချိုသီးစသော နှစ်ရှည်သီးနှံပင်များနှင့် အရိပ်ရသောအပင်များ စိုက်ပျိုးလျက်ရှိရာ ယခုအခါ ဂွေးချိုသီးများ လှိုင်လှိုင်ထွက်သည့်ရာသီဖြစ်သဖြင့် ပေါများစွာရောင်းချလျက်ရှိသည်။
ဂွေးချိုသီးဆိုသည်မှာ အပြင်ခွံအစိမ်းရောင်နုနုမှစ၍ အစိမ်းရောင်ရင့်ရင့်အထိရှိပြီး အတွင်းသားမှာ ဖြူဖြူကြွပ်ကြွပ်လေးဖြစ်ပါသည်။ အရသာအနေဖြင့် ချိုချိုချဉ်ချဉ်အရသာလေးရှိပြီး အတွင်းတွင်အစေး များ ပါဝင်နေသည်။
ဂွေးချိုသီးကို လူငယ်တို့အကြိုက် အချဉ်ပေါင်းအဖြစ် ငါးပိ(သို့မဟုတ်) ဆား၊ ငရုတ်သီးမှုန့်နဲ့ နယ်စားခြင်း၊ ငံပြာရည်၊ ငရုတ်သီးမှုန့်ဖြင့် သုပ်စားခြင်း၊ ငပိချက်,ချက်စားလျှင်လည်း စားကောင်းသလို၊ ပုဇွန်ခြောက်များဖြင့် ကြော်စားခြင်း၊ ထောင်း၍ဟင်းရည်တစ်မျိုးမျိုးဖြင့် တွဲဖက်စားသုံးရာတွင် ထမင်းမြိန်စေသော အသီးတစ်မျိုးဖြစ်သည်။
ဂွေးချိုသီးဈေးနှုန်းအနေဖြင့် ဒိုင်သို့သွင်းလျှင် (၁)လုံး ၅၀ ကျပ်ဖြစ်ပြီး အလုံး(၁၀၀) လျှင် ၄၀၀၀ ကျပ်ဖြင့်ရောင်းချရပြီး လူကြီးလူငယ်မရွေးကြိုက်နှစ်သက်သည့် အသီးဖြစ်သည့်အတွက် ရောင်းအား ကောင်းကြောင်း ဂွေးချိုသီး ခူးဆွတ်ရောင်းချသည့် ဒေါ်ဥမ္မာ၏ ပြောပြချက်အရ သိရှိရသည်။
DOCA(ပဲခူး)